本帖最後由 rose-mag 於 15-10-31 10:44 編輯
rainbowworld 發表於 15-10-31 09:17 
唔知點解步步驚心咁悶，我好耐之前睇到第十集就一直冇再開，但個個話好睇，請問要第幾集先開始好睇？
你有 ...
JM你咁多問題架，呵呵
，不過我唔係專家，我睇大陸劇同大陸網上小說年資好淺，而且近年有小朋友，時間好有限，同埋我奄尖，好多唔好睇嘅，我會放棄，尤其係書，同埋言情非我首選，我鍾意偵探類推理類多D。答你先。。。
唔知點解步步驚心咁悶，我好耐之前睇到第十集就一直冇再開，但個個話好睇，請問要第幾集先開始好睇？＞＞＞步步驚心我第一次睇未完第一集已放棄，劉詩詩擔唔起套劇。第二次見咁多人話正，又適逢TBB播，呢度JM講到咁好睇，於是捱完見到吳奇隆出場就睇落去，佢果場騎馬出場英到呢。。。小說入面四爺係去到十爺生日至第一次見若曦，如果照咁安排，套劇一定死得，所以會加四爺騎馬幾乎撞到若曦呢場喺第一集，起碼一班576粉會追。以電視劇計，我覺得係去到若曦入宮之後至開始好睇，其實我唔多鍾意前段若曦同八爺一齊果部份，我覺得好悶，詩詩同鄭嘉穎個感覺唔似同吳奇隆咁自然，可能當時都唔過電。我重睇步步驚心最少三十幾次（冇作大，有多冇少），不過唔係一集一集全套重睇，我係集中後半睇最多，如果你已睇到第10集，試下捱過13集，若曦八爺講分手，之後就開始講四爺點追佢點幫佢，後宮開始多動作就好睇架啦，開頭真係淡一D，後半劇力強好多，人物改變明顯，後面到時就最精彩，我覺得由第15集開始好好睇，步步驚心都有好多細節位，不過未去到好似琅琊榜咁精緻。
你有冇睇風中奇緣同雲中歌電視劇？你覺得劇同書邊樣好睇d？桐華文筆如何？＞＞＞風中奇緣唔鍾意彭于晏，詩詩其實演技未係好好，只有胡歌一個，所以我睇得好少就冇睇。雲中歌一見于正同AB就決定唔睇，書呢兩本我都未睇晒，可能當時太鍾意步步，睇本本都覺得唔夠好，桐華文筆好好架，以書計佢比琅琊榜作者高好多班，不過大家風格唔同，但桐華寫現代就差好多，係故事唔係太得，而且佢D書都冇好結局，唔係死就走，雖然文筆，但睇得多個人都灰晒，步步驚心我睇咗四五次，真係睇書都喊幾場。
有冇睇過唐七公子d書？我睇過三生三世十里桃花，都幾好睇，手機裏面仲有本華胥引等睇＞＞＞我聽人講好多唐七公子，但未睇過，之前DL咗三生三世十里桃花但未排到睇，三生三世會拍劇，定咗楊洋同劉亦菲，原本話可能霍建華或胡歌做男一，我有D期待，而家楊洋，我都唔知佢係咩水。華胥引電視劇我睇咗少少，但鄭嘉穎唔掂，佢話未睇原著就拍，拍完睇小說知道自己演錯晒，個女主又唔掂，反而裡面其他幾個故事入面嘅角色出色好多，袁弘、蔣欣、郭珍霓都好多人讚，我聽講原著故事比劇好好多。
