吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 自由講場› 想同各位爸爸媽媽講嘅說話...

自由講場今日: 273|主題: 1300948

收藏本版

發帖

返回列表

跳至頁

樓主: 一齊行落去

積分: 49

1^#

發表於 20-1-12 23:01 |顯示全部帖子 |倒序瀏覽 |打印

本帖最後由一齊行落去於 20-1-13 14:09 編輯

我成長喺一個唔係好健康嘅家庭，以下係我想同各位爸爸媽媽講嘅說話...
可能有啲長，希望大家耐心睇完。

1) 小朋友好需要你嘅欣賞去建立自信心，並學識欣賞自己。
將來社會上會有無數批評同指責佢嘅人，佢唔需要咁早就經歷呢一切，
佢需要你嘅欣賞嚟建立將來面對殘酷社會嘅保護網

2) 你可能已經忘記咗小時候嘅你。加數減數對現在嘅你嚟講當然好容易，
但對於小朋友發展中嘅腦袋嚟講，每一樣看似簡單嘅嘢都需要學習，
請你喺佢做錯時唔太炆，比佢知道錯唔緊要，爸爸媽媽會陪住佢。
到佢腦袋發展到某個位，佢總有一日會學識，不是嗎？

3) 關係破壞咗，即使修補都永遠有個裂痕。
即使幾嬲都好，唔好講傷害性嘅說話（e.g., 點解你咁蠢），
亦唔好打小朋友，要打用手打（佢有幾痛你又有幾痛），亦唔好打面。
街外嘅人令你嬲，你都唔會去傷害佢，咁點解你會選擇傷害自己嘅小朋友？
為教佢定為發洩？我教你煮飯，你忘記步驟／態度差，我打你得唔得？

4) 小朋友對你嘅情緒好敏感，能夠氹到你開心係佢哋最大嘅成就。
亦因為咁，作為大人嘅你要好好照顧自己，盡量避免將外面嘅包袱帶回屋企，
同時你亦可以考慮坦白同小朋友講（e.g., 媽媽今日工作有啲唔開心，所以想休息下，同唔到你玩)。唔好以為你唔講，小朋友就唔知道，你嘅情緒係直接影響緊佢嘅情緒。

5) 無論點，小朋友都係無條件地愛佢嘅爸爸媽媽。
同樣地，希望你都可以比小朋友感受到你係無條件地愛佢，唔係要幾叻幾乖先錫

6) 最後，It's easier to build a strong child than to repair a broken man（Frederick Douglass）你希望小朋友將來用童年治癒一生，還是用一生治癒童年？

0 0 0

私人傳訊

一齊行落去

洋房

積分: 49

2^#

發表於 20-1-13 00:22 |顯示全部帖子

本帖最後由一齊行落去於 20-1-13 00:29 編輯

爸爸媽媽未夠20歲就帶我嚟咗呢個世界。
可能因為佢哋未準備好做父母，亦唔太鍾意小朋友，
所以有段時間我都係由唔同家庭照顧。

後來佢哋終於帶我返屋企，不過無諗過嗰時先係惡夢嘅開始 :(
媽媽一對住我就好炆，每日幾乎都有新方法對付我: 扯頭髮、撞我嘅頭落牆、用刀、喊就用膠紙黐住我個口。而爸爸唔係好理會屋企，亦唔理會我，間中都會同媽媽一齊打我。

細個嘅我唔曳，讀書成績亦唔錯，喺學校甚至係一個開心果。
不過回想番，小一小二時我已經有少少情緒問題，試過喺屋企想跳樓，試過衝入廚房拎菜刀，因為當時嘅我只可以透過「傷害自己／父母」嚟保護自己。小三之後，我有能力控制自己嘅情緒，唔再做衝動嘅行為，不過就變咗「解離」嘅情況更嚴重，每日幻想自己屋企有幾好幾開心，幻想到自己當係真，而唔開心嘅嘢就好似唔係發生在我身上。

一年又一年，靠著好多嘅恩典，我就長大咗
已經大學畢業，亦有能力幫助返其他受虐待／需要幫助嘅小朋友同家庭。
不過從心底裏我唔開心。因著童年嘅創傷，我嘅情緒出了問題，現在長期需要食藥同接受心理治療。

