少年成長今日: 0|主題: 16038

收藏本版

發帖

返回列表

跳至頁

查看: 17153 | 回覆: 3

老來無依 [複製鏈接]

csir3290

子爵府

積分: 12166

1^#

發表於 21-11-7 12:24 |只看該作者 |倒序瀏覽 |打印

早兩日去外母屋企食飯，外母喺度講話佢有個親戚同佢呻話好擔心自己晚年生活。其實呢個親戚我哋都好少見，我老婆細個都係間唔中見過佢哋。我外母話呢個親戚都成七十歲，但係都仲要返緊工，其實佢屋企唔算經濟環境好差，只不過佢老公好早已經過咗身，而過身嘅時候留低咗少少錢畀我屋企。呢個親戚有一粒仔，聽我外母講話呢個仔喺細個時已經好難教好曳，喐啲就發脾氣，可以講得係小霸王，因為佢老豆在生嘅時候佢兩公婆都好錫佢，可以話要乜就畀乜，有少少唔開心嘅時候就會發脾氣，咁父母為咗就佢就乜嘢都肯。所以細個已經好難教。呢個親戚之所以擔心自己晚年，原因就係呢個仔到而家成四十幾歲人都仲不停問個阿媽攞錢，除咗要住得好，要阿媽買樓畀佢哋之外，個孫話要讀書都要讀國際學校，但係學費又要個嫲嫲畀，連屋企要搵人湊個孫要請工人都係要嫲嫲畀，但係因為個媽自細已經畀慣咗同就慣咗個仔，所以好難走返轉頭。個仔成四十幾歲人都冇一份固定職業，話就話做freelance設計師工作，但係明知屋企嘅經濟情況差都重要就非常揀job，仲要睇心情接job，完全唔擔心屋企嘅經濟情況，因為佢成日覺得唔夠錢就問阿媽攞，四拾幾歲人，已經成家立室，仔都有埋，但唔夠錢洗嘅時候都淨係識得攤大隻手問阿媽攞。老人家之所以擔心就係其實屋企嘅經濟狀況根本就已經唔係咁好，咁多年已經差不多用曬老豆淨落嘅，所以到而家都仲要返緊工。最慘係佢哋本身係住居屋，阿媽已經喺樓下買埋另一個單位畀佢哋一家住，雖然係樓上樓下，但係個仔好日都唔會探吓同理吓佢阿媽，揾個阿媽都只係為咗攞錢，所以個老人家都好擔心如果自己死咗喺屋企都可能冇人知，我外母話個老人家最擔心就係佢自己一死，個仔就連佢間屋都攞埋，然之後即刻攞去賣。所以個老人家話好似話其實而家最想佢死嘅就應該係佢個仔。不過其實另一方面佢最擔心嘅就係萬一自己一唔喺度嘅時候都唔知道佢個仔可以點樣生存。

我哋聽完其實大家都知道根本一冇乜嘢好講，因為個仔都成四拾幾歲根本已經冇乜嘢可以做，我外母只能夠開解下個親戚，勸佢唔好諗咁多最緊要身體健康。但係其實大家都知道搞成今日咁根本就係佢自己一手造成。成日都講細個嘅時候根本就唔應該教到個細路仔咁自我中心，呢個親戚正正就係完美示範咗細個唔教，只係識得縱，到頭來大個除咗自己受害之外最慘可能連個孫嗰代都受害埋，因為呢個仔咁樣嘅生活方式，接受咁樣嘅教導，咁佢去教自己個仔時咪又係呢套模式，所以只不過係一代一代咁惡性循環落去，直至到有一日可能到佢哋山窮水盡真係冇錢再可以攞嘅時候先至會醒覺，但係付出嘅代價實在太大。而家咁講可能只不過一個故仔，但係其實呢啲嘢其實每日都可能係身邊發生，只不過係家長自己有冇留心，以為細個唔教，大個就會識諗根本就係自欺欺人。雖然我都覺得呢個婆婆慘，但係又可以怪得邊個呢！呢個故事希望能夠提醒到啲家長，以為對仔女千依百順，事事以佢哋為中心，乜嘢都就曬佢哋，只係識得縱佢哋嘅家長可以起到一啲提醒作用。雖然仔女生出嚟係要攞嚟錫嘅，但係錫同縱係有分別嘅，而更加重要就係要懂得教！