55至57集我基本係跳住睇，大佬呀，駛唔駛咁多集講果少少嘢，鄭秋冬唔係神，呢個個案話救贖，第一做間諜果個係陳香，對唔住嚴家果個係陳香，佢心臟有事，唔直接因為秋冬揭穿佢而死，但自己其實都活得好扭曲，一邊係如親父一樣嘅劉安，一邊係對佢好好嘅嚴總同愛人嚴楓，十年左右唔係人嘅日子，被道德感煎熬，加埋工作上嘅壓力，不時又怕被人揭穿，個心臟頂到果D都算奇蹟，感覺係嚴家父女當佢係救命稻草，呢D病係可以扮下嘢就醫好，呢個世界嘅醫生收工啦，之前寫咁多人性現實，去到結局嚟個神話，改名獵場傳奇好D。
呢套獵場有幾樣不得不講下，不吐不快：
1）胡歌的確係演得好，佢將鄭秋冬嘅人格成長捉摸得好細緻，好多場內心爭扎，面部表情改變/表達都好到位，所以佢話演完呢套劇將佢掏空，我係相信嘅。秋冬後期人設太神聖，劇情又過多佢借助羅伊人去完成任務嘅安排，搞到秋冬好似要靠女人上位，佢可以唔理公司去做私人嘢，去到後來有咁多分公司，佢可以唔駛返工去做人替身男朋友，而間公司話上市喎，編劇真係侮辱觀察智商。
2）咁多大腕演員拔刀相助又好，俾人老點又好，佢地的確精彩，雖然戲份不多，但令人印象深刻，如孫紅雷、張嘉譯、趙立新我好鍾意，佢地演活呢幾個角色，可惜嘅如祖峰，戲份剪晒，搞到大茄都不如，面目模糊，變成冇深度嘅過場角色，搵個阿水做都得，何必要佢？
3）陳修風英俊有餘，深度不足，可惜矣。葵黃最初人設唔錯，點知後面變成過場打混混咁，嘥咗個角色。賈靜雯就只一場戲，可惜美人遲暮，老態畢現，成個設定好鬼老土。顏丙燕果段又長又悶，感動不足。
4）較重要角色如熊青春、賈衣玫、惠成功返轉頭睇，都算有特色，兩段情都好蒼白好別扭唔自然，但兩個女角算做得幾出色，觀眾所以唔鍾意佢地都係因為個角色人設問題，唔係演員，惠成功角色最初傻更更，後來反轉咬番秋冬一啖，或者其實佢同賈衣玫至相配，係秋冬中間插咗隻腳入去搞亂檔，最後惠成功都算謝師，幫秋冬搵到邊個跣佢一鑊。
5）林拜算係一個比較清醒嘅角色，佢一直立於高地去睇一切事發生，適當地置身事外，編劇最敗筆係加入一D笑話，有咩理由嚴肅嘅工務會議要玩噴水玩GAG，林拜最應該係辦公室入面清醒發指令果個至係。
6）最後又係最多人話唔掂嘅羅伊人，我接受到佢成長改變，亦都可以接受佢心底係白蓮花，但現實係有冇可能搞咁多而又獨善其身？夾硬要鄭羅多次錯過，反反覆覆，呢樣就超級敗筆，一次就好啦，何必要咁多次？鄭坐監，怕連累羅，假意絕情，羅心灰意冷，接受富商包養做小老婆，唔好係官，仲要幫佢做法人，最後話撇得一乾二淨，好難囉，反而簡單少少，做富商小老婆，得閒去下BALL搞下公關，好似林拜老婆咁，最後富商落難，羅因為冇參與而可以撇清界線，咁反而駁得通。去到同喜劇演員又係無謂，根本接受佢都已經匪夷所思，寫到羅伊人飢不擇食，但一聽到秋冬同熊分手即刻變晒樣，睇唔到同喜劇演員有幾真心，最攞命係喜劇演員後來紅咗劈腿，有冇搞錯？好啦，終於羅鄭再次好番，又走個嚴楓出嚟玩救贖，仲救足3/4集，冇嘢吓話！羅嘅人設唔扎實，一時商界女強人，一時小女人，究竟想點？
編劇同剪片係全套劇最失敗，最初都話緊湊去得快，後面唔知係唔係因為想賺多D錢，明明45集加到58，多出果13集就係每集重覆之前果集6至7分鐘同埋無聊加嘅戲。睇琅琊榜，我地話戲剪太多，冇播嘅可以豐富個故事，獵場就掉轉，唔該剪番果13集，令套劇唔好咁樣衰。呢套係完美示範好演員遇上後期製作令個作品面目全非，甚至由神劇變神經劇。賣弄經典、賣弄金句令套劇變得好突兀，唔係所有人都睇過挪威的森林，鬼知你直子綠子係咩水！唔係所有人都睇過晒編劇入面提嘅書，與其賣弄自己嘅文藝氣，不如好好編好套劇，商咩鬼戰？完全誤導觀眾，呢套係獵場倫理大唔知喜定悲劇，唔係職場片，要講愛情多就唔好一早話研究、公開做獵頭行業嘅種種，根本似偵探劇，我真係未見過有獵頭咁得閒去起人家底。
花旗太太生活在花旗國，留意時差，你問我未必即時答到。
一D題外話——獵場外，比獵場本身更突顯人性啊
唔好賴湖南衛視拖長黎播，講真我都覺得佢“注水”好嚴重，例如尋晚女主同D醫生去參觀D醫院設備病房，我就覺得完全無必要。除左幫女主加戲，我諗唔到任何意義。類似的“廢戲”仲有好多，我覺得CUT到35-40集差唔多。佢俾一哥劇本得30幾集，都唔知背住一哥注左幾多水！
發表於 
返回列表