我從來都無嬲同怪任何人，只係好遺憾，我無能力去再信任／當佢係我媽媽，我好驚要同佢get close。我仍然同媽媽一齊住，我好錫佢好遷就佢，到現在佢仍然係每日見到正面嘅我，我無講過自己有情緒病。心底裏從小到大都有種贖罪感覺，覺得自己嘅出現令媽媽冇咗人生最開心嘅20年，所以一直我都只會犧牲自己嚟滿足佢嘅要求。

但最困擾我係同人嘅關係，唔夠膽去相信人，去依賴人，所以拍拖對我嚟講都係好困難嘅事。夢想自己能夠組織家庭，做寄養媽媽，照顧好多受傷害嘅小朋友。不過，自己嘅問題令呢一切都好遙遠... 。

因著自己嘅經歷，呢兩句係我經常提醒自己嘅說話：
''Hurting a person is like throwing a stone into the sea. You never know how deep the stone goes.''
''Be a person who leaves a print, not a scar in someone's life.''

我未能夠做媽媽，就唯有用我從經歷&書本學到嘅一切同大家分享。
每一位爸爸媽媽都好重要，因為係由你哋去培育我哋下一代，係靠你哋令世界上多一個善良人。加油！

私人傳訊

一齊行落去

洋房

積分: 49

3^#

發表於 20-1-13 00:38 |顯示全部帖子

回覆 wantaima 的帖子

你講得好啱，小朋友絕對需要管教，錯亦需要指證，只係教育嘅過程需要好多嘅耐性，
同埋要不斷反思自己嘅教育（言語+行為）係building or destroying a life.
因為好多時候我哋都低估了自己言語同行為對他人，尤其小朋友，嘅影響力

私人傳訊

一齊行落去

洋房

積分: 49

4^#

發表於 20-1-13 01:23 |顯示全部帖子

本帖最後由一齊行落去於 20-1-13 01:27 編輯

回覆 creambb 的帖子

我哋鍾意一樣嘢，自然會有動力去做，
而當一樣嘢帶比我哋成功感，我哋亦自然會鍾意。
所以或者我哋可以諗下點樣提升小朋友讀書嘅成功感 :)

1) 下下叫溫書，咁溫到幾時先完呀？
1.1.訂立目標（e.g., set alarm 溫30分鐘，之後就break 10分鐘，比佢做自己鍾意嘅嘢；總共溫4次30分鐘)
1.2 目標可以循序漸進，20分鐘，30分鐘，慢慢加長
1.3 習慣同規律都幫到手，訂立一個特定溫書時間，一過咗就收檔，第二日先再搵

2) 每一節當佢有認真溫，就大大讚佢（鬧到小朋友麻木咗，不如試下讚啦^^）
2.1. 讚賞一定要具體，小朋友先會知道有咩好行為要保持
Bad example: 「叻仔！真係乖。」
Good example: 「媽媽好欣賞你頭先有坐定定，專心溫書。你做得好好。」
2.2. 唔好睇少肢體語言(give me 5/ hug)作為鼓勵嘅威力

3) 留意小朋友嘅狀態
狀態低：佢需要啲刺激，可以考慮比佢企起身溫書／食要咬嘅零食 e.g, nuts
狀態高：佢需要放放電先，比佢跳10下／叫佢數10樣屋企綠色嘅物件，等佢慢慢回過神，靜落嚟

4) 盡量唔好習慣溫完即刻問佢，避免小朋友依賴短期記憶。可以挑戰佢，溫完隔個晚飯先問，有時甚至未溫就問，了解下佢腦仔已經記得有幾多

5) 最後，試下同小朋友直接表達你嘅沮喪，甚至傾下係咩問題。佢覺得溫書好悶？溫極都唔識？想溫但控制唔到自己？

你加油啊！太勞氣時都要比自己抖抖。

點評

wcpcelia

發表於 20-1-13 17:14

私人傳訊

一齊行落去

洋房

積分: 49

5^#

發表於 20-1-13 09:10 |顯示全部帖子

tssy 發表於 20-1-13 06:29
謝謝你分享，你講嘢除咗你的經歷，仲好專業，你現在是否做關於兒童心理學嘅？希望可以繼續分享
...

