我都有件事想同大家分享，亦都好想有陰陽眼嘅人，同識c fu &問米婆 (神婆)嘅人比一比意見我。
我排第二，我無陰陽眼，自小只有時運低先會發生一啲同靈異有關嘅事情，但大家姐就由細到大都成日同亞媽講見到嘢嘅，我媽咪本身係個烈女，所以佢不嬲都唔信有鬼神之說，但因為家姐成日同佢講見到，佢不得不請關二哥返屋企，同掛咗個八卦喺我同家姐瞓嗰張床度，就住個八卦發生咗我人生之中第一件同靈異有關嘅事，【請看下面事件(一)】，但家姐2x歲嗰陣終於封咗眼，跟住間唔中先會feel到有嘢嘅存在，但已經再見唔到喇!
【事件一】
我哋細個好窮，住喺柴灣華人永遠墳場山腳啲臨屋(木屋)，一張鐵碌架床(紅色嗰啲)一家五口瞓，我同家姐瞓上格床，上面提及家姐成日同亞媽講見到嘢，亞媽就請咗關二哥同卦咗個八卦喺我哋張床正中間嘅牆位，事發當時，我對下個妹啱啱學識扶住啲嘢嚟行，平日不嬲都係由我哋兩個家姐照顧佢嘅，有一日，亞爸亞媽出咗去，我哋抱咗亞妹上我哋上格床玩，佢邊扶牆行邊對個八卦好好奇，嘗試搵隻手撥佢落嚟，終於比佢成功咗，個八卦直插落床下底，我同家姐兩個即刻好緊張爬入床下底用埋電筒搵，因為我哋知道個八卦係保護住我哋兩個嘅，但都搵唔到個八卦，嗰晚我同家姐開始發高燒，兩個都發到103度，睇咗西醫打埋針都唔退燒，高燒持續咗幾日，亞媽開始發現唔見咗個八卦，問我哋事件始末，我哋一五一十講比媽咪知，媽咪即刻用電筒照住床下底搵，一搵已經搵番個八卦，掛番上牆上面，當晚我同家姐就退燒喇! 大過咗之後，同家姐講番起依件事，原來當年大家高燒倦極入睡嘅夢境都係一樣嫁! 成個夢境都係漆黑一片，中間有個燈泡不停轉呀轉…轉呀轉…轉到我哋好似就跌就跌咁，就會札醒，後來都有同身邊朋友傾過依件事，佢哋話好可能我哋比鬼掩眼，就係唔想我哋搵得番個八卦，所以我同家姐點搵都唔會搵到，好彩亞媽搵到咋! 如果唔係…可能我同家姐已經…… 【事件一完】
第二件事就發生喺我1x歲嘅事候【請看事件二】，講之後講講我身世，我雙親已經過咗身(媽1997年過身，葬咗喺tko華人永遠墳場靈灰閣)，亞爸就唔記得幾時過身喇，因為佢包29，我8歲那年亞媽一個女人帶住我哋4姊妹搬走咗，亦都因為咁，亞爸過身我哋對佢都不聞不問，亦都唔知政府會點樣處理佢嘅骨灰。
【事件二】
亞媽過身後，我被社署安排入住宿舍，有一晚瞓瞓吓覺喺清醒嘅情況底下突然郁唔到，我同大家被嘢”摘”嘅第一個反應一樣，極力反抗，嘗試嗌出聲同郁動個身體，當我好用力睜開我對眼到咗半開半合嘅程度，我見到一個帶住眼鏡著西裝嘅男人嘅黑影坐咗喺我床邊，佢前面有一堆冇包札類似荊棘嘅花好蓮香色肉咁望住我，但我喺瞓上格床嫁喎! 我好驚…由於宿舍嘅宗教背景係天主教，我心裡面一邊念天主經一邊好用力咁嘗試另轉身，幾經辛苦終於比我郁到另轉身面向牆身，再另番出去咩都見唔到嚕~ 【事件二完】
