興趣嗜好

跳至

首頁
34567...33

尾頁
   6


別墅

積分: 733


發表於 17-3-31 16:51 |顯示全部帖子
長開抽濕機


大宅

積分: 2052


發表於 17-4-1 10:48 |顯示全部帖子
本帖最後由 cforchat 於 17-4-2 13:00 編輯

自從睇咗"我的野蠻女友", 我就好鍾意全智賢, 到而家都冇變心.

鍾意佢自然不造作, 鍾意佢甜美清純, 鍾意佢率性可愛...... 所以每逢有佢演出嘅作品都唔會錯過.

最近剛睇完"藍海傳說", 講真, 都幾失望. 除咗劇情平平無奇, 全智賢喺劇中好似行行企企, 雖然有靚仔李敏鎬陪襯, 但都冇乜大作為, 如果唔係為咗捧全智賢場, 我係唔會有動力睇晒成套.

對上嗰套"來自星星的你", 迴響就大得多嘞, 題材吸引, 有外星人混入人類當中生活喎, 梗係想知佢會做啲乜有咩搞作啦. 而全智賢喺劇中身份高貴, 集集穿著得花枝招展, 次次都會期待, 唔知佢今集又會換幾多套服飾呢. 最最最重要係, 大部份追看嘅都係女性觀眾, 當見到男主角每每喺女主角遇險時就奮不顧身及時趕往保護, 又因為身為外星人, 好多事都能得心應手就滿足女主角所求, 試問身為女性嘅我哋, 點可能唔幻想+希望自己身邊嗰一位係疼自己又富甲一方又有超能力又靚仔嘅都敏俊吖.

相反, "藍海傳說"嘅男主角只係一個普通人, 現實中大把啦, 況且仲要女主角保護㖭, 梗係遜咗啲啦, 所以就算幾靚仔都唔多想吼佢.

本來, 以同性相斥嘅定律, 千頌伊應該不被女觀眾接受, 話晒係情敵嘛, 但係因為愛屋及烏, 連帶亦愛護佢, 加上視佢嘅衣著打扮為潮流指標, 所以星星熱潮久久不散, 男女主角嘅人氣長時間高踞榜上.

星星雖然過咗好耐, 但而家間中仲聽到有人依然傾慕都敏俊, 至於可憐嘅許俊宰, 已悄悄湮沒於藍海中.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-2 13:07 |顯示全部帖子
專科門診輪候時間真係天長地久, 由聖誕排到佛誕都未排到.

唔通諗住有咁耐時排咁耐, 等你一個唔該等唔切而病發, 連醫藥費都省回?
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-3 10:37 |顯示全部帖子
本帖最後由 cforchat 於 17-4-3 10:40 編輯

嚟緊將有幾日長假期, 好多人已經整裝待發, 準備外出旅行.

對於我嚟講, 唔係有太大意欲去旅行, 可能聽得太多酒店嘅鬼故, 所以每到入黑準備返酒店, 下意識就好抗拒, 雖然唔係一個人瞓, 但都會患上入住酒店恐懼症.

如果所下榻嘅酒店外觀新淨, 內裡燈火通明, 我會比較安心, 覺得光猛與否同有冇鬼係掛鉤, 假如陰陰沉沉, 未見鬼已驚定先, 更遑論要喺度住一晚甚至幾晚. 但實際上係, 就算幾富麗堂皇美輪美奐設計嘅十星級酒店, 一樣有機會見鬼.

假如去旅行唔駛住酒店嘅話, 我係非常非常鍾意去旅行, 每日出發到唔同景點觀光購物, 又可以品嚐好多唔同特色美食, 不知幾愜意, 諗起都開心. 不過一諗到唉晚上又要眼光光心慌慌唔知瞓唔瞓到覺, 當堂被不安掩蓋晒一切.

又, 旅行對我嚟講, 最開心係出發前期待嘅心情, 同埋回程前唔駛再住酒店嘅放鬆心情. 既然只得兩種心情, 咁不如唔去好過, 費事貼錢買難受.

所以, 人哋去旅行係叉電, 我去旅行係放電, 幾晚嘅惶恐不安, 已將我所有能量耗盡, 嘥料!!

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-4 12:39 |顯示全部帖子
清明時節雨紛紛.....

今日陽光普照, 與以往細雨紛飛不一樣.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-5 10:03 |顯示全部帖子
喺食肆等位, 係一件痛苦嘅事, 有籌輪候還好, 只需坐定定等叫號碼就可入座, 如果要自行搵位, 有時真係寧願買外賣好過.

