每段戀愛嘅開始階段都係熾熱的，大家對於充滿新鮮感嘅戀人都係帶住無限熱情，好想畀最好嘅野對方，出盡奶力都想對方開心同感受到自己嘅愛。但時間會消磨大家嘅熱情 ，會蠶食大家當初嘅心機。於是戀愛過咗一段時間，就會開始步入平淡嘅階段。
我相信無永遠嘅熱戀期，要永遠維持啱啱拍拖嘅熾熱去到八十歲，都實在太不可思疑，所以即使再愛對方都總有回到平淡階段嘅一日。
面對平淡階段，有啲人會無所適從，覺得對方好似唔再愛自己，覺得大家嘅關係好似走哂樣，好似失去咗一份動力。亦有啲人因為經歷過動盪嘅關係，更加明白平淡都係一種幸福。
兩個人都能夠學識享受平淡嘅關係，當然最好。不過無論處於邊一種情緒，都要記住拍拖再耐，都唔好忘記初心。唔好忘記當初選擇呢個人，堅持呢段關係嘅原因。雖然一齊得耐，好多嘢都發展成理所當然，又會睇通哂對方嘅所有缺點，所以更加唔好忘記最初一齊嘅理由。好多人就係因為太善忘，唔記得當初見到對方有啲咩優點，然後眼中就只淨下對方嘅一堆缺點⋯⋯
所以拍拖經過咗熱戀期就要偶爾提醒自己，諗下當初選擇呢個人嘅理由，你就會重新發現繼續走落去嘅動力。
發表於 
返回列表
