Nomos 發表於 22-7-28 03:46 
自私，衰格，成日發脾氣比面色人睇
同其它小朋友出街時，又不遷就，分享，成日令氣氛很尷尬，失禮到暈
首先唔好咁負面去睇自己小朋友，佢發脾氣俾面色人睇，有冇問佢原因係咩？點解發脾氣，咩事發脾氣？小朋友好直接，只係單純反映自己想法同感覺，8歲係唔會理解到失禮人同令到氣氛尷尬。
我女細個都成日黑面，性格固執倔強，有家長話佢公主病，一定係父母唔識教，萬事遷就個女，有次跳舞班導師教訓佢，我女黑面，仲出言頂撞，我過後問佢點解咁冇禮貌，佢話唔鍾意果個導師，成日鬧人，佢腳痛跳唔到某D動作，導師話佢懶，唔用心跳，如果唔想跳可以退出，我女覺得俾導師話佢講大話偷懶好委屈，以後對呢一個導師就更討厭。當時我女都係八九歲，佢只係直接表達自己情緒，唔明咩叫失禮人，更加唔明咩係頂撞導師，甚至父母會俾人話冇家教。果陣只能用佢可以理解嘅方法去同佢講，有少少威逼，又有利誘，再加埋其他導師想辦法，慢慢過咗一段時間，我女大個咗，脾氣收歛咗，加埋我成日同佢講道理，而家佢真心鍾意跳舞，好享受跳舞，加上遇到好老師，笑多過黑面。
我自己同仔女相處係好注重溝通，同老公花好多時間同仔女傾計，有時佢地有嘢唔明，我地一家都攤開講，每個人都有機會表達自己意見，好多時會發現原本一件事從不同角度去睇會相差好遠。個人覺得身教言教同樣重要，要小朋友性格陽光，首先父母都要有正向思維，想個仔唔自私，與其不斷要求佢遷就人同人分享，不如發掘下個仔有咩優點，俾多D機會佢發揮下長處，當一個人專注於正面嘢嘅時候，慢慢會忽略負面情緒，過程雖然係比較耐同慢，但成效會較長遠。
小朋友唔同階段理解事物嘅程度都唔同，8歲時候唔明，到9歲可能會明，又或者會比8歲時明白多咗，所以唔好灰心，千祈咪放棄，頑石終有一日會點頭。
花旗太太生活在花旗國，留意時差，你問我未必即時答到。
發表於 
返回列表