我又眼光奇差喎, 好多時見到某張枱杯盤狼藉, 似乎應該就快埋單, 點知被告知仲等緊人入席, 有排未走住. 好啦, 見到某枱嘅食客一個二個剔緊牙, 以為又好快走啦, 點知陸續仲有食物送到...... 擾攘咗一大輪至正式入座, 心力交瘁!

仲有, 企喺人哋後面眼金金睇住人哋大擦特擦, 自己仲未有得食, 煎熬!

所以, 假如要我搵位, 我一係就晨咁早趁仲有大把位任揀就到達, 一係就索性唔出席, 費事受苦.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-6 12:25 |顯示全部帖子
通常夏天至會多蚊患, 但係我屋企就整個冬天群蚊亂舞, 唔知關唔關附近有渠務工程事呢.

本來, 蚊群出沒, 無非都係為搵食, 所以有時見佢飛過, 我都勸佢過主, 唔好畀當家見到, 否則一定難逃魔掌. 但係佢哋總係夜晚至空群出動, 既然出嚟偷食就不動聲色啦, 咁就算第二朝瞓醒發現身體多處呈現斑駁被叮咬嘅紅點都冇仇報嘛, 弊在佢哋硬係鍾意不斷喺耳邊盤旋而發出聲響, 喺夜闌人靜嘅時候, 無疑就造成滋擾, 好不煩人, 試過一晚集結咗十幾隻, 搞到當家成晚攞住支蚊拍如撲蝶般撲來撲去, 冇覺好瞓, 而我就大被蒙頭大覺瞓, 由得佢充當一晚守護將軍嘅角色.

若然我未入眠, 耳邊傳來蚊聲滋滋響的話, 咁對唔住都要做低佢, 被襲事少, 被擾先至緊要, 冇覺好瞓我會抓狂㗎.

當拍下蚊嘅同時, 都會唸一句阿彌陀佛, 為死去嘅蚊子超渡, 咁算唔算係一啖砂糖一啖.....?



春有百花秋有月, 夏有涼風冬有雪, 若無煩事掛心頭, 便是人間好時節.


珍珠宮

積分: 42185


發表於 17-4-6 12:28 |顯示全部帖子
其實昨晚已經開始濕

天氣唔好我用抽濕機乾衫,不大受影響


大宅

積分: 2052


發表於 17-4-7 17:44 |顯示全部帖子
其實都唔係太潮濕, 不過當家話想飲去濕茶, 就應佢要求煲冬瓜去濕湯啦.

當家好鍾意飲一啲清熱飲品, 每逢經過涼茶舖, 佢一定飲杯廿四味或食盅龜苓膏. 曾幾何時, 我哋都好鍾意飲崩大碗, 以前有個相熟嘅伯伯喺街邊販賣崩大碗, 每見佢一次就光顧一次, 清清甜甜冰冰凍凍, 飲完有種清涼感覺. 不過後來伯伯退咗休, 就再冇飲過崩大碗咯.

傳統涼茶舖已經買少見少, 加上有時又未必經過, 況且價錢都唔算平, 所以而家幾乎冇再喺街上飲涼茶, 自己煲較划算, 十元八塊一大煲, 功效其次, 最主要係當家可以飲得盡興.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-8 09:53 |顯示全部帖子
平時學車, 教車師父會坐喺隔鄰指點, 但係掛住學字嘅電單車, 卻只得一個人駕駛, 咁點學呢? 邊個教呢?

又, 考車嘅時候, 考牌官亦會坐喺側邊評核, 但係電單車點考呢? 唔通唔駛考? 咁憑咩發牌? 唔通要考牌官坐喺車尾評分? 唔係下話? 考牌官予人嘅印象好莊嚴㗎喎, 坐車尾雙手環抱學神咁搞笑嘅畫面, 好唔型啫.

心中呢個疑問, 直至最近至解開, 原來考試者都係自行駕駛, 考牌官就另駕電單車緊隨其後視察..... 咁就差唔多, 冇破壞考牌官喺我心中肅穆嘅形象.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-9 14:04 |顯示全部帖子
我最喜歡胡清藍的歌 : 兩個世界

中段嘅過場音樂, 令我同時亦愛上"canon"呢首樂曲.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-10 08:39 |顯示全部帖子
偶然喺youtube睇到一段車廂罵戰, 居然發現舊同事嘅身影.

正常情況下, 見到人哋嗌緊交, 都會將注意力集中喺事主身上, 八卦一下嘛. 但舊同事全程只顧低頭㩒手機, 連間中應該抬頭望吓發生咩事嘅舉動都冇, 有冇咁不聞世事呀?

一係呢, 佢扮作不經意地㩒手機, 查實係正在作直擊報導, 將罵戰內容以文字或錄音方式傳送畀對方知道.

