worthy 發表於 16-10-28 16:53 
回覆 O.M.G 的帖子
阿伯唔用個apps同我調情，唔send個心心俾我，佢話我地日日見，乜嘢都可以面對面講。所 ...
婚姻係一個承諾，夫妻係應該有忠誠，但事實承諾可以改，忠誠可以變，要改要變，你又奈何咩何？理想同現實一向都存在距離，問題係你自己忍耐到個距離有幾大，做人又有幾潔癖有執著。曾經有兩個男人不約而同同我講有關女朋友/老婆出軌，兩個都係出名好男人，好錫女朋友/老婆，但佢地都接受唔到自己另一半出軌，當兩個女人回頭認錯想重修舊好，我兩個男性友人都唔肯再重新接受自己曾經好愛嘅女人，我問點解，佢地兩個答案都係曾經背叛過自己嘅女人，再回頭都有條刺，亦成為人家嘅鞋，被人著過嘅鞋，自己再著番都好似有D嘢，呢兩個男人都被我教訓咗一餐，我理解佢地，但如果真係好愛一個人，最大嘅愛係可以義無反顧，包括係原諒所有錯，既往不咎，即使再被出賣背叛都此愛不移，當然呢個係有最大嘅愛至可以做到，世上聖人少之又少。只能說大部份人都係凡夫俗子，被背叛而生恨係正常，不能再愛屬當然，過程中亦有傷痛，只係要想辦法令自己傷痛程度減輕，療傷時間縮短，而最好方法就係放下，再高層次嘅就係喺對方唔再存在於自己生活中時活得比以前更好。
而家你嘅問題係自身個性嘅缺乏做成自卑冇自信，依賴他人為自己製造快樂同安全感，但偏偏你不能控制他人嘅思想行為，欲求不滿下冇反省自己嘅不足，加以補充，反而將所有問題推向對方，過份將對方理想化，於是現實理想嘅距離越來越大，你就越來越不安，對對方要求就越來越挑剔，對方就越行越避，最後現實理想距離就越來越大。。。又一個循環無限loop，問題係睇下對方忍得幾耐至離場。
你一日唔改變心態，呢個情況係冇可能改變，因為你從來冇由另一個人嘅角度去睇，我話你聽，你係無可能用你嘅思想去為阿伯搵合理解釋，因為人除咗理性外，仲有好多感性，好多人好多事都係唔合理，好多人做嘅嘢都係唔合邏輯嘅，so what？做人幾時話一定要完全理性？幾時話樣樣都要合邏輯？舉個例子，我老公有個老友，結婚十幾年，有個仔，個老婆又好好，老婆收入又好，全家保險都係靠老婆份工，有屋有車，人前人後模範夫婦，點知有日爆出佢有好多次外遇紀錄，老婆頂唔順離婚，好多朋友都問點解有人咁白痴，咁好老婆都出去滾，問題係呢個係劣根性問題，就係有人咁白痴。所以呢，唔駛去問點解阿伯唔反省，因為佢覺得冇必要，或者佢已經反省過，只係唔係你要果種，或者反省後嘅做法唔係你會接受果種，但你唔可以質疑佢冇反省。
要注重嘅係阿伯之後嘅行動，佢之前氹你試圖補救，你又巴之閉唔領情，而家已經錯過黃金時間，搞衰咗關係後，仲想阿伯行番之前果套，常人都唔會啦。你而家再逼佢只會適得其反，最好方法係唔理唔問，當冇事發生，向另外一個方向行，為自己找尋出路，令自己生活冇阿伯都開心精彩，一來為阿伯消失做準備，二來搏一次阿伯會唔抵得你唔理佢，男人好多都犯賤，你越緊張佢佢覺得你煩，你唔理佢佢就心癢癢，不過咁世事人心都係自己掌握之外，結果冇人可以預知，你要有獨立嘅自覺，要做強者要有做強者應有嘅可以承受孤獨嘅心，否則你都係認命做一個小女人，俾阿伯牽著走。做小女人有做小女人幸福，可以唔駛用腦唔駛勞氣，將煩惱俾晒個老公，真係幾爽架。
花旗太太生活在花旗國，留意時差，你問我未必即時答到。
發表於 
返回列表
