Re: 未婚的,入黎傾傾呀!!!
呢排大家梗係好忙喇...我地呢版去左第3版lu 
噚日未來老爺奶奶去左拜山,所以肥妹同家姐去左我屋企,而個野仔就俾賤人接左返去~但我唔係咁想家姐係我度過夜,因為我好累,對住佢真係唔洗訓:-( 但老爺想拜完山返大陸揼骨,想我同個佬睇住兩姐妹 
...咁我咪同個佬講"不如叫佢地湊返啦...,我點睇埋家姐呀..."點知佢發爛炸將兩姐妹擺晒上BB車,話佢帶佢地返奶奶,佢一個睇住佢地... 
我心諗,我睇肥妹冇所謂,但照顧家姐既責任唔係我度,我冇必要為左佢搞到冇得訓 ?-( 咁我咪話,你擺低肥妹俾我囉...但家姐你帶返過去個邊睇 
點知佢當住兩個細路面好大聲咁鬧我話點解我唔可以幫手睇埋家姐,佢話家姐都唔係好煩到我...咁我咪話囉...我唔幫手睇佢你就黎怪我,佢親生老母唔理佢就冇人話佢,關我乜事先 
,佢話"你係街邊見到個乞兒都會俾錢佢啦,咁你咪當可憐埋佢囉",又話我對住佢家人成日黑面,話我搞到自己神憎鬼厭,又話佢平時已經好就我,好錫我....
我已經忍不住喊左出黎,我話個野仔既出現已經搞到我好唔開心....好,你話我俾面口你睇,我已經晚晚沖涼時先敢匿埋黎喊囉,仲想我點...我唔開心又可以點發洩??我冇人冇物可以同邊個講?? 
噪左一陣,我個姑奶過左黎...原來係佢屋企都聽到我地噪(佢住斜對面屋),佢見我喊晒都有問乜事,叫我地唔好噪,又驚嚇親兩姐妹所以抱走左家姐...佢想抱埋肥妹,但我坐係床度攬住肥妹喊唔俾佢抱走...~
我喊到收唔到聲,個佬問我想點,我話"可以點喎,我唔想發生既已經發生左,一係你殺左野仔囉,我唔想佢再係我眼前出現"...佢話"咁你咪當佢透明囉"...我話"咁即係一世都冇解決方法啦,佢都出左世啦..佢老母又冇本事養佢!你有冇諗過你做既野對好多人都有傷害?!第一,你唔認野仔係你生,咁佢大左會點諗?!咁已經係一個傷害...第二,你係我大肚時同個賤女人搞左野仔出黎,又係另一個傷害..."佢冇出聲,淨係問咁我想點...我話我唔想見到家姐同野仔,我話如非必要我唔會上奶奶家,唔會同佢地食飯,唔想再聽到關於佢地既事....~
唉...我真係喊到癲左,肥妹仲係第一次見到我喊,佢得一歲人仔,竟然識幫我擦眼淚..... :cry: 又扶住我膊頭企左係度皺埋眉頭望左我好耐...~個下我喊得仲犀利,而家淨係得我個女識錫我,雖然我得佢一個親人,但我已經好滿足....~
後尾我個佬都有哄返我...我地都有計傾返...但我仲係唔係好理佢,佢鬧我鬧到成村都知...我真係好唔開心~
後尾姑奶叫左我地去佢個邊食飯,家姐無啦啦發高燒,燒到104度...個佬同姑奶送左家姐去屯門醫院,要照X光搞好多野...~我就係屋企睇住肥妹...最後老爺奶奶去醫院接左家姐返佢地家,冇返到大陸~
我個佬返到黎同我講話佢係醫院俾老爺奶奶,姑奶鬧到狗血淋頭,連姑奶個男朋友都鬧埋一份...話佢做乜鬧到我喊晒 :tongue: 哼,等佢鬧呀,唔係冇人幫我架 
過去的留不住,
未來的難預測,
守住現在,當下即是~
發表於 
返回列表