媽咪過咗身之後，我成日都夢見我媽咪，夢嘅內容多數都係接受唔到媽咪離開嘅事實，再唔係就係其實媽咪夾埋個醫生嚟扼我哋，其實佢未死，只係想我哋生生性性，每次夢醒我會覺得係我太掛住媽咪先至會夢見佢唧。離開咗宿舍再隔多一至兩年，我就結咗婚，結咗婚3年之後計劃生bb所以就搬近咗99，搬咗去油塘，亦都係好近tko華人永遠墳場，即我媽咪葬嘅地方，自此…我夢見我媽咪嘅次數越嚟越密，每次夢見佢，場境會係以前我哋住過嘅地方又有，一個完全陌生嘅地方都有，但共通點都係佢或我哋想為大家煮一餐飯比大家食，但偏偏事旦有一兩個餸行暈個街市都冇得賣，再唔係就唔知點解餐飯煮極都煮唔完咁，個夢永遠都冇結尾，喺夢入面佢冇開口講過嘢，但眼神話比我知佢好似有啲訊息想表達咁，試過有一次喺夢入面，佢個口冇開口講嘢，但唔知點解好似用心同佢傾緊計咁，大家互相望住對方，佢同我講，知道大家姐同我都結咗婚，知道我生咗個仔，兩個妹都出咗身喇! 佢話佢都生活得好好，叫我哋唔洗擔心佢，【問題一】唔知依啲就叫報夢，點解唔係次次夢見佢都表達到佢想講比我知嘅嘢? 我睇到樓上有媽咪話夢見先人同報夢係兩回事兩個感覺，【問題二】應該點分呀? 之後我都不斷夢見媽咪，都係冇開口但好似有嘢想講咁，【問題三】我應該唔應去問米? 我見樓上有媽咪提及冇端白事唔好接觸同鬼神有關嘅嘢，【問題四】我點知先人係真係有需要? 如果根本唔係我又走去問米會唔會唔係咁好? 況且我唔識依方面嘅人士，好怕比人扼，【問題五】想問有冇媽咪遇過有料嘅問米婆? 收費如何為之合理?
上述因由，我爸爸過咗身，我哋都冇幫佢搞身後事，聽說過無人認領嘅屍體政府會將其之火化，撒落堆填區，【問題六】請問有冇人知道政府係咪真係咁樣處理無人認領嘅屍體? 【問題七】咁係咪即係叫做死無葬身之地? 後來喺bk見到有媽咪話死無葬身之地嘅先人，會影響後人，【問題八】咁我都算叫做佢後人吖…有咩方法可以解決呀?
到咗我生咗個仔之後，同靈異嘅關係都頻密咗，亞仔一出世已經係一個成日無啦啦喊，每晚一到零晨2點幾必喊，但幸好佢拍拍吓好快瞓得番，一直都冇為意，直至亞仔一歲倒，上bk睇到有啲媽咪提及bb見到嘢之類嘅topic，自己開始都有啲疑神疑鬼，由於我唔識有料人士，咁就上網搵啦…搵到一個口碑唔錯就走咗去問卦，c fu咩名唔開啦!(唔知開唔開得嘛)，佢就話亞仔14個月前係斷六親命格，通常依啲case，啲父母都會搵揍仔婆揍，話明斷六親，所有親戚朋友揍都會被蝦，但佢話我唔揍都揍到個仔咁大啦! 都唔差在嗰幾個月捱埋佢啦! 又話亞仔六神中其中兩神唔啱”瓦”，所以好容易分神，就解釋咗佢點解成日無啦啦喊，叫我哋將個仔契比天后，有天后定住佢，佢個神就會定啲，又叫我哋買玉鐲仔比佢帶，都有定神作用。
【事件三】
到咗嗰年嘅農曆六月尾，亞仔啱啱學識講叠字，突然有一晚暗亞仔瞓覺嗰陣，無啦啦亞仔眼神好似好驚咁，望位天花個燈泡位話：「驚驚…驚驚」，仲要喺度勁拍心口，我初初都不以為意就安慰佢：「唔洗驚…媽咪喺度保護你!」，佢就將塊面暱埋喺我條頸後面偷偷望住天花燈泡位慢慢瞓著咗，第二日出街搭小巴經過一個足球場，見到開始搭棚先醒起就嚟農曆七月，咁…諗住日光日白應該冇咁猛卦，於是照帶亞仔落公園平台玩，嗰日好大風，吹到地吓啲樹葉打轉，曾經聽過有人話地吓啲垃圾被風吹起喺度打轉嗰個位置會有『朋友』喺度，點知亞仔真係指住嗰度叫：『哥哥』，嚇到我即刻抱返佢上樓。隔咗幾日我又再去上述c fu問卦，c fu話佢的而且確係見到，但『人哋』係冇心比佢見到嫁! 只係路過閃唔切比佢見到，c fu話佢冇惡意，問我哋屋企冇神位嘅話唔好加，有嘅話就唔好減，意思係唔需要特別去做啲咩囉，c fu仲話亞仔天生有自閉命格，我嘅指導可以令佢好到七成，其餘嗰三成就要改名，佢話我哋改得亞仔個名唔好(我哋自己改嫁! 爸爸同我各揀一個自己鐘意嘅字合成)，整個情況維持咗成個農曆七月，農曆七月過後一切回愎正常。
