少年成長今日: 1|主題: 15847

收藏本版

發帖

返回列表

跳至頁

查看: 8424 | 回覆: 2

愛的家庭 [複製鏈接]

csir3290

子爵府

積分: 10923

1^#

發表於 19-2-3 11:49 |只看該作者 |倒序瀏覽 |打印

本帖最後由 csir3290 於 19-2-2 21:20 編輯

琴日同老婆慶祝結婚十週年紀念，其實都冇乜嘢特別慶祝只係同埋小朋友出街食飯。自從有咗呢兩個小朋友之後，時間好似過得特別快，眨下眼已經十年。回想呢十年我哋一家都過得好充實好幸福。我同老婆都相信要畀小朋友在一個充滿愛的空間入面成長對佢哋係最好嘅，所以我哋都好努力去經營你一個家，令小朋友感受到我哋對佢哋嘅愛。屋企係小朋友最先學習到點樣去愛人嘅地方，冇人可以代替父母去盡呢個責任。細路仔每一日喺屋企望住父母點樣相就係佢哋最初學習點樣去愛嘅源頭。

我曾經都講過其實我本身都一個脾氣大又冇乜耐性嘅人，但係自從做咗人老公同埋爸爸之後其實我自己都成長咗，更加明白發脾氣其實對大家都唔好，小朋友望住父母小小事就發脾氣佢哋會點呢？喺呢十年入面當然我同老婆間中都可能有一啲唔同嘅意見。其實仔女喺我哋身上亦都係學緊點樣去處理唔同嘅意見。如果仔女喺屋企見到嘅係誰大誰惡誰正確嘅態度嘅話，久而久之細路仔都會用呢一個態度去處理問題，咁對佢哋係咪好呢？以前嘅我可能會好堅持自己嘅意見，但係當自己越嚟越成長嘅時候會發覺其實大家嘅關係仲要過誰對誰錯。如果小朋友感受到足夠嘅愛佢哋就會產生足夠嘅安全感，咁我發覺佢哋做嘢都會有自信啲，亦都能夠放膽去嘗試唔同嘅嘢，因為佢哋知道無論佢哋成功定失敗父母都係愛佢哋嘅。愛並並唔係只係提供物質，有啲父母以為好努力去搵錢提供到細路仔好好嘅生活就係對小朋友嘅愛，但係越細個嘅小朋友佢哋越需要感受到父母喺佢哋身邊嘅愛。有啲家長關心細路仔學啲乜嘢，考咩學校仲多過關心究竟佢哋感唔感受到足夠嘅愛，咁又係咪好呢？
其實小朋友每日對住父母點會唔知佢哋關係如何同相處得開唔開心吖！我自己來自一個單親家庭，我好記得我一二年班嘅時候爸爸媽媽已經離咗婚，自此我同讀緊幼稚園嘅細佬就跟住爸爸一齊生活。喺我嘅記憶中父母一齊嘅時候我嘅回憶都係佢哋嗌緊交嘅場景，但係佢哋離咗婚之後我同爸爸一齊生活嘅記憶我就好記得好多我爸爸好錫我嘅畫面。雖然我係單親家庭長大，只係我同爸爸一齊生活但我完全感受到我爸爸好錫我同埋我細佬。雖然單親但我哋生活得好開心。所以我真係好唔鍾意聽到有啲家長話，兩公婆感情唔好成日嗌交但係因為仔女年紀仲細希望佢哋有個完整家庭所以就要忍唔離婚。其實分唔分開唔好攞仔女嚟做藉口，你話為咗仔女想佢有個完整家庭所以唔分開，但係仔女每一日望住父母咁樣嘅相處經常嗌交，喺咁樣嘅環境長大對佢哋好咩！講就好似為咗仔女好似好偉大咁，但係有冇諗過仔女係咪真係開心呢？仔女將來長大佢知道父母係為咗佢哋而搞到自己一路唔開心，就算唔開心都要繼續一齊咁仔女會點諗呢？係咪要佢哋內疚呢？我自己就係一個好好嘅例子，雖然父母分開咗可能唔係一個完整家庭，但係發父母分開咗之後各自都生活得開心，我跟住爸爸，爸爸都好錫我。我完全感受到佢對我嘅愛。媽媽雖然唔係成日見但係起碼我唔會見到佢哋成日喺度嗌交，到頭來大家都開心啲。

作為父母最大嘅責任就係要令到自己嘅仔女感受到愛，令佢哋學習到點樣去愛人，讓佢哋嘅成長在一個充滿愛嘅家庭入面係父母最大同最基本嘅責任。但係好可惜我眼見真係有啲父母只係生咗個小朋友出嚟，但係連呢個最基本去愛嘅責任都唔去盡，咁樣對個小朋友嘅成長係一個非常之嚴重嘅影響。