我讀心理學出身，而家做緊相關嘅研究工作，不過就唔係特別focus喺兒童。

自己同小朋友相處嘅經歷令我明白到有時理論還理論，到實戰好多嘢都easier said than done，尤其當你嘅角色係父母／親人，而唔係老師／姑娘。再加上長時間對住小朋友，有時神仙都難打救，所以只可以盡力 :)

同埋處理學業同照顧小朋友又兩回事 :(
處理學業好多時都會因為理解唔到佢唔明啲乜，再加上時間緊迫，特別容易炆。
尤其當associate 小朋友嘅''失敗''=自己嘅''失敗''，當你平時係對自己好有要求嘅人，你會特別接受唔到小朋友嘅表現唔喺自己嘅控制之內，而你嘅付出同回報亦未必成正比。

私人傳訊

一齊行落去

洋房

積分: 49

6^#

發表於 20-1-13 09:15 |顯示全部帖子

holemone 發表於 20-1-13 05:14
咁你媽媽有冇好感恩你長大成人、大學畢業做個有用既人呀？

相信小部分嘅佢係有嘅，
但更大部分嘅佢係唔太鐘意我:( 妒忌我嘅人生好似比佢好，由細到大親人讚我乖／叻就好似間接反襯出佢嘅不足，或者唔值得有咁嘅小朋友，所以好多時親戚聚會返到屋企後我嘅「下場」都唔太好。
不過我相信佢內心都好矛盾，唔會好過。

私人傳訊

一齊行落去

洋房

積分: 49

7^#

發表於 20-1-14 13:44 |顯示全部帖子

folloni 發表於 20-1-14 12:21
知道, 多謝你, 睇到我眼濕濕, 因為我真係一個好衰既媽咪

我好相信 no parents want to be bad parents，
相信現實有好多限制同壓力，令你無辦法做一個自己滿意嘅媽媽
但唔緊要，無人一出世就識做人父母，好多時都係從經驗中學習，
無父母係完美，只要你係愛佢嘅，小朋友一定會感受到
重要嘅係，你不斷反思，不斷學習 :) 加油呀!!

私人傳訊

一齊行落去

洋房

積分: 49

8^#

發表於 20-1-14 13:49 |顯示全部帖子

bik1229 發表於 20-1-14 13:01
想問吓樓主你幾多歲？

睇完有啲眼濕濕、不能同意更多，

哈哈，年齡係女人嘅秘密嘛
樓豬我20幾歲laaaaaa

私人傳訊

一齊行落去

洋房

積分: 49

9^#

發表於 20-1-14 14:08 |顯示全部帖子

yoyo_num 發表於 20-1-14 12:10
本帖最後由 yoyo_num 於 20-1-14 12:13 編輯

睇完樓主分享都有啲鼻酸酸。另我正正面對緊，溫書時覺得小 ...

雖然話就話每人都有自己長處，好似小鳥擅長飛、魚擅長游水，比賽要條魚去飛，佢一定做得唔好。
然而現實係，我哋嘅學制只係有利於某部份嘅小朋友，
而返學讀書係小朋友生活嘅好大部份，好多時自信心都係從而建立。

我相信成績未如理想小朋友自己都會好沮喪，同時亦會唔開心自己令到媽媽失望。
重要嘅係，小朋友唔好對自己失去信心，覺得無論點努力都無用。

或者媽媽你可以欣賞下小朋友積極嘅學習態度，
佢能夠喺挫折中企返起身，並自己提議改善辦法（多做練習），
係非常成熟同難得！！！你都要比啲掌聲自己！！！
佢面對困難嘅態度比起分數係更終身受用 :)

我唯一擔心嘅係媽媽同小朋友都比好大壓力自己，
不如試下考試前預早溫習，但考嘅前一日刻意安排同小朋友去戶外玩下、放鬆下
雖然呢個建議聽似「離地」，但可能會有意外嘅效果 :)

私人傳訊

一齊行落去

洋房

積分: 49

10^#

發表於 20-1-14 14:21 |顯示全部帖子

本帖最後由一齊行落去於 20-1-14 14:23 編輯

hohinmama 發表於 20-1-14 14:05
認同
港孩，港女……好大程度係保護法下嘅產物
影響嘅唔單止係社會，仲有受保護體：jm 們都開唔少帖呻

容許佢在成長中犯錯唔等於縱容
唔係唔鬧得，不過係如何鬧
鬧得具體（直接指出不能接受嘅行為）同唔傷害自尊心就已經好好 ^^

好似。。。
「我見到你溫書非常唔認真，又望電視，又求其做練習。考試結果你自己承擔，再退步的話 e.g., 每日玩i-pad嘅時間將會取消。」
Vs
「你個腦去咗邊？你咁樣肯定今次又唔合格，你到時就知味道。」

做鋼鐵好，不過都好重要係要保養舊鐵唔好生銹