少年成長今日: 3|主題: 16049

收藏本版

發帖

返回列表

跳至頁

查看: 16237 | 回覆: 0

著多件衫呀！ [複製鏈接]

csir3290

子爵府

積分: 12215

1^#

發表於 22-12-11 10:28 |只看該作者 |倒序瀏覽 |打印

早幾日天氣開始凍之前，又係喺嗰間經常食晏嘅快餐店，隔離枱有個阿媽不停提佢個仔著衫，但個仔就唔係好願意著，阿媽就有少少唔耐煩不停喺度嚇個仔。又話凍親唔可以參加課外活動，唔可以去佢鍾意玩嘅地方，但係個仔就一路扭計唔肯著。件事令我諗起我個仔細個嘅時候都試過一次因為著衫同我老婆扭計搞到好唔開心。早幾年前又係有一朝天氣開始凍，我老婆就叫呀仔要著多件褸先返學，我個仔就唔係好鍾意所以就唔肯著，但我老婆堅持佢要著，因為驚佢凍親，我個仔就話因為校服喺校褸入面唔可以著咁多衫，所以就堅持唔肯著，終於我老婆又嬲我個仔又發曬脾氣，因為大家都堅持對方要跟自己嘅做法。終於因為趕時間返學我就同老婆講由得佢，我亦都同阿仔講如果凍返嚟唔好講。終於我個仔就冇聽我老婆講著多件衫返學，但係嗰日天氣真係越晏越凍，經過嗰次之後我個仔唔使我哋叫佢自己都會加多件衫。

其實有陣時家長同細路仔就係會產生呢啲矛盾，家長覺得為個細路仔好，但係個細路仔就唔鍾意。大家各不相讓最後攪到大家都唔開心，但我總覺得有陣時如果唔係啲番唔到轉頭或者好重要嘅嘢就由得啲細路自己決定吧！總之後果佢要自己負責任，因為我哋應該都尊重每個人有自己嘅選擇權。可能有啲家長會話如果個細路凍親咪又係要家長照顧，咪又係家長要畀錢睇醫生等等。但係就算畀你逼到佢著，但無了期每一次都要搞到大家咁唔開心，咁話唔定佢凍親一次，之後佢自己就知道要著衫唔使再經歷次次呢一啲嘅爭拗呢。

所以我會覺得有啲細路仔喺錯誤中學習可能佢學返嚟嘅嘢仲會深刻，我唔係話家長要由得佢哋錯，而係我哋要話畀佢聽過後果，如果佢都係要堅持嘅咪由得佢承擔錯誤嘅後果從錯誤中學習。況且細細個嘅小朋友會有啲乜嘢大錯發生返唔到轉頭呢！正正就係因為佢哋細個唔會有大錯發生就更加應該要畀機會佢哋由錯誤中學習同學習承擔後果，到佢大啲佢做每一樣嘢都會諗得清楚啲先至去做，亦都唔會因為反叛為咗同父母作對，總之父母叫嘅，佢就做相反嘅嘢。因為父母自細已經尊重佢哋嘅選擇，佢哋都會知道父母開聲講得同堅持嘅嘢就一定係緊張同嚴重。所以趁佢哋細個，俾啲犯錯嘅機會佢哋，咁佢哋從錯誤中學習，我覺得好處多過壞處，除咗唔會咁容易破壞親子關係之外，亦都令到細路仔知道父母尊重佢哋嘅諗法。不過父母千萬唔好做嘅係如果仔女唔接受父母嘅意見而犯錯之後就落井下石家踩多兩腳，講什麼一早就同你講咗之類嘅說話。好似唔著衫咁，如果真係凍親就話一早話咗啦！反而只係需要提醒佢下次記得著多件衫就可以。家長要知道小朋友犯錯不重要，重要係如何引導小朋友從錯誤中學習！