首先唔好用外國人去限死晒所有可能性，年齡亦唔可以判一個人死刑，
根本咩地方人都可以係玩家，咩年齡都可以係殺手，來自唔同國家，
文化差異點都有，但同係香港一個住西灣河一個住牛頭角又冇咩？
冇兩個人兩個家庭係完全一樣，當然竹門對竹門木門對木門會容易相處D，
不過如果一段關係要猜要度的話點都死。樓主有咩唔清楚最好就係當面問，
如果係驚問完對方走的話，你已經俾佢食住，要抽身都唔係話咁易，
公平D去處理，樓主要開心見成去同對方傾下，講清楚你嘅期望，
你嘅感覺、不滿一概要出聲，再估下估下，你唔會開心，對方又唔知，
可能佢會以為而家大家都OK，未到時機大家再進一步都未定。
好多感情關係只要有一方唔信任就好難再行落去，個男仔俾唔到安全感你，
你又俾唔俾到信心佢？感情係相向，佢未必係你Mr. Right，
你都未必係佢Mrs. Right，對感情驚驚青青嘅態度，就算俾你地修成正果，
以後漫漫長路幾廿年點過？男人唔同女人，溝通方式同對事物嘅態度都唔同，
你以為好重要嘅，男人可能冇留意，收收埋埋只將自己最美好嘅一面展現出嚟，
咁樣對待一段感情好唔健康，正確咁俾到對方知道你嘅想法、不安係好緊要架。
至於Dating定義，你地冇共識，而家去怨係於事無補，唔明就問到明，
講真好多嘢你情我願，冇Dating呢個過程又點進入in a relationship？
老外喺中國人眼中係好隨便，但呢個係以前嘅觀念，好多老外可以好傳統，
反而而家幾多華人左右逢源？兩個人溝通得到就唔存在種族問題。
花旗太太生活在花旗國，留意時差，你問我未必即時答到。
）
發表於 
我是一隻喵
<br>
返回列表
