少年成長

跳至

首頁
1

尾頁
   0


男爵府

積分: 8334

2021勳章


發表於 21-4-25 10:46 |顯示全部帖子
星期六湊呀仔呀女去學琴,等緊老師嘅時候聽到個家長好心急同個小朋友講,叫佢畀啲心機學快啲可以完整彈到一首歌仔,只要彈到一首歌仔嘅話媽媽就會買份大禮物嚟獎勵佢。個小朋友應該都係啱啱開始學琴,家長自然就好緊張希望佢快啲可以彈到歌仔,所以先至會話用買份大獎品嚟獎勵佢去畀心機練習。但係我睇到小朋友個樣又好似唔係特別開心而且好似唔係好願意跟老師入去學琴咁。我唔係話用獎勵鼓勵小朋友唔啱,但係如果要培養興趣,用獎勵嘅方式尤其是買禮物嘅模式去鼓勵我就覺得有啲問題。


細路仔去學興趣班,好多時心急嘅都係家長,希望佢哋盡快會有成果。例如學游水就希望佢哋盡快學識曬然之後可以比賽,學彈琴就希望佢哋盡快可以考到第幾級咁。所以只要留心下好多時就會聽到啲家長問幾時有比賽,幾時可以考琴試,幾時可以做到乜幾時可以做到物。但係對我嚟講我就覺得興趣就係興趣,興趣係要個細路仔自己鍾意,所以我從來都唔會逼佢哋要去比賽或者要做成點樣先至達到我嘅要求,反而我嘅唯一要求就係要學得開心。阿仔阿女參加呢啲興趣班,一定係要佢哋自己想去參加,而且係一參加就要學半年或者以上先至可以停。所以我對仔女冇得話我迫佢學乜嘢學乜嘢,因為所有嘢都係佢哋自己話要學嘅,咁既然係自己話要學自自然然就要有恆心啦,所以到而家咁耐佢哋參加嘅興趣班都冇話中途唔想學或者冇興趣。


既然要出於佢哋自己想學咁做家長嘅責任就係要帶佢哋去試唔同嘅嘢或者同佢哋一齊玩,例如佢哋肯去學游水或者學打羽毛球都係因為我同老婆會成日同佢哋玩,咁佢哋玩下玩下就自然有興趣想去學。又好似學琴咁我記得我個仔同女好細個開始學琴嘅時候,我都嘗試去學拉小提琴學睇琴譜亦都嘗試同佢哋一齊練琴,因為佢見到爸爸都同佢哋一齊玩同佢哋一齊練所以學下學下就學咗咁多年,咁當然到而家咁大個我當然冇再同佢哋一齊練啦!但係間唔中我都要坐喺側邊欣賞下佢哋嘅練習彈出嚟嘅歌,當然好唔好聽都要鼓勵啦!


總之興趣就係興趣,有壓力係唔會令到佢哋培養到興趣出嚟,尤其是係喺開始嘅階段,講得係興趣就係要嚟放鬆心情調劑緊張嘅學習生活,如果興趣都要搞到咁緊張,幾時要攞乜嘢成績到頭來只會越嚟越冇興趣。就算要比賽或者好似阿仔咁要參加乜嘢畫展,我嘅原則都係一定要佢哋自發參與唔會逼佢哋,因為當佢哋越嚟越參與得耐嘅時候,其實佢哋自己都會想知道自己嘅水平去到邊度,所以當老師或者教練同佢哋講嘅時候佢哋自己都會考慮自己都會決定參唔參加。總之要參與興趣班就應該係開開心心咁參與,做家長唔應該拔苗助長,更加應該知道勉強冇幸福嘅道理。如果一開始就用物質去獎勵,獎勵嘅效果只會越嚟越細,因為你唔可能每一次嘅獎勵都大個之前嗰次,咁用物質獎勵嚟支持興趣又係咪方法呢?好多家長都好捨得畀自己嘅仔女去學唔同嘅興趣班,但係反而就唔係好捨得用自己嘅時間去陪佢哋發展呢啲興趣,講緊嘅都只不過係陪玩同埋欣賞。其實家長只要肯陪其實比任何物質都嚟得更加有效果。


伯爵府

積分: 15736

牛年勳章 2021勳章


發表於 21-4-25 19:37 |顯示全部帖子

回覆樓主:

我係做老師嘅!
喺咁多年嘅教學生涯當中,唔止一次,學生同我講好希望快啲考到八級鋼琴,因為考到之後,就唔需要再彈!
每次有鋼琴演唱會嘅飛,可以免費派畀學生去睇,都要囈佢哋先至肯去!最後音樂老師要當係一份功課,佢哋先至肯去睇 !


男爵府

積分: 8334

2021勳章


發表於 21-4-25 22:36 |顯示全部帖子
回覆 熊熊老婆 的帖子

去到咁嘅地步,究竟係邊個嘅責任呢?而且音樂對佢哋嚟講已經唔係一個興趣,只不個係對別人的一個交待。非常可悲!


大宅

積分: 1850


發表於 21-4-29 09:55 |顯示全部帖子
熊熊老婆 發表於 21-4-25 19:37
我係做老師嘅!
喺咁多年嘅教學生涯當中,唔止一次,學生同我講好希望快啲考到八級鋼琴,因為考到之後,就唔需要 ...

哈哈,我細個都係咁,我媽對我好嚴,演奏級之後就無再掂過琴。雖然彈琴唔係我興趣,但係從中都學到其他野:有志者事竟成,好多野靠意志和時間 ,真正的天賦寥寥無幾。不過我同意人生係應該要找一些自己的興趣,咁樣先可以有寄託。所以好取決於父母想小朋友成為怎樣的人,有些東西就算不喜歡也要完成,有些東西可以放任發展,互取平衡


首頁
1

尾頁

跳至
你需要登錄後才可以回帖 登入 | 註冊