親子旅遊 今日: 13 | 主題: 161271

積分: 20339

1^#

發表於 16-10-17 11:41 |只看該作者 |倒序瀏覽 |打印

次次去旅行喺呢度攞唔少料，基本上呢度D jm有問必答，好helpful。今次覺得都應該回餽吓，有交流大家計劃去旅行時都容易好多。

我都係簡單講吓一D我認為值得各jm參考嘅經驗，唔會逐日講行程了，不過如果有jm有興趣想知，我都好樂意回答。

交通方面，我七日全包車，因為一行十人有四個小朋友，我哋又多數去D遠嘅地方，所以選擇咗包車。頭三日好好彩，book到呢度好多人推介的劉先生。劉生真係好交帶，好好人，未出發前佢已經幫我攪掂好多嘢，在我計劃行程時有問必答，仲幫我預先買好某D入場卷，book好時間。所以，我認為佢唔止係包車司機咁簡單，佢基本上係一個好稱職嘅導遊+司機。所以，作為司機佢可能價錢唔係平，但佢一身兼多職就絶對係物有所值。

今次行程，尾後的三日book唔到劉先生，也book唔到呢度D jm都有推介的遲先生，只好膽粗粗用ctrip book包車。呢個真係有驚喜，原本我真係覺得唔好抱咁大期望，因為價錢真係好抵，抵到連劉生都唔知佢哋點生存。我其實都有D擔心，所以都嘗試過想book香港公司代理嗰D包車，不過搵咗一間，佢要我先入錢，之後先會答覆我所有其他資料，我感覺佢根本同ctrip大同小異，都只係一個agent，搵韓國嗰邊的包車公司，任意派一個司機而已，所以最後都係決定用ctrip。Ctrip其實由頭到尾都跟得好好，由我喺個app到book包車開始，所有嘢都好清楚，基本上一book已確認我個訂單，同日已經知道邊個司機會接我，比埋聯絡資料我。出發前一星期我已和司機在wechat聯絡，個司機一直好交帶，當然無劉生咁好，但都算係有問必答。我先book咗一日，想睇吓佢好唔好先再決定尾後兩日用唔用佢。結果個司機好好，唔止車我哋去目的地，仲會帶埋我哋落車直至搵到個入口，仲幫我哋同韓國人溝通買票，確保我哋明晒先離開，一wechat佢我哋將會離開，佢即回覆，而且一出去就見到佢，會帶我哋去停車的地方。停車場費用佢係包埋，但因為佢真係好好，我同佢講我會負責返。

我最後一日帶咗小朋友去kidzania，我同工人姐姐帶四個小朋友入去，其餘媽媽就去shopping，我同小朋友在裡面玩咗大半日後，就join埋其他媽咪shopping，本來我諗住shop完親自去kidzania接返工人姐姐同小朋友，但司機話其實路程都遠，咁樣我會好趕。於是佢話佢可以去接返小朋友同姐姐，直接返酒店會合。嗰日小朋友玩到唔願走，司機叔叔由7:50坐喺kidzania門口等到差不多8:20分小朋友先出來，(kidzania原本8pm close，但唔知點解佢哋好好人，見我哋D小朋友好想玩埋一個job，佢哋竟然超時比我哋D小朋友玩埋佢

)。司機叔叔好好人，一路帶住工人同四個小朋友去停車場上車，我仔仲話司機叔叔好鍾意同佢傾計。

呢次ctrip訂包車真係喜出望外，價錢平，服務好。我諗book Ctrip都係講彩數，我今次就好幸運。我朋友今次旅程都through Ctrip book咗一程接機，但經驗就好差，個司機遲到，佢等咗二十分鐘先見到佢。仲要唔係放低佢喺酒店門口，而係要佢拖住行李同兩個女行多一條街先到嘅地方放低佢。

講完交通，講吓酒店。我今次係住Sheraton D cube，呢間酒店優點係房大，夠新，床好舒服，廁所好大好夠用。佢樓下有大型商場，有food court。不過，我唔推薦住呢間，因為交通真係唔太方便，其實佢樓下就係地鐵，不過我地因為包車無坐過，但如果搭車去旺區，如明洞、東大門等就幾遠吓，花好多時間。原先我係諗住我哋多數去得遠，少去旺區，所以先book呢間，但原來好多媽咪夜晚都想去shopping，咁呢間就真係好唔方便。而且仲有一個問題，佢個設計成日要轉lift，感覺好麻煩。酒店服務係算殷勤，但唔係細心。我仔生日，佢哋幫我預備咗蛋糕，但生日卡係全部寫咗祝我生日快樂，而唔係我仔。仲有我三人住一間房，每日只比一條大毛巾我！

景點方面，最開心係去Rail bike+ATV motro同小型賽車。劉生幫我哋搵嗰間ATV motor係唯一會帶住客人出去上山下水的，有一條特定路線，會讓你可以感受呢種越野車的樂趣，又唔會太難，但又有刺激感。小型賽車小朋友好鍾意，我去嗰日完全無人，包場玩，好正。劉生知我哋團中有D小朋友好多嘢唔食，所以幫我哋搵咗一間喺南怡島嘅日式西餐廳，食物好味，環境唔錯，小朋友好開心。

