下半場：
但阿伯做嘅嘢我唔鍾意就咁就走咗去, 係會影響成個家庭 ＞＞＞ 唔好將自己放到咁大咁重要，可能你低估家人嘅應變能力，或者只有你將問題放得太大，大到你以為蓋過晒個天，個天係唔會冚落嚟架，人要開心要幸福唔係要只求安穩，更重要係點樣面對改變同要有應變能力。
成個家庭係你嘅全部，呢個至係問題所在，每個人來時一個，去時都係一個，冇人可以依靠其他人俾生存意義，水係半滿定半空在乎心態思想，開心唔開心係可以自己調節，七情六慾人之常情，每個人都會有情緒，但如果自己控制唔到自己情緒中嘅反應同行為，要其他人去左右支持，我只想到除非佢係九五之尊，否則只係九唔搭八，睬你都傻。
你唔可以處理到自己嘅問題就去求助他人，社工唔係幫你唔到，只係你戴住有色眼鏡去睇，一行入去只一心想住點樣可以令阿伯再次臣伏於你之下，因為佢做錯，所有嘢都要佢負責撥亂反正，所有有關你有問題嘅聲音都拒絕接收，對住你呢種頑固個案，平常人要10次去化解，你可能要20次30次，而家至去咗兩三次就放棄有鬼用咩！而且本身係你自己情緒問題，要點樣去追求自己開心快樂嘅方法，自然係你自己去面對，咩都係你覺得、你想、你認為、你要。。。咁當然係要調節你嘅要求，幫你認識你嘅要求幾不設實際，現實中你得唔到嘅，同理想差別有幾大，社工要可以打破你嘅認知，等你諗得通同接受有D嘢係同你理想冇可能一樣，咁你想開心，一係學會接受不足，之後作調整，以後降低要度，一係就選擇逃避，繼續去搵你呢世都唔會搵到嘅快樂幸福。
青春少艾耍下小脾氣都有人會盲目欣賞，但愛情又好親情又好，要經營至可以一直有保鮮期，過去冇用心經營，一直只係消費當初嘅一點愛，愛都有用盡嘅一日，人身會攰人心都會累。JM問你阿伯有冇點氹你，或俾驚喜你，你話幾十年只有幾次。。。你似乎從冇嘗試過去欣賞生活中嘅小幸福，阿伯有冇過馬路時拖住你？有冇行得快咗，停低等埋你？有冇記得你鍾意食咩，放工時去買番嚟俾你？唔係下下要D咩大驚喜架，做得多又會變成例行工事冇晒情趣架啦，男人唔係個個都情聖上身，係的話，係又驚一餐，有時知道佢個心有自己已經係好難得。而家點解變成阿伯對你不聞不問，避得就避？真係純粹因為一個女人出現？係的話，你輸得抵啦，幾十年都唔夠人地幾個月，你唔會諗下其實你同阿伯嘅關係一早有隱憂？唔係你話從唔check佢果隻，而係佢對你已由愛變驚變怕，當另一個相較之下冇壓力嘅對象，你嘅牌面已由葵扇A變成階磚3。
花旗太太生活在花旗國，留意時差，你問我未必即時答到。
發表於 
).
返回列表
