本帖最後由 oguh 於 12-9-6 16:17 編輯
秘密
不知道大家對另一半有沒有秘密，兩個人更親密，係咪點都有一D難以啟齒既事？或者一D永遠都唔可以比對方知既事？知道左會好大影響？
有位舊同事，佢年紀比我細五、六年左右，但大家都好投緣，所以離職後都一直做到朋友。有一日，佢約我食lunch，見面時佢話：「今日其實唔係想同你食飯，其實想你陪我去睇醫生。」我有D緊張，問佢咩事，佢話佢懷疑自己有BB。
Lunch time佢約到一個相熟既婦科醫生，我陪佢去睇，然後大家又匆匆返各自公司做野。之後證實左佢係有左BB，我仲恭喜佢。
之後，佢又約我食lunch，今次我問：「係咪真係食lunch先？」佢話：「其實唔係食lunch，想你陪我入院。」下？入院？原來佢已經book左私家醫院要做流產手術。
由證實懷孕，到入院當日，應該都無一星期。我同佢見面時，第一個問題係：「你諗清楚架喇？」
佢實在地回答：「非常清楚，非常肯定。」以我了解，佢性格剛強、理智冷靜，一向非常清楚自己要乜，做事亦都非常積極進取。所以，當佢咁答我時，我都知道佢下定決心，而且唔會動搖。我亦都非常清楚自己作為朋友既身分，唔應該多事，佢已經係一個成年人，有自己決定同計劃。
竟然lunch time陪人入院，我真係第一次，同埋心情都莫名緊張，因為始終係手術。佢話，黃昏時可出院回家，第二日已係weekend佢可以休息，咁佢都係只需請半日假去處理，星期一應該可如常返工。我問佢，有無話比屋企人知？佢話，緊係無！唔想屋企人擔心，今晚返到屋企仲要扮無事添；咁我又問佢，洗唔洗叫男友來接佢出院，佢瞪大眼望住我，好緊張咁同我講：「千祈唔好同我男友講呀，佢完全唔知我有BB呢件事。」
我個心當下沉左一沉，因為我都間接地認識佢男友，都係舊同事但唔同部門無咩接觸過，但印象都係一個好男人，唔似花花公子玩玩下。連男友都唔知？
朋友嘆一嘆氣解釋：「我同佢係認真，準備過多一兩年結婚。但依家，我同佢都係事業最需要博殺時期，根本無時間去照顧一個BB，同埋我地經濟上都未ready去組織家庭，太多未知之數，絕對唔係好既timing，所以我先單方面作呢個決定，我唔想煩到佢。」
或者，有人唔會認同佢既做法。老實講，我來自一個天主教家庭，更加難接受。但我同人做朋友，從來都唔會批判佢地，彼此一定要互相尊重；而我知道，佢剛強獨立硬淨到無敵，其實佢作出呢一步，已經代表佢願意承受日後既後果，日後點都好，一切都係佢既選擇，我唔敢講對佢男友公平與否，呢D野都係佢地兩個人之間既事。果一刻，大家默默無言，我同佢辦好入院手續之後，佢道謝之後叫我快D走唔好遲返公司，我緊緊握住佢既手，叫佢如果需要人接佢出院就打比我。
當然，硬淨既佢，當日無打比我，過左兩日我打比佢問候佢，當時佢支支吾吾咁，原來男友係身邊唔方便講野。日後，我無再提起呢件事，佢地之後真係結左婚，仲生左兩個細路。
呢件事，我忍左好耐一段時間都無同Bruce講，直到某日我突然諗起忍唔住同佢講，身邊有個朋友發生左咁既事。佢聽完，第一個問題係：「最後個男人知唔知呢？」
我：「唔知佢知唔知，我無問，可能一世都唔會知架。」
佢：「如果佢知道，一定hurt到極點，因為事情已經無可挽回。」
我：「如果我都有呢D秘密，你想唔想知？」
佢按一按心臟個位，講：「你趁我未心臟病發，快D同我坦白。」
我：「其實我十六歲時.......」
佢好驚咁睥住我。
我：「十六歲時，我做左變性手術。」
佢呼一口氣：「起碼手術成功，放心，我唔會怪你。」
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
, 要等小朋友大個先有机會計劃.... 
返回列表