此外，劉生幫我哋book嘅坡州牧場體驗好正，環境好warm，D韓國阿朱媽好親切。我哋整咗芝士，自制pizza，好好味。仲有整雪糕，擠牛奶，餵牛，同小狗小羊玩。佢仲有一個好靚嘅小花園，有鞦韆玩，個景好靚，小狗自由喺花園走，小朋友唔捨得走！影出嚟D相好靚。坡州之行我哋有去one mount冰雪樂園，呢個地方，講真，如果唔玩或無得玩雪橇狗拉車，係唔值得一去，因為真係好細，同埋好似就快執笠咁。個溜冰場quality好差，好難溜。不過，雪橇狗一出場，我哋就覺得咩都值返曬。狗狗拉車其實都算好快，小朋友覺得好刺激，佢哋又會比最乖嗰隻狗狗同小朋友玩，比小朋友拖。所以，最後呢個遊玩點都算合格啦。因為狗狗拉車真係好難忘。

我哋有去智勇迷宮同poo pooland。智勇迷宮幾好玩，小朋友好鍾意，大人就.......三個字︰好辛苦！

poopooland我個人認為不太值得去，作為去開嗰頭的副景點就ok啦，不過我唔推薦，幾失望。可能愛來魔會好D，但我哋無去到。

Everland又係一個失望景點，多人到嚇死我，但我去嗰日係星期二，唔係佢哋假期，但一車又一車的旅遊巴，再加埋唔知點解好多學校去，所以好好好多人！我哋玩咗兩三樣嘢就想走，D遊戲亦唔係咁好玩，但要排餐死！好失望。我原本係plan去首爾樂園的，但同團其他媽媽覺得Everland出名D，想去吓，於是就去咗，點知多人到咁。原先我選擇首爾樂園，係我做過吓research，嗰度D嘢雖然係舊舊地，但應該比較多嘢啱八歲小朋友，咁今次無去到，唔知會唔會好過everland。

首爾Kidzania預咗難溝通，不過小朋友都ok。我建議大家選擇下半場先入去，因為上半場好多學校帶學生去，好逼人，每個job要等好耐。但下半場即三點半開始，D學校走晒，玩得好舒服，唔洗點排。雖然溝通上有困難，但見到佢D職員都盡力溝通，我哋D小朋友都樂而忘返。佢有D jobs都幾得意，例如sleepng lab，零食工廠等，感覺上佢D jobs 嘅種類係多過新加坡。

十月首爾嘅天氣好perfect。今次報告住咁多先，希望幫到大家！

0 0 0

私人傳訊

fat媽

子爵府

積分: 10718

2^#

發表於 16-10-17 11:50 |只看該作者

私人傳訊

積分: 20339

3^#

發表於 16-10-17 12:13 |只看該作者

可以補充吓食嘢方面。

由於我哋一行十人有四個小朋友，其中有小朋友好偏食，所以好難就到大家周圍去試出名或地道的韓國菜。今次我哋就只係試咗馬場洞韓牛同埋橋川炸雞呢兩樣比較多人去韓國會試嘅食物。

馬場洞韓牛係好靚，D肉一望就知，好似和牛咁，好肥好多雪花。劉生帶我哋去嗰間燒烤好企理，我哋揀好牛肉就上去燒，好食又抵食。我個人嚟講比較鍾意美國牛，覺得肉味濃D，但同團的媽媽都覺得韓牛正！

橋川炸雞我地買外賣，返到酒店仲係好好食，我哋試咗唔同味，講真全部都好食，個人最鍾意係蜜糖。

另一個比較驚喜嘅係喺kidzania裡面，有間快餐店，已唔記得個名，係喺Rock climbing後面的。嗰間D炸雞竟然係好好味！即叫即炸，好juicy，去開可以去試吓！

私人傳訊

vv518vv

伯爵府

積分: 19987

虎到金來勳章親子王國15週年勳章

4^#

發表於 16-10-17 12:27 |只看該作者

aidan08 發表於 16-10-17 11:41
次次去旅行喺呢度攞唔少料，基本上呢度D jm有問必答，好helpful。今次覺得都應該回餽吓，有交流大家計劃去 ...

可否講包車個費用幾多? CTRIP個網係邊喥搵有包車資料呢? 因為上去睇只係訂酒店資料.

