starer 發表於 12-1-5 12:12
我嘅工作成日都要接觸娛樂圈嘅人，喺上年我認識左一個男新人，初時完全比佢嘅樂天可愛性格吸引，雖然佢細我十幾年，但我地好啱channel，所以除左工作時間外，我地都會見面聯絡。
現今嘅娛樂圈，即使簽左經理人公司，亦未必就等於每月收入有保障，好多時根本連底薪都冇，出席event都要自己買衫，公司只會提供保姆，或者一啲訓練，但其他基本生活費，例如搭車﹑食飯﹑裝身都係食自己，而作為新人，冇乜人識，搵sponsor都好難，但就算冇錢嘅jobs/events都必須出席提高自己曝光，而第一年嘅新人，通常都特別多呢啲活動，好多時就搞到做兼職又冇時間，但又冇錢，唯有問屋企人或朋友幫忙啦~~
而我識嘅呢位男新人就係咁嘅情況。所以我就決定幫佢，而幫佢最直接嘅方法當然係錢(每月基本生活費﹑服裝費﹑飲飲食食…)，但其實除左錢，我仲有幫佢好多其他生活/工作上嘅野，例如幫佢拍朋友心口搵sponsor，介紹多啲圈中人或一啲公司老板佢識…等等。但由開始幫佢，佢就開始變，佢自己就話，越熟嘅朋友，佢就越唔會修飾，所以講野會好直，有時可能hurt到人，但都係出自真心…。但我其實冇介意佢嘅所謂「真性情」，但佢對我嘅態度，有好多時根本係嫌棄說話亦涼薄，完全係有事鐘無艷嗰種。當佢有事要我幫手前，就會多啲msg/電話黎，有多啲時間傾下計，或者見下面，但無事無幹，就打比佢都阻住佢，send msg就一句起兩句止。為左呢啲事，我地不停嗌交，但每一次我都心軟，又再幫佢。
前幾日我地又嘈，其實嘈之前兩三日我先幫佢找左條數。今次佢話以後都唔洗我再幫 (其實以前都有講過，跟住就真係有兩個月左右冇問我借錢，但跟住又好返，就即刻借條大數~~)。佢近來多左人識，因為佢有首歌喺網上竄紅，所以有錢嘅jobs亦多左，係因為咁，所以佢覺得以後都唔洗我幫? 當然佢喺講呢句野前，都冇認自己有乜唔啱，或對我有乜唔好，佢一直以黎都講到自己好赤子之心，係我衰啫，又要幫人，又要要求人點點點…等等。
我真係好想將呢一年嘅事原原本本咁公開，例如我地嘅所有msg/私信…等等，一字不漏咁公開，等其他人評評理，究竟係我心懷不軌定係佢別有用心? 但諗深一層，我當初day 1幫佢時，係完全當佢係親細佬，本著對佢好為佢前途著想嘅心，如果到左今日，我公開哂呢啲野，而有可能影響佢星途，咁其實咪有違我當天所想? 但唔做，我又好不忿，我真係比呢個人呢件事屈得好辛苦，究竟應該點算好?...
發表於 
返回列表
