呢兩集好正，幾個好戲之人對上，果然係高手過招，份外好睇令人回味。
35集看點：
1）小飛流帶信去俾豫津，豫津表面一個紈絝子弟，但深明大義，冇佢從中搞局，最近劇情推進又冇咁好睇。呢次佢負責帶紀王去見宮羽，等紀王見到夏冬帶住衛錚，呢個應該係以後反咬夏江嘅情節舖排。
2）言侯對夏江，絕對係重要場口，言侯好似好嚴肅冇咩大動作大表情，但層層推進，攻其要害，夏江一個老奸巨都俾佢跣咗一鑊。首先話個仔，順便挑起夏江對個仔嘅思念，之後夏江問起個仔嘅消息，言侯就首先數夏江以前點對個老婆唔住，隨便踩埋璇磯公主有幾狼心狗肺，又話夏春面前話夏江幾咁心狠手辣，對故友出手，如今京城只餘下言侯一人係夏江老婆認識嘅，再講佢老婆五年前搵人帶俾佢嘅一封信，講佢老婆有重病將死，個仔未成年都有腦疾死咗，呢一刻夏江已耐不住心神不定，見到老婆親手寫嘅信，佢毫無憐惜之意撕爛咗，言侯知道呢個人根本係個冇心嘅人，再引導佢講出對夏冬生死不顧，最後時間夠啦，就輪到言侯出最關鍵嘅一句對白，再加上豫津收埋佢地果兩隻馬，夏江同夏春就完全入局啦。
呢場言侯同夏江都超班好戲，言侯面上好似雲淡風清，但每句說話都係步步進擊，對夏江多番指責，最初仲有少少友情存在，見到夏江撕爛老婆封信後，言侯已經對呢個故人死心，回番佢果幾句頂心頂肺：封信俾我，我鍾意講就講，幾時講就幾時講，當初我唔想講，而家我又突然想講啦，真係大快人心。言侯呢場戲激到夏江紮紮跳，仲乘機罵佢一餐，又喺夏春面前揭發佢幾咁無情無義。
夏江出場氣場已經好大，呢場佢個感情表現真係值回票價，我呢集睇咗5次啦，俾言侯講到痛處佢面上肌肉抽搐，眼中含淚，激動起身，滿心以為自己佈局精妙，短短一集已經可以成為經典。王勁松王永泉兩個老師出動，果然有火花，能演的人才能導，這是事實。
呢集前面宗主對藥王谷人嘅生命好關注，希望所有人全身而退，對比靖王上一集話不惜搭上全家府兵都要公義，可以做皇帝嘅唔係靖王，而係宗主，如果宗主成為皇帝就真係實現理想國度，而家真係五五波咋。
36集看點：
1）絕對係夏江俾人玩，言侯一直好似心不在焉，鏡頭影過好多次個茶壺，原來言侯係用泡茶飲茶去計時間，到時候就拋句我可以走啦，等夏江夏春兩個多心，自己帶江左盟嘅人去監禁衛錚嘅地方。
2）飛流好好打咗夏江一身，我翻睇咗好多次，真係開心都不得了，希望佢打多D，為蘇哥哥報仇。
3）靖王同夏江對戰朝堂，可惜王凱氣場有限，做唔到逼力。仲有個大bug添，明明梁帝踢靖王幾下洩忿，之後叫佢跪番好等佢返嚟，靖王即刻起身跪好，點知下個鏡頭，靖王又係坐喺地下度，好心剪片果陣小心D。
花旗太太生活在花旗國，留意時差，你問我未必即時答到。
發表於 
不過如果有人戴美瞳拍古裝，咁就點都出唔到眼神戲啦！
返回列表
