worthy 發表於 16-10-22 18:14 
回覆 rose-mag 的帖子
版主，好多謝你用咁多時間打咁多字。你真係好好。
我唔會亦都唔識教你點令阿伯回心轉意，因為每個人性格、背景、經歷都唔同，所以至會培養出特定處世態度，你太固執，眼中容不下一粒沙，現實同個人意願有幾大距離睇你造化，而家現實係同你嘅願景冇辦法一樣，你可以選擇一條直路走到尾，唔理死治，又可以停低諗下，轉向方向，令自己可以沉澱一下，一早好幾個會員已叫你自己去搵下自己人生意義，培養興趣，學習下獨立，習慣下為自己而過生活，唔好被另外一個人控制你嘅喜怒哀樂。你敢搏放手試下都叫做有一半機會，唔放手就一定掐死呢段感情，人生就係一場一場賭博，冇人敢保証將來係點，有一半機會係好，有一半機會係差，不過我覺得好又好，差又好，要開心過定唔開心過係取決於自己嘅態度，有人日日一邊咒罵一邊工作，有人就一邊享受一邊工作，兩種人都係要返工，都係為口奔馳，問題係前者辛苦得來又唔開心，冇人咁笨去攞苦嚟辛。
死有輕於鴻毛、有重於泰山，touchwood，你真係死咗但身邊人冇唔開心，你又覺得甘心咩？都講過，對對方最大懲罰係冇佢你活得更好更精彩，而家最怕你將會係被懲罰果個，所以唔好咁笨，要做就做大蠃家，作最差準備：學習獨立學習唔靠人學習放下捨得，到時就會發覺冇咩輸唔起。
花旗太太生活在花旗國，留意時差，你問我未必即時答到。
發表於 
返回列表
