nikinokb 發表於 12-3-6 06:12 
回覆 rose-mag 的帖子
maggie.唔好意思,,岩先唔記得問一個重要問題(對我黎講好重要..hehe)
呢度公校咁細個唔多考試架，我見個仔都係每一兩個星期有測驗，
都係測寫字，即係英文就老師讀個字，小朋友就聽到拼個字出嚟，
再寫落張紙度，我個仔第一個字母多數係啱嘅，但中間個響音就搞唔掂，
於是就有零蛋嘅情況出現，而家已經好D，但20個字唔會啱多過10個，
反而中文測驗有十幾個啱，可能係中文字測驗簡單D，主要係記得就OK，
我個仔記性唔錯（如果佢想記），佢問我雪櫃同電腦點寫，我寫俾佢睇，
佢睇住寫番出嚟，初初我以為佢寫唔到，點知又得，第二日仲返學校寫俾老師睇，
當然係唔靚，但老師話真係有八成架。
我地係去到三年級至有正式公開考試，用嚟評估學校成績，
所以由K就開始俾佢地習慣，不過呢度唔同香港，壓力冇咁大，
而且功課都唔係搏命抄抄抄，有邏輯訓練、分類、配對等，
剛剛開始教簡單數學同錢幣，我個仔都識分D硬幣，但未明點樣換算，
就嚟教晒26個英文字母拼音，老師叫我喺屋企同佢玩下字咭，
幫下佢拼音串字，我自己都冇學過拼音架，而且我發音都唔純正，
呢樣有好多時要靠我老公。
課外活動我個仔有喺學校學彈琴，不過主要只係學理，唔係真正彈，
因為都算好平，$130學十堂，而且又喺學校學，所以我由得佢鍾意學，
我問個仔唔學好唔好，佢又話要學，得閒喺屋企就攞個電子琴舞幾下，
我又OK，都唔係想佢做郎朗李雲迪，只係想佢手指靈活D，訓練下耐性。
我知到高年班有芭蕾舞同樂器，之前學生表演有小提琴同橫笛。
其他課外活動就有自然教育日、picnic、arts night，係由家長會同老師辦嘅。
我自己幫個仔報市政府好似香港文康處果D游水班，三四十蚊有六七堂，
都幾抵玩，仲有好多興趣班暑期班。
我而家都頭痕緊暑期班，因為學校由5月尾放到8月中，中間我都未知俾個仔去邊好，
有好多唔同暑期班，有D係玩嘅，有D係好似做P咁，又有D成日去field trips，
原本想個仔返去以前preschool，但仔仔唔鍾意，可能因為果度個個都細過佢，
好多都好貴，時間又唔多啱，可能搵D半日嘅，再叫婆婆湊半日，
我而家都未諗掂。
你四五月嚟到，真係冇學返喎，但都有作用，因為學校一放假，
你想去參觀都唔得，到時就抓緊時間去校區辦事處睇下邊間有位，
跟手去睇下學校，好彩嘅知道8月去邊間讀就約老師校長傾下個仔情況，
得就入定紙排隊做評估，因為就算你有醫生報告，校區都要派人見你個仔幾次，
做下測驗，你又要填兩份表，都幾十條問題，然後有結果就開會，
咁淨係最初入紙排期前都要同老師加社工開會，又要填表，
之後等都要兩三個月，咁如果四五月已到，入到紙，一開學冇耐就可以做評估，
如果合資格就早D有人幫手，咁好過又要等到學期都過咗一半。
你講個仔冇時停，隻手又要有嘢拎住，呢D都係自閉嘅徵狀，
佢會唔會成日咬手指？用隻手周圍摸？會唔會將D唔應該放入口嘅嘢放入口？
成日咬衫嗎？我仔咬到D衫袖爛，而家老師特別準佢帶隻毛公仔返學，
當佢一緊張不安就拎俾佢攬住，對佢控制情緒幾有效。
我仔班主住錫到佢燶，因為佢成日幫手執嘢，其他小朋友唔會架。
特別班通常俾情況嚴重嘅小朋友，全班都係有特別需要嘅，
一班有六至十個學生，老師就兩三個，輕微果D小朋友會安排喺普通班，
再加每星期特定一對一時間，幫小朋友去跟上學習進度或改善社交問題。
我所知有D社區服務中心會有小朋友班課後班咁，新移民大人就可以去City College上英文班，
免費嘅，小朋友一般都係靠學校，你嚟到去校區報學校時，
仔仔要做語言評估，睇下佢明白英文有幾多，可以方便編班。
我果兩個都考過，屋企除咗用英文外仲有另一種語言嘅都要考，
確保小朋友去到學校明白老師講咩，如果英文程度唔夠會編入英文學習班，
不過小朋友吸收得快，好快就會學到架啦，初初係難，你早D嚟，
就不如用未返學嘅時間帶佢去睇下SF不同地方，去下圖書館都好，
圖書館會有故事時間，有人講故事，又可以去借D英文書英文碟返屋企睇，
睇多D小朋友節目都有幫助。
花旗太太生活在花旗國，留意時差，你問我未必即時答到。
發表於 
返回列表