哈! 如果真係咁, 難怪佢連頭都唔抬起啦, 費事被事主發現, 惱羞成怒飽以老拳對待, 到時明明係路人甲, 卻變咗受害人就無謂啦.
春有百花秋有月, 夏有涼風冬有雪, 若無煩事掛心頭, 便是人間好時節.


別墅

積分: 679


發表於 17-4-10 11:58 |顯示全部帖子

回覆樓主:

前兩日洗條厚巾都吾乾

點評

ic34    發表於 17-4-10 13:31


大宅

積分: 2052


發表於 17-4-11 14:25 |顯示全部帖子
香港地, 某啲司機嘅駕駛態度真係不敢恭維.

就以我遇到嘅為例 :

稍為揸慢少少就被後面車輛狂響咹, 到有機會超前, 兩車並排時就向你媽聲連連, 都係相差幾秒啫, 超咗前又快得幾多吖.

天雨路滑, 交通安全守則都有教, 要與前車保持一段距離, 但往往被後來車輛躡入前面空間, 完全破壞我原意, 並冇拉長到距離.

路面因擠塞而行車緩慢, 停吓郁吓, 一時重手扭多咗啲啲, 與隔離線架車貼近咗少少, 即引來一副唔耐煩嘴藐藐兼眼睥睥嘅臉孔, 就算沙冧咗都唔賣帳.

打燈準備切線, 稍一遲疑唔夠果斷, 冇車會讓你切去佢前面......

所以, 我覺得喺香港揸車, 身手冇返咁上下快狠準, 好易有挫敗感.

不過有一樣要讚嘅就係, 一旦遇上前車正在進行駕駛考試, 平日幾冇耐性嘅司機都會乖乖跟喺後面唔會響咹催促. 話晒曾經都係過來人, 將心比己, 萬一後面有車響咹, 就會增加心理壓力, 可能影響臨場表現, 假如因而肥佬, 響咹位仁兄就罪過嘞.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-12 14:30 |顯示全部帖子
曾經與當家談論過, 假如有一日, 其中一個要走, 到底邊個走先好呢?

喺我角度, 自私咁諗, 最好我啦, 兩腳一伸一了百了唔駛煩咁多嘢, 幾好呀! 但係平心而論, 我嘅離去雖未至於令兩仔爺如世界末日般過唔到日子, 不過相信都要經過一段時間至適應得到. 唔係話自己重要, 而係一直將佢哋照顧周到, 幾乎衣來伸手飯來張口, 霎時間冇咗個阿四, 唔知二人要幾耐至能夠獨立.

況且, 多數女人較男人細心, 假如當家先我而去, 我仲可以以未亡人身份處理好佢身後事. 如果我走先, 兩父子實搞到一鑊粥, 到時怕且要晚晚報夢教佢哋呢樣點做嗰樣點做, 教得幾教冇耐性兼唔放心, 索性由棺材彈起身, 一於唔死住.

所以為大局着想, 我比當家遲走較好. 而輪到我走之日, 由於我會一切從簡, 無需任何繁文縟節, 吾兒就唔駛獨力承擔太多.

至於當家嘅結論係, 留喺世上嗰位, 一定會傷心難過, 與其令我傷心, 不如讓佢難過喎. 言下之意, 即係叫我死先啦, 正衰佬!

雖然佢講得合情合理, 好似好為我設想, 但點解我認住佢係想實現男人三大夢想 : 升官! 發達!! 死老婆!!!

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-13 14:40 |顯示全部帖子
一向鍾情麵包糕點, 不論中式西式, 一律都鍾意食.

有時嘴饞想食包, 咁啱見到雜誌刋登有關食譜, 就跟住照做.

食譜有高筋麵粉糖鹽酵母水等基本材料.....

喺我認知裡面, 麵粉就係麵粉, 邊有高低之分㗎, 可能高就靚啲, 低冇咁靚啩. 自己食唔駛咁講究啦, 之前買咗一包麵粉用嚟炸嘢都未用晒, 就攞嚟用埋佢啦, 都係麵粉啫. 至於酵母係乜東東呢, 慌唔係又係一啲化學嘢咩, 梗係唔落啦, 況且屋企都冇. 食譜指明要用焗爐, 斷估可以用光波爐代替, 一樣有焗嘅效果啫.

結果成張食譜, 除咗糖鹽水時間跟足之外, 其餘都欠奉.

登~ 登~ 登~ 櫈~ 第一次自己做嘅包終於出爐嘞, 好緊張呀!

外表, 與街上買嘅相差十萬九千里, 不過唔駛灰心住, 期待佢嘅內在美....

咬下去..... 不得了!

