本帖最後由 rose-mag 於 15-10-5 23:04 編輯
hugoma2015 發表於 15-10-5 18:32 
王凱D粉絲搏命鬧編劇，話編劇害靖王害王凱。我覺得編劇海晏喺原作者 ，佢絕對唔會去害自己D“親生仔女”。 ...
哈，粉絲睇唔到自己個偶像未到班，周圍鬧人都冇用，好些角色係奸嘅一樣可以有人鍾意，就拎步步驚心嚟講，四爺同八爺一樣係痴情一樣奸陰攻心計，但各有支持者，就係兩個演員演得好，有用心去研究同演譯。至於琅琊榜，胡歌同王凱高下立見，以難度計，梅長蘇呢個咁複雜矛盾嘅角色，要演得好至會討好，而靖王有咁多外加因素去幫演員做戲，佢都交唔到，仲可以賴人咩？係技不如人，套靖王果句：我都已經三十歲啦，都未封親王。。。都33歲啦，演技都仲係咁，幾時等到出頭天？呢次有幸同咁多好演員一齊演一套咁有水準嘅戲，希望王凱可以學到嘢偷到師。就算冇睇原著，齋刨劇本都可以有另一番演譯，而唔係交一個咁嘅靖王出嚟俾觀眾。
講仔細一D尋晚果兩集，你講得啱，連列戰英見到一個剛病好嘅梅長蘇都有憐惜之心，靖王幾嬲都好，冇理由可以對一個平日咁自負嘅謀士咁冷淡！梅長蘇可以捨譽王同太子，由零開始去扶植自己，得到今日嘅成績，多次有殺身之禍（可能靖王都唔知，亦從冇想過要去保護長蘇），以靖王咁重情義嘅人，對長蘇一心相助嘅感激唔應該會一下就冷落嚟，所以王凱演譯時過份冷淡，之前一段時間梅靖二人日夕相見，一齊籌謀一齊討論，靖王已對長梅產生好感親切感，對佢戒心已放低，所以之後以為長蘇觸犯佢嘅低線，佢第一個反應應該係震驚，之後係失望，再後係無奈，到長蘇同佢講謀大事要割捨，果陣佢至係有怒火，但都唔係一味咆哮就係，只會瞪大眼面目猙獰係好失敗嘅演譯方法，應該參考下演梁帝嘅丁勇岱，佢果種反覆同有程度變化嘅發怒方法令觀察對梁帝呢一個人唔係一味討厭，起碼我有同情佢，兩個仔只係日爭夜爭，但想深一層，所有嘢都係自己搞出嚟，怨邊個？梁帝對住靜妃果種放鬆愛寵，對皇后既厭又保嘅態度，唔只面上有戲，首先要個心有戲，真正將自己代入至係。
明顯地，王凱成日都好似抽離咗咁，等人交戲，之後踢番個波走就算，你講得啱架，佢真係成日發呆，同梅長蘇、蒙大統領討論邊個去勸夏冬時，大統領仲有戲過佢，雖則入面嘅大統領已知長蘇為林殊，但王凱懷念以前，細數十三年前慘案時，佢俾我感覺係一個第三者講番一個故事咁，完全感覺唔到佢係局內人，相反胡歌眼中含淚表情係想喊又忍住唔喊得，邊個似局外人？邊個係局內人？佢地兩個都係局內人，但而家好似靖王十三年後冇晒火冇晒對當年慘案嘅激動。到問長蘇點解要多謝佢時，果個表情完全唔知佢想表達D咩，究竟係懷疑長蘇係祈王舊屬定係覺得長蘇古怪？我同言侯爺一樣覺得猜不透。
長蘇雪中直呼其名，佢好歹係一個皇子，一個臣下敢叫佢個名，佢只係停低但面無表情，睇唔到係嬲定驚定一話係怯，我覺得應該係要回頭望，以靖王傲骨，俾人咁話，冇可能企定定俾人話，表情上都要俾D戲啩，照道理應該有心虛（因為真係俾佢講中自己武斷）、激氣（俾人刺中要害，真係唔救得）、嬲自己不濟（當年自己不在場，救無可救，十三年後有個補償機會，而家又落空），最後去大力打落欄杆度好合理，但可以大力D啩，同埋應該有D接駁動作，而唔係一個箭步走埋去，好唔自然。之後表情係死魚咁，係見到眼中含淚，但表情欠奉，宗主幫佢解釋埋，俾人講中心中鬱結，唔去到喊，心中都應該好激動，完全唔郁只係瞪大眼真係唔知可以講咩好。跟住嘅轉折更摸不著頭腦，突然好似冇事發生咁，靖王知道自己今次錯咗，唔靠長蘇唔得，死死地氣都要佢幫，多少要有尷尬加不忿但又要認命啩。
死啦，好似教人做戲咁，但真係忍唔住，好好一套戲，一個咁重要角色完全脫腳，可惜可惜，唯有自己腦補，如果係袁弘做就好啦。的而且確，編劇寫嘅台詞冇得加，有D時候要自己補番潛台詞，要代入角色，要深入去了解佢嘅性格同不同場口嘅心理狀況，雖則劇本決定一切，但演員演譯可以有不同效果。原來我有D猶豫好唔好睇小說版，因為唔想見到霓凰另配他人，但我想要了解多D書中靖王係點。
花旗太太生活在花旗國，留意時差，你問我未必即時答到。
發表於 
返回列表
