TV8 發表於 19-5-1 02:10 
其實我一個仔，一個女，女冇事，其實有自閉症之後大家都好淡㗎啦！人生都冇乜希望，你近排都見到好多新聞 ...
一定唔可以俾自己沉，爸爸已經嫌棄自己個仔，媽媽就更加要硬淨，好多男人都接受唔到自己個仔係SEN，教養過程亦絕不容易，但你地生得一對孖嘅，個天已經係對你地唔錯，有兄弟姊妹嘅SEN已經係算幸福，只要學點了解自己個仔，試啱方法就得架啦。我個仔都係自閉譜系，去到5歲至確診，密集式訓練加學校老師幫手，而家上到中學啦，好多嘢都有改善，而且幾乖，讀書又OK，比較弱係社交同表達，咁佢嘅人生仲有好長，慢慢學囉，我只係希望可以盡力喺有生之年扶持到佢可以自己照顧自己，自力更新唔駛靠人。
我唔只面對自閉譜系問題，我仔仲有濕疹同氣管敏感、花粉敏感、食物敏感等一籮問題，冇嘅，煮到埋嚟就食，見招拆招。我好彩少少係老公接受個仔，因為佢細個都有學障、濕疹同氣管敏感等問題，唯一覺得佢有少少遺憾係我仔運動神經好差，唔似我老公運動咁叻。But, anyway 世上無完人，世界係公平嘅，有得就有失，我仔雖然咁多問題，但佢心地好，叫做乖同聽話，又唔駛我叫讀書，佢緊張過我，我有時諗：仲想點？都唔錯架啦。
為母則強，喊完就要堅強，同你老公講：與其花時間去拗一D已經改變唔到嘅嘢，不如放眼將來，多D了解下個仔，研究下有咩嘢可以幫到佢，自閉越早介入越進步得快。以前我仔有個同學又係SEN，佢媽話個老公同埋成家人都唔接受到個女有問題，佢一個頂十個，自己湊個女去做訓練，每星期三次，次次轉兩架巴士，小學畢業時個女拎到學校嘅優異學生獎，係表揚佢努力學習。
我個仔而家13歲，回顧過去8年，都有氣餒嘅時候，但而家睇番轉頭，過程中都有好多開心回憶。
花旗太太生活在花旗國，留意時差，你問我未必即時答到。
發表於 
唔好喊，呵番
返回列表
