家姐考完試冇耐，而家又到細佬考。細佬仲有一日先至考完，但係琴日星期六就同細佬一齊去買模型預備佢考完試即刻就可以砌。家姐好似有少少唔抵得，問細佬又未考完試又未派卷唔知道成績點解咁快買模型畀佢，仲話如果細佬考得唔好咁點！
咁我話畀佢聽從來爸爸媽媽都唔會因為只係成績好而獎勵佢哋，我話咁快買模型畀細佬嘅原因係我睇到細佬考試之前好勤力溫習，咁到考完試自然就要放鬆下做佢鍾意做嘅嘢。我同家姐講話就好似佢考完試都一樣，嗰個禮拜，首先唔使再做額外嘅練習亦都可以盡情咁玩自己鍾意玩嘅嘢。我話今次買模型畀細佬唔係因為佢嘅成績而係因為我哋欣賞佢喺考試之前好耐就已經好勤力咁溫習，所以成績好唔好唔係最重要而係個過程入面有冇盡力去做。我話爸爸媽媽最欣賞嘅就係你哋兩個都盡力溫習。
好多時都會聽到家長會同自己嘅仔女講如果考試考得好就送啲咩嘢禮物，如果做到啲乜嘢就送啲咩禮物，我一直都唔係好認同呢種做法，因為咁樣就好似教緊個細路仔要用結果嚟判斷成敗，但係我覺得細路仔反而要教佢哋凡事要盡力，欣賞過程欣賞佢哋付出嘅努力，因為事實當一路長大就會知道有陣時無論你幾努力，但係結果都可能係未如理想。如果只係用考試考得唔好就去判斷個細路仔冇努力或者做得唔好，咁未免太片面亦都削弱細路仔嘅自發性。我成日都話細路仔係需要人哋欣賞同埋認同，只有不斷嘅欣賞同埋認同先至會加強佢哋正面嘅行為。如果獎勵嘅只係結果而唔係欣賞細路仔付出嘅努力，咁到頭來當細路仔失敗嘅時候佢只係會覺得佢所有嘅努力都係白費。我明白有啲家長會覺得其實獎佢都係要搵個藉口啫，咁考試測驗或者比賽嘅成功自自然然就係最簡單最容易嘅藉口，但係我覺得呢啲藉口偏偏就係最容易傷害到細路仔嘅自尊心，同埋最容易令佢哋有錯誤嘅價值觀。所以我同老婆都有個共識就係好少會用買禮物嚟獎勵，反而我哋更多嘅會係用欣賞同埋鼓勵嘅說話，希望教到佢哋令佢哋明白父母係欣賞佢哋付出嘅努力，只要凡事盡力就算結果未如理想父母都一樣咁開心。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