私人傳訊

積分: 20339

5^#

發表於 16-10-17 12:27 |只看該作者

我哋有個早上book咗滑雪教練在playdoci室內滑雪場教小朋友三個鐘頭的ski。由於當中其實有三個小朋友已經有滑雪經驗，在加拿大及二世古滑過雪，唔知係咪因為咁，佢哋覺得唔太好玩。個滑雪場其實好細，無咩嘢好玩，雪道亦只得好少。我仔咁鍾意滑雪都話唔好玩。反而佢外面有個小小的playroom，我哋比咗六十蚊港幣for兩個小朋友玩吓，佢哋竟然比我哋四個小朋友一齊玩，睇佢哋個4d小型戲院，仲放咗三套戲比小朋友睇，佢哋睇到好興奮，係咁大叫，反而佢哋覺得嗰個好好玩。

私人傳訊

ulaula

積分: 1943

6^#

發表於 16-10-17 12:30 |只看該作者

請問馬場洞韓牛有鋪名嗎？

私人傳訊

積分: 20339

7^#

發表於 16-10-17 12:30 |只看該作者

本帖最後由 aidan08 於 16-10-17 12:32 編輯

vv518vv 發表於 16-10-17 12:27
可否講包車個費用幾多? CTRIP個網係邊喥搵有包車資料呢? 因為上去睇只係訂酒店資料. ...

我book咗黃包車，十小時市內人民幣735。市外好似加400。

要download佢個app，for 內地人用嗰個，即簡體字而唔係英文，唔好download for 外國人用嗰個ctrip app。
首頁揀專車.租車。

私人傳訊

積分: 20339

8^#

發表於 16-10-17 12:31 |只看該作者

ulaula 發表於 16-10-17 12:30
請問馬場洞韓牛有鋪名嗎？

唔好意思，我無記低店名，係劉生帶我哋去的。

私人傳訊

winky88

積分: 2039

9^#

發表於 16-10-17 19:12 |只看該作者

回覆：aidan08 的帖子

請問坡州的體驗牧場可以給我資料嗎？謝謝

私人傳訊

HippoStore

積分: 4120

10^#

發表於 16-10-17 21:32 |只看該作者

劉生都有介紹牧場比我，請問你覺得好玩嗎？

親子王國已刪除閣下簽名檔內容，煩請自行檢視頭像、頭銜、暱稱，如帶有廣告或宣傳推介成份，應立即修改或刪除，否則可被封鎖戶口，謝謝合作。

私人傳訊

積分: 20339

11^#

發表於 16-10-17 21:44 |只看該作者

winky88 發表於 16-10-17 19:12
請問坡州的體驗牧場可以給我資料嗎？謝謝

坡州牧場我在找劉生前曾試過自己上網找資料，但真的沒有找到，結果是劉生幫我聯絡牧場及預訂。他們完全不懂英語，沒法溝通。地址我也是沒有的。不好意思！

私人傳訊

積分: 20339

12^#

發表於 16-10-19 08:27 |只看該作者

winky88 發表於 16-10-17 19:12
請問坡州的體驗牧場可以給我資料嗎？謝謝

劉先生給了我牧場的網址：
http://www.mosanfarm.com/

私人傳訊

積分: 20339

13^#

發表於 16-10-19 10:22 |只看該作者

本帖最後由 aidan08 於 16-10-19 10:24 編輯

HippoStore 發表於 16-10-17 21:32
劉生都有介紹牧場比我，請問你覺得好玩嗎？

我自己本身好鍾意去牧場，去親邊到玩我都會嘗試安排牧場行程，所以個人嚟講我覺得好玩。呢個牧場本身一向做開D體驗活動，所以佢哋好熟手，我哋去嗰日都撞到一班幼稚園學生喺度整雪糕。牧場唔算好大，個farm house好warm好有特式，pizza整出嚟好好食。養牛嗰個地方唔係話好靚，但小朋友就好鍾意餵牛，尤其是用牛奶樽餵小牛。仲可以嘗試擠牛奶。佢地有個幾靚嘅小草地花園咁嘅地方，養咗D動物，有兔仔、鹿、小狗、小羊。有個鞦韆，有D小狗隨處跑，有間好靚嘅小屋，我哋去嗰日天氣好好，影出來D相好靚。嗰度D阿豬媽都好親切。我今次有四個小朋友，全部七、八歲，個個都唔捨得走。我見D幼稚園小朋友都玩得好開心。

我去過飛牛、六甲山同埋澳洲的牧場，其實個個各有特式。你問我我覺得個個都好玩，本身太鍾意去牧場。

私人傳訊

yuyu.c

水晶宮

積分: 52627

醒目開學勳章畀面勳章環保接龍勳章

14^#

發表於 16-10-19 10:39 |只看該作者

回覆：分享--首爾十月自由行

行程好豐富好好玩咁。

私人傳訊

elsamaman

積分: 4152

2024年龍年勳章 Xmas吸收勳章最關心BB問題熱投勳章畀面勳章

15^#

發表於 16-10-19 11:57 |只看該作者

aidan08 發表於 16-10-17 11:41
次次去旅行喺呢度攞唔少料，基本上呢度D jm有問必答，好helpful。今次覺得都應該回餽吓，有交流大家計劃去 ...

想問你帶工人去, 點整個visa, 要咩文件架?

私人傳訊