少年成長

跳至

首頁
1

尾頁
   0


子爵府

積分: 10859


發表於 19-9-22 10:07 |顯示全部帖子
每一朝早都會車阿仔阿女返學,眨下眼阿女已經五年班阿仔就已經三年班。望住佢哋細細個開始送佢哋返學唔捨得入學校到而家時間真係過得好快。記得細佬一年班入學嘅時候,朝朝早都要喊住入學校,喊咗成個月先冇喊,到而家眨下眼已經三年班, 但係依然冇變嘅就係兩姊弟每一次入學校門口之前,家姐都會鍚一啖而細佬除咗錫之外仲要攬一陣先入學校。除咗每一朝嘅攬攬錫錫之外,每一晚臨瞓都會同阿仔阿女講我愛你先至同佢哋熄燈瞓覺。有陣時會諗唔知呢一種關係會維持到佢哋幾多歲呢?好似係自己越嚟越在意佢哋會唔會同我講返我愛你。有陣時夜晚細佬顧住同媽媽傾偈,我同佢講我愛你都聽唔到嘅時候,反而係我一路喺佢側邊講我愛你講到佢回應我為止。

望著兩姊弟一路長大,雖然我哋之間嘅關係都仲係好親密,佢兩姊弟都好錫我同老婆。但有陣時總係會擔心唔知佢哋長大到幾時開始會同我哋冇咁親密呢!最驚嘅就係個關係會開始疏離。望住細路仔長大,時間真係過得好快,眨下眼咁兩個就好似由bb變成而家咁大個。所以我好珍惜每日同佢哋一齊相處嘅時間,睇住佢哋長大又好矛盾咁唔想佢哋大得咁快,唔想你咁快離開自己嘅身邊。最有感受嘅係以前細細個嗰時提起佢哋高年班要跟學校去宿營或者要跟學校去交流,佢兩個都耍手擰頭話點都唔會參加。但係到而家,家姐經歷過舊年跟學校去宿營,開頭唔係好願意勉為其難參加。到今年開始主動話想去參加交流,雖然好似不經意嘅一兩句說話,但係聽喺我嘅耳仔入面又好似好有感受咁,唔通阿女開始適應離開我哋嘅身邊?雖然都知道細路仔長大係唔可以改變嘅事實,理性上面亦都希望細路仔喺長大之中學會獨立學會照顧自己。但係喺感性上面總係希望佢哋永遠留喺自己嘅身邊,因為我哋之間嘅關係實在太緊密,所以特別唔捨得佢哋長大。之前有同老婆傾,開始都會諗下將來再大啲會唔會送佢哋兩個去外國讀書。我而家諗係一定唔捨得。驚萬一真係要送佢哋去外國讀書嘅時候自己唔知點面對同佢哋分開。 但係理性上面都提醒自己唔好諗咁多,做爸爸嘅只能夠盡量同佢哋珍惜每一日喺身邊嘅時間,唔好吝嗇講我愛你,要經常畀佢哋感受到爸爸媽媽對佢哋嘅愛。希望就算有朝一日將來佢哋要離開自己嘅身邊都仍然會感受住爸爸媽媽對佢哋嘅愛。

首頁
1

尾頁

跳至