時政擂台 今日: 0|主題: 60305

有人放了一段“致年青人：你哋無上街嘅父母根本無愛過你” 的影片上社交媒體，我分享以上的是個錄音，那條片可是紅到爆啊，引起廣泛討論(不過正面或負面評價我不去透露啦😂😂😂) 。唔識放片唔緊要，我有文字版本，嘻嘻 ✌✌✌

致年青人：你哋無上街嘅父母根本無愛過你(文字版本)

我係一個90後，喺6月9號同12號我都有去遊行示威，亦都食咗好多粒催淚彈，見到好多年輕人受到暴力嘅對待，而喺示威當中，我發現咗一個好奇怪嘅現象，就是點解12號當日示威現場有成萬幾人喺到，點解百分之95都係年輕人，都係中學生、00後、90後，點解佢哋嘅父母會不在場呢？明明6月9號是有成103萬人遊行反送中，完咗遊行政府發聲明如期進行二讀，點解6月12係幾乎完全揾不到一個所謂嘅「大人」？件事都未完，

呢個問題我反覆思考咗好多日，最後我只能用一個好殘忍嘅事實作出結論，就係：年青人，你嘅父母根本無愛過你。

傳統華人嘅生育動機由始至終都係為了養兒防老，每一個父母只係想在子女身上控制、索取認同感，要鞏固自己嘅權威形象，從來都無諗過可以給予到什麼給子女，大難臨頭各自飛，唔好同我講你唔知道你嘅小朋友去咗示威，把口就講咩反對暴力，咁點解你唔出來幫忙阻止警察？你唔幫忙擋警棒同胡椒噴霧？警察射催淚彈的時候你唔覺拖你嘅仔女去安全嘅地方？你唔幫忙用濕毛巾幫吓年青人抹下塊面？

你哋去咗邊？你哋喺屋企涼冷氣睇直播咋，口講就話好關注，咩反對暴力。成件事根本就唔係咩藍絲定黃絲嘅問題，你支持定反對嘅問題，整件事核心只得一個，就係當年青人需要被保護既時候，你地班所謂既“大人”究竟去咗邊呢？

一個無條件愛仔女嘅父母嘅唯一本能反應係，睇到自己的子女畀人開槍射，只會以身擋粒子彈，而唔係喺到睇直播，你話你愛你仔女？咁你個仔女被警棍扑嘅時候，你個仔女食緊胡椒噴霧嘅時候，你個仔女喺地鐵站被人查身份證侮辱緊嘅時候，你哋去咗邊？我只是見到一位媽媽喺到幫我哋年輕人擋，我相信大家都知係邊個。

我屋企樓下隻貓，最近生咗隻貓仔，我想行近佢個仔一步，隻貓媽媽都想殺了我唔畀我接近啊，一步都唔離開他隻貓仔，你哋呢系邊呀？

我而家唔講政治，根本香港嘅父母由個仔出世嗰刻都不停咁索取佢，你同我講你買好多嘢畀佢哋，養佢好辛苦，供書教學，我想講呢，你收皮啦。

每次讀書考試低分，永遠係仔女嘅錯，一定係小朋友嘅問題，從來唔會撫心自問一吓自己畀到啲咩仔女，我唔係話物質上，我係講只係一件好理所當然嘅嘢：陪伴。你究竟陪咗你小朋友幾多，你心入面好清楚，唔好同我講要搵食，你無時間你又生？

個仔女大個啲，明知依家樓價生活指素高，都一定要個仔女畀家用，從來唔會諗吓可以給予啲咩畀佢哋，唔會諗吓，不如呀仔留返呢3000元家用給佢儲下錢，生活容易啲，就連呢3000元都要拎埋佢。

個仔女要識男女朋友，讀咩大學，結婚，明明是你仔女嘅私事，都唔知點解好似牽涉到你嘅利益咁係要插手埋嚟，咩都要向你報告，咩都要得到你批准。

根本你哋每一分每一秒都喺到計算緊可以喺仔女身上得到啲咩利益咋。

一有同你唔同睇法，就要唔開心，就講咩孝道呢啲嘢嚟索取，情緒勒索，咁你真係愛緊年青人咩？我見過有父母連一張簡單嘅書枱，紙筆，筆袋都畀唔到個仔女呀，然後你同我講要孝順？

無人想知你細個點樣一家八口迫喺一間100尺嘅房到生活嘅勵志故事呀，咩都畀唔人就學人生仔

每次講到呢到，我問一個問題：咁你又生？每一個父母都會惱羞成怒，一巴打落嚟，因為你根本就駁唔到。你個朋友嚟你屋企，你都會執下間屋啦，依家講緊迎接一個生命呀，點解可以咁求其就算？

然後今日嘅年青人要揹埋你地30年前無負到的政治責任？你哋唔出來不特止，仲要喺到指指點點，又講咩反對暴力，要咩和平理性表達，成日喺到扮清高，扮和平，扮中立，扮唔同意呢啲所謂嘅暴力方式。唔該你唔好同我講咁多廢話啦，我依家問你去咗邊呀，一有事，就個個潛哂水返屋企睇CCTVB。

成個社會節日文化，都鼓吹一種仔女一定要孝順父母，父母一定係愛子女，如果係咁，咁我生仔一定係最大的贏家啦，永遠都係父母啱仔女係錯，我生得你出就是我啱，父母有錯就要體諒，仔女錯就是佢哋嘅問題，永遠覺得自己高高在上。

年輕人一出世根本就係畀社會同你班父母唔同程度咁強姦緊，然後依家年青人反抗，仲要畀你哋指指點點，冷言冷語。

你地究竟消費完年輕人未？有事無事都要不斷剝削年青人，就算有一日逃犯條例真係撒回都完全唔關你哋呢啲冷眼旁觀嘅所謂大人事啊！

仲有我睇咗篇《作為70後，我深切向青年道歉》嘅文章，我想講呢，你道歉係無用㗎，你哋愛唔愛年青人，你哋係咪真係咁歉疚，只係得兩個選擇，就係你哋企出嚟，定係唔企出嚟。

所以，你哋唔使同我解釋咁多嘢，我唔想聽你哋啲咩偉大理論，我唔想聽我哋有幾唔明你哋啲大人有咩所謂難處，你只係需要喺樓下comment答我，企出嚟定唔企出嚟，所有嘢，喺街頭上，就會表達得一清二楚。