經過頭一年嘅經驗，第二年本已經有晒心理準備，但原來都仲係好驚，時間又係差不多農曆六尾開始指番同一位置拍晒心口「驚驚…驚驚」，我哋覺得總不能每晚都心驚驚咁入睡嫁! 於事爸爸左問問右問問之下，有個同事比咗袋香灰我哋，叫我哋每晚幫亞仔沖完涼搽落兩邊臉頰同額頭，仲比咗一個金舖用嚟裝金鍊嘅紅色有拉鍊嘅袋仔比我哋，叫我哋掛喺亞仔瞓嗰個位嘅床頭，千其唔可以比小朋友搞 & 打開，照老公個同事做，果然亞仔冇再拍心口話驚驚，但事情並唔係就咁告一段落喎。【事件三完，請看事件四】
【事件四】
到咗第三年即今年，亞仔一啲動靜都冇，但原來到我囉! T^T”，又係由農曆六尾開始我病咗，本來病咗好多人都話唔可以稱得上同『朋友』有關，但…故事開始……
8.23依日我相信全香港嘅人都會好深刻，當晚我哋喺亞嫲屋企，全家一邊食飯一邊睇住現場直播，睇到把己火，就返屋企啦! 一返到落屋企已經係抬啲死傷者嗰幕喇! 當晚開始我情緒好波動，+上食咗啲重西藥，成個人都好似冇靈魂得番個驅殼，嗰晚都瞓得好差。
到咗8.24，一直留意住新聞，一幕一幕嘅悲劇重覆又重覆，我已經開始到咗承受唔住嘅地步喇，身體+心靈都變得好虛弱，夜晚瞓覺開始入睡冇耐，我就好似比鬼"摘"咁，郁唔到! 但我對眼可以開到至少一半，望到晒全間房嘅境象，一個人影都冇，但我耳邊就好熱鬧，background係好多細路仔喺度玩嘅哈哈笑聲，另外有一個男人一個女人喺我身邊，應該係喺我身邊，因為佢哋把聲好近好近，我聽唔到佢哋講乜，只知道佢哋圍住我好似喺度討論定商量緊啲嘢咁! 當時其實我個心好平靜，我唔太驚，可能因為佢係攪我唔係攪亞仔，到我郁得嘅時候，已經咩聲都聽唔到嚕! 但就隔咗好耐先瞓得番。
到咗8.25，一開始入睡，又郁唔到，今次淨係聽到有把好後生嘅女人聲，仲要好清楚聽到佢講乜喎，佢係咁叫我：「小姐...小姐...小姐...小姐...」叫咗我好多次，我心不斷係咁叫佢快啲同我走，唔好喺度攪我哋!! .\"/. 跟住就聽到佢話：「依...我唔要依個小姐呀，佢咁樣衰!!」(頂佢吖...話我樣衰!) 跟住我又郁得番喇!
到咗8.26，香港包機去馬尼拉接死傷者返香港，新聞直播死傷者家屬喺機場接，逐個靈柩推到家屬面前，家屬都哭斷腸，我終於忍唔住都一齊喊，抑壓咗幾日嘅情緒，終於得到釋放，嗰晚開始再冇比嘢"摘"同再聽唔到聲喇! 但個病就一直維持到過咗農曆七月，之後睡眠質數先叫好番啲，同個人唔會再冇靈魂咁。
【問題九】我需要搵c fu返嚟屋企睇睇呢…? 因為我真係好唔安心呀! 我都唔肯定到底我屋企係咪真係有嘢? 如果我嗰晚應咗嗰位小姐，可能我從此拜拜嫁喇! >.<”
親子王國已刪除閣下簽名檔內容,煩請自行檢視,頭像,頭銜,暱稱,如帶有廣告或宣傳推介成份,應立即修改或刪除,否則可被封鎖戶口,謝謝合作.
發表於 
返回列表