花千骨呢？劇同書你有何評價？＞＞＞花痴劇，唔入得大劇格局，特技超唔掂，假到爆，但霍建華做得好好，完全係白子畫，趙麗穎做前期花千骨都唔錯，但後期成為妖神就唔得，呢個唔怪得晒演員，因為套劇改到不知所謂，特技又差，再加埋剪到七彩，成個故事去到後面完全係爛劇，入面有D配角乞人憎到不得了，嚴尊、輕水、軒轅朗、糖寶、落十一。。。全部都唔掂，見到佢地就跳過，除咗男女主外，唯一出色係殺姐姐，以新人喺講做得好好。本書都唔得，文筆其實幾差，只係文字堆砌，好作狀吓，我只係因為套劇爛所以想開小說睇嚟補留下D劇情，但睇到2/3都係放棄，不過套劇值得一讚係個六界體系，同埋果十幾樣神器嘅描述。呢套花千骨都係由原著作者改編，都唔知點解改到咁鬼差。
其實你比較鍾意睇劇定睇書？＞＞＞冇抵觸，兩樣我都鍾意，我係睇書睇電視睇電影大，我媽媽好鍾意睇電影聽收音機，我細個受佢薰陶，中西片大戲我都睇唔少，仲聽埋好多花邊新聞大老倌拍戲嘢。睇書幻想空間大，文筆好嘅作品一樣感染力，劇就將理念形象化，有好有唔好，演員演譯好影響作品面貌，同一套劇唔同人演就有不同感覺，就以咁多年咁多金庸作品，個個演員都有不同演譯效果。
大陸好鍾意將d網絡小說拍成劇，我覺得都拍得好好，有d仲好唯美，你覺得呢？＞＞＞一DD，亦有不知所謂嘅，而且網絡小說良莠不齊，好嘅睇下落入邊個導演演員手上，預算又影響質素，有時話唔埋，反而好怕而家內地劇韓化日化，現實中有冇咁多狗血嘢？雖然話電視劇都係將生活理想化，但時裝現代劇我接受唔到果D太唔合理嘅，反而講明奇幻仙俠或古裝架空歷史可以天荒夜談D都可以。以前好多人睇唔起大陸劇，但我其實都睇唔少，都唔係差，起碼拍打仗拍大場面都有說服力。，同埋大陸台灣海外好多臥虎藏龍，香港彈丸之地搞得幾大，拍得幾好都係以前，而家肯放本錢去拍劇嘅冇幾多人，大陸市場大財力點都比香港好，就算網絡行銷都大香港好多倍。香港好多導演演員都係半途出家，有D本身文學修養都有限，反觀大陸導演演員好多係大學本科畢業，即係唔客氣講，香港演藝出身嘅比起TBB果班港姐出身去演劇點都高班好多，但問題係喺香港演藝出身出路窄，大陸就唔同，唔理咩潛效則，本身自己有料，浸得十年八載要出頭都唔係奇事。
有冇睇甄嬛傳本書？流澰紫文筆非常優美＞＞＞甄嬛我係一直都未睇，好多人話好睇，但唔知點解我一直都未睇劇又未睇書，可能女人戲我覺得小家子氣，唔係好感興趣。
另外金庸d書又係正到冇朋友，你有睇嘛？覺得點？最鍾意邊個故事？＞＞＞金庸係我睇得最多嘅一個作者，佢D作用基本每一本都正，金庸文筆好，文學修養高，寫情又到位，就算係好人壞人佢都描寫得好有深度，佢嘅宗旨係一個人學壞學好都同佢嘅性格背景同環境有關，所以楊過可以亦正亦邪，同郭靖果種正直唔同，同楊康果邊心思又唔同，總之就係個個人物都有自己獨特之處。金庸小說入面大小場面佢都可以好仔細，學習文學嘅人必要睇金庸小說，睇得多自己寫作都有進步。我自己鍾意射鵰、神鵰、書劍、天龍八部、飛狐外傳，最頂唔順係碧血劍，我睇完第二冊就冇再睇過，鹿鼎記我反而唔鍾意，就算中篇短篇如白馬嘯西風、鴛鴦刀我都睇晒。
花旗太太生活在花旗國，留意時差，你問我未必即時答到。
發表於 
返回列表