硬 !! 過 !! 我 !! 條 !! 命 !!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-14 10:27 |顯示全部帖子
冇工作嘅人, 對假期嘅敏感度好低, 完全唔記得今日開始放復活節假.

打工仔返工望放工, 放工望放假嘅心態, 無工一族已經冇呢支歌仔唱.

不過呢幾日假期, 對嗰啲放勞工假嘅人嚟講卻冇意思, 因為唔係被列入有薪假期, 除非自己攞假, 否則一樣要返工.

當初區分公眾假與勞工假嗰位仁兄認真要打籮柚, 大家都係打工仔啫, 點解有人逢紅日可以放, 有人就要視乎邊個紅日至有得放吖. 就算服務性行業紅日當天冇得放, 亦應該事後補回, 咁先至合乎人性化吖嘛.

假如全間公司統一制度, 一係公眾假一係勞工假, 咁齊齊要返工, 心理上都好過啲. 如果係某啲部門放公眾假, 某啲部門放勞工假, 咁眼見人哋部門烏燈黑火放緊假, 自己部門卻燈光火着搏緊殺, 內心一定不是味兒, 公司決策人應該設身處地顧及呢班人嘅感受.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-15 09:04 |顯示全部帖子
可能係天性使然, 大部份女人都會肩負照顧家庭成員嘅責任, 在家如是, 出嫁如是, 老來亦如是.

正因如此, 大部份男人亦慣性使然, 在家從老媽, 成家從老婆. 但係從得嚟, 佢哋又會有自己嘅一套喎.

一個家庭, 女人要扮演多個角色, 父母嘅女兒, 丈夫嘅妻子, 兒女嘅母親..... 每個角色都要恰如其分, 稍為過火, 彼此都會吃不消.

但係要做到面面俱圓又談何容易呢, 關心則亂, 往往由於過於緊張而不斷囉唆嘮叨, 本來出發點係為對方好, 可是到後來卻變成惹人討厭. 唉, 吃力不討好, 認真難做.

經歷過無數次不得要領後, 我而家一樣會盡自己本份, 不過唔會再好似以前咁, 因出於關心而強人所難. 當再遇到屢勸不聽嘅情況, 我同自己講, 唔好理嘞, 就當自己死咗冇眼睇, 由得佢哋鍾意點就點啦.

咁做好似好消極, 但唔係又可以點呢, 與其為咗各持己見搞到家嘈屋閉, 倒不如退下火線, 費事硬碰硬兩敗俱傷.

適時放手, 未嘗不是以退為進.


春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-16 09:52 |顯示全部帖子
天氣乍暖還寒, 稍一不慎就中招, 一個二個都病倒了.

本來病咗只係閒事, 按時服藥休息多啲好快可痊癒, 弊在有啲人條頸硬過石頭, 未完全復康就自行停藥, 搞到病情又翻發. 如是者反反反覆覆好吓病吓, 藥就食吓停吓, 結果擾攘咗成個月都未好, 自作病不可救, 活該!

其實係人間中都會病㗎啦, 所謂小病是福嘛, 唔明點解每次病親都會覺得自己係弱者, 寧願任由病情拖拉都唔肯服藥, 認真食古不化!

大哥! 唔好忘記你年紀已經唔細, 年少時人欺病, 而家病欺人, 唔認老係你嘅事, 身體機能唔一定要認同你.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2052


發表於 17-4-17 10:49 |顯示全部帖子
今朝起身望吓個天, 朦朧一片灰沉沉, 以為全日都係咁, 於是打消洗衫嘅念頭, 點知隔咗冇耐太陽就出來, 事不宜遲, 床單被袋即換即洗, 趁太陽未走晾曬多一陣得一陣.

老人家叮囑未食五月糉, 寒衣勿入櫳, 以前應該啱, 不過近年來氣溫不斷上升, 過完農曆年冇幾耐就開始熱, 春季短到幾乎冇咁滯就直入夏季, 所以未等到屈原先生嘅紀念日, 已逼不及待將冬衣收藏, 只留下一兩張薄氈以備稍涼時可以冚.

聽中醫師講, 有啲人習慣將棉胎晾曬完就直接收藏, 以為趁暖焗住可殺菌, 其實要攤涼至可以收藏, 否則到冬天取出嚟冚時會中暑. 雖然我唔明點解天冷仲會中暑, 不過一直都冇趁熱收藏嘅習慣, 所以是耶非耶就不得而知.
春有百花秋有月, 夏有涼風冬有雪, 若無煩事掛心頭, 便是人間好時節.

首頁
34567...33

尾頁

跳至
熱門主題
醒 世 文 ... 2 3 4 5 6 .. 45
你需要登錄後才可以回帖 登入 | 註冊