呢邊靜靜地講下心事,唔預期安慰或解決辦法,只係無人可以俾我傾訴,唯有借呢個版面吐下鬱結.
越嚟越相信”報應”同埋”性格決定命運”.
我一向好怕屋企人之間嗌交然後唔瞅唔睬,嗰種氣氛令人好辛苦.媽媽係一個老派人.喜歡炫耀仔女嘅孝順,倚賴性強又怕悶.可惜佢同弟妹都係火爆嘅人,成日火星撞地球,所以我唔係好想弟妹陪佢,咁唯有自己抽好多時間同佢揾節目.後來我結咗婚有小朋友,環境尚可, 因為兩公婆返工所以有請工人,媽媽就更加成日黐住我又不時要我安排佢同親朋好友喺我屋企聚會.所有我唔使返工嘅日子佢都要我成家陪佢,同佢飲茶食飯打牌.其實我唔係好想.我希望有少少時間俾返我地一家幾口出去玩下,同小朋友有親子時間.弟妹一來可以好忍心話唔理阿媽就唔理,而且就算肯陪,我唔在場, 好多時又係嗌交收場,我又要去善後.唔好同我講我都可以唔理,我媽會不停打電話去我公司,又會半夜三更走咗出街,阿爸又求我幫手去揾佢.試過同細佬嘈到半個身伸咗出窗口要跳樓.為咗減少呢D事發生, 我唯有成日陪住佢.我承認衰心軟.
婚後兩年,原本同大伯住嘅老爺因大伯移民要搬過嚟.我承認我本身都唔係幾想,加上阿媽俾壓力,佢怕老爺分薄我陪佢嘅時間.有時去飲茶食飯我老公想同埋老爺去阿媽都唔鍾意,老公唔開心,兩公婆就梗係拗頸啦!當時我長期處於情緒低落狀態.我已經無自己時間,重要同老人家住,所以無日開心.喺屋企永遠無好面口,少少嘢就發脾氣,甚至唔肯同老爺同枱食飯.大多數時間一係我入房,一係佢入房.老爺都好唔開心,但都忍. 其實佢無做錯任何嘢,只係我個人情緒問題.
時間過咗廿幾年,老人家走晒,我亦有返好多自由時間.開心過咗幾年(當時兩個仔重讀緊書). 以為人生下半場可以好好生活, 等兩個仔出身就可以同老公周圍去下, 有唔辛苦嘅工就做下, 自由自在. 可惜之前所作嘅孽今時今日就有報應. 兩個仔讀書唔成. 又唔肯正正經經去打工, 就係咁長年隱蔽喺屋企. 我兩公婆幾十歲都一定要打工如果唔係積蓄好快用晒. 老公已過咗退休年齡無得做長工, 唯有打幾份散工, 試過一星期做足7日. 佢聽覺好差要帶耳機, 眼矇又試過視網膜脫落, 其實唔應該咁辛苦. 我自己有一隻眼有黃斑病, 雖然做咗手術, 但視力仍然差. 我依然好勤力盡力去做, 好驚公司唔要我.
唔係無勸過但無動於衷.可能又係我性格問題,唔想破壞家庭關係唯有忍.又或者係報應,我以前嘅所作所為太過份了.當然呢個世界係無後悔藥,只希望呢篇自白係我嘅一點悔意吧!