lemontea222,
唔好唔開心，有乳腺炎又要湊兩個Ｂ係好辛苦，我之前同你一樣，好彩係當時我個女已經８個月大，我的奶量已經穩定，我個陣仲死，平日可以１０分鐘每邊泵４安，果時２０分鐘發炎果邊點泵點搾都係安幾，又痛又攰，有時囝囝走埋嚟掂到我已經痛到想喊，一邊身簡直係庳咗，連ling起隻手臂都勁痛。唯有密密泵同餵，你可以試下我呢個方法，沖一個熱水涼，或者開一缸熱水浸，雙手搽Ｄ沐浴露，然後用隻手托住個胸嚟搾（好似用手git 奶咁），因為有沐浴露會容易Ｄ搾，個胸又冇咁傷。泵之前hot press，之後仲係好痛就cold press，即使而家收咗奶，好番之後再追都唔難，我就因為囡囡食得好少，順勢減產，而家我一日泵３次，總共１２－１４安，都夠佢食。
你仔仔扭計有好多因素，因為埋慣身，飲奶樽係好唔同的技巧，我個女都好抗拒，到而家都係食好少，有時真係想打開佢個口倒晒Ｄ奶同粥仔落去，有好多時一餐要分幾次餵，真係想死，不過又可以點喎？唔餵由得佢好驚佢食唔夠，分幾次餵就好似寵壞佢唔定時食，真係好矛盾。我囡囡細Ｄ果陣都試過抱住佢成個鐘先瞓，而家有時成４５分鐘，嘗試放低落床幾次都醒勁喊，我而家仲成日餵餵下瞓着咗，因為每日都係瞓倒最多６個鐘，通常係４－５個鐘。
你唔好太擔心住，而家最緊要係定時泵，要努力清晒個乳房Ｄ奶，未必會去到好嚴重，我個ＯＢ話如果含膿要抽會見到一個谷起波波，好硬好痛。抗生素都要起碼４日先見效，而家你可能都係差唔多，睇多幾日先啦。講真乳腺炎好番之後要好小心，必須擠清同定時泵或餵，如果唔係都好易再嚟過，至於停唔停就真係你自己决定，我就好堅持餵到最少一歲，到時囡囡可以食全脂奶。
講到不幸，好多人慘過你，你有奶想quit, 呢度有好多個媽咪，每日想盡辦法増奶，真係唔知點講好。我反而想知你番工後想點安排泵奶。我有個護士朋友，佢做手術室，番工前要停人奶，因為真係冇可能做做下手術去泵奶，佢都好無奈，但一家medical benefits都靠佢，佢唔可以唔番工，佢囝囝食到３個月就冇媽媽奶食啦。你而家休息多Ｄ，希望快Ｄ好番啦。
花旗太太生活在花旗國，留意時差，你問我未必即時答到。
發表於 
返回列表
