喺巴士上, 見到對面個女仔對住部電話㩒㩒㩒, 時不時臉露甜笑. 我就肯定, 同佢互動緊嘅一定係佢心儀對象, 只有對住自己鍾意嘅人, 先至會有如此表情.
當下我就心想, 喺科技發達嘅年代拍拖真係好, 無論身處何方, 隨時可與對方聯系, 視像又得, 直接對話又得, 怕難以啟齒, 只以文字表達都得, 無遠弗屆...... 唔似得我哋嗰個年代, 想搵一個人, 流動嘅就只得傳呼機, 而且並唔係個個都擁有.
試過好多次約咗人喺某地點等, 等極都唔見人, 於是就要到就近地方借電話打, (當時大多數商店門口都設有電話, 方便借人用, 只要同店主講聲唔該借電話, 未等對方點頭, 已經手起指落撥緊電話. 如果身處嘅地點冇商店, 就只好用收費嘅電話亭) 先要打對方屋企電話, 睇吓佢係咪唔記得咗約會而喺屋企, 搵唔到人嘅話, 就打去自己屋企, 睇吓對方有冇打嚟留言, 當兩邊都冇留言, 而又未見人, 就只好留喺原地繼續等. 過多一陣又重複地打電話去佢屋企搵人, 打去我屋企問有冇留言....... 之所以唔走, 係諗住對方或者只係遲到, 遲到好過唔到嘛, 費事呢頭前腳走, 對方後腳就出現, 無謂擦身而過啦. (試過兩次, 喺等吓又打吓電話嘅情況下, 足足等咗幾個鐘都唔見人, 事後一個口窒窒話有到過現場, 不過見唔到我. 另一個話有啲事阻住咗, 所以趕唔切...... 我唔怪佢哋臨時有事冇出現, 不過你搵唔到我, 都打去屋企留個言畀我吖, 等我唔駛等嘛, 事後竟然當冇事, 簡直可怒也, 所以我決定與之絕交, 從此不相往來)
換轉今日, 等到變化石嘅情況, 絕對唔會發生, 因為由未出發至去到目的地, 期間已不斷傳送訊息報告行蹤.
當年冇手機在手, 每次出街都心掛掛, 怕對方來電時電話長響冇人接, 會令佢唔耐煩而不再致電. (如果係去買餸就快買快回, 以防錯失來電. 如果係偶而同朋友去街, 就人在外心繫家......中嘅電話, 不時致電回家查詢有冇來電搵我, 有嘅就大為緊張, 連隨問來電者有冇留下一言半語 (絕大多數都冇), 雖然唔知係邊個, 但會一廂情願當咗係佢, 心內就會甜絲絲, 亦會後悔早知唔出街, 就唔駛接唔到佢電話. 假如冇來電, 心就會戚戚然, 為何唔搵我, 失望之餘亦甚不是味兒.
換轉今日, 只要攞住部電話, 就算去到天涯海角, 都唔驚有missing call .
好嘞, 當彼此聯系上, 大家都攞住話筒, 卻礙於驚言多必失, 怕暴露我無知嘅一面, 好多時都唔敢講太多, 加上有時對方亦不在狀態, 只係有一句沒一句地搭吓嘴, 變成時不時會出現dead air 嘅情況. 對方見我唔出聲, 而佢又冇乜嘢講, 就會主動提出掛線. 對我嚟講, 雖然見唔到佢, 但藉着電話, 感覺同佢好接近, 一旦收線嘅話, 就好似離我而去, 每次都感到失落.
被動而矜持嘅我, 雖然時刻掛念佢, 卻唔敢主動搵佢, 難道只係同佢講 : 因為想念你, 就打嚟聽吓你把聲囉...... 咁咩? 所以只有乾着急地等待, 等佢幾時想起我才來電.
有時等到花兒也謝了, 佢都毫無動靜, 我就唯有鼓起勇氣傳呼佢, 求其搵個藉口, 總之只為想聽吓佢聲音, 亦向佢提示, 我仲未死, 佢已經好耐冇搵我嘞.
可是佢唔係每次都即刻覆機, 搞到我作為藉口搵佢而綵排嘅台詞, 因為佢遲遲未覆而以為佢唔得閒覆甚至唔會覆, 結果被失望蒙蔽而拋諸腦後, 致使到佢來電時, 我預設嘅台詞已經派不上用場, 因而搞到胡言亂語詞不達意一團糟. 唉, 一做主動總係衰收尾.
每次想起佢嘅時候, 我都好想知, 此時此刻, 佢喺邊呢? 做緊乜嘢呢? 同邊個一齊呢? 幾時會想起我呢?........
換轉今日, 以上嘅情況, 而家應該亦唔會發生, 雖然未能常相見, 但可透過手機互相通訊, 互知近況, 就算只係一聲hi一聲bye, 只要知道佢安好已經足夠, 唔駛好似上世紀, 唔喺屋企, 傳呼唔覆, 猶如人間蒸發.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
