少年成長今日: 2|主題: 16050

收藏本版

發帖

返回列表

跳至頁

查看: 24285 | 回覆: 1

家長的興趣 [複製鏈接]

csir3290

子爵府

積分: 12219

1^#

發表於 23-4-16 11:04 |只看該作者 |倒序瀏覽 |打印

剛剛完咗嘅復活節假期都專登攞咗幾日假陪下兩個細路，雖然冇去外地旅行但係都叫做喺香港四周圍去玩下。好享受同啲細路仔去街嘅感覺，真係當佢哋越嚟越大個嘅時候就真係可以好似同朋友去街咁，好多嘢傾。其實唔需要特別搵話題，總之出到街自自然然就會好多嘢講，而且襯阿仔阿女都仲鍾意拖實我同老婆仲會翹住我隻手行街嘅時候，就要好好珍惜呢啲時間。

有陣時諗返，自從有咗呢對仔女之後其實自己都發覺見朋友嘅時間越嚟越少，未結婚同未有仔女之前，我都有好多興趣，間中都仲會搵啲朋友打下波，但係自從結咗婚同有咗仔女之後，開始見朋友同玩自己興趣嘅時間就越嚟越少，好多時都以對仔女同埋老婆為中心，到放假嘅時間就會諗下同佢哋去邊度玩。自己都發覺發展自己興趣嘅時間越嚟越少，但係咪唔開心咩？又唔係唔開心其實開心嘅時間仲多咗。

有陣時喺網上面都睇到有一啲討論話尤其是係爸爸一到放假嘅時候就去咗同朋友玩例如踢波飲嘢之類，又或者一放假就話需要休息唔鍾意四圍去，放假都唔係用好多時間去陪仔女或者屋企人。有啲媽媽會投訴啲老公有時間就陪朋友，陪朋友就精神爽利，一陪屋企人同仔女就話攰。我覺得家長都應該發展自己嘅興趣同有自己嘅朋友，但當中需要取得平衡。我嘅意思即係話如果所有嘅時間都係放喺自己仔女或者屋企人身上又或者相反大部分嘅時間都唔陪自己嘅仔女同屋企人其實都係唔好。我明白其實亦都贊成家長應該有自己嘅興趣同朋友，唔需要將全部嘅時間同埋心力都放喺自己嗰對仔女身上，家長間唔中去陪我朋友或者發展下自己興趣其實都係調劑自己心情嘅一個好重要嘅時間。成日話有陣時啲媽媽對住啲仔女就好似困獸鬥咁，好多時就係因為家長將所有時間同心力都放喺對仔女身上，咁就變成家長冇咗自己亦都好容易睇到細路仔嘅不足，所以其實家長都應該有自己嘅興趣同朋友，間唔中都應該放低下對仔女去發展下自己，亦都要比自己有時間去調節自己嘅心情。

但係亦都有一啲嘅家長尤其是係做爸爸嘅一到放假或者得閒嘅時候就自己走咗去陪朋友，或者去咗發展自己嘅興趣。好似對自己仔女不聞不問咁，但係當喺屋企嘅時候又會覺得啲仔女唔親自己乜嘢都唔同自己講，其實都係自己一手造成。感情係需要時間去培養，仔女唔係放咗手俾工人湊或者畀媽媽自己搞掂就可以，到頭來仔女同自己嘅感情只會變得越嚟越生疏，因為當佢哋長大有自己嘅生活嘅時候就變成越嚟越唔需要家長，如果家長唔襯細佢哋個嘅時候多啲同佢哋培養感情到頭來只會越嚟越生疏，到時想補救亦都補救唔番。

所以其實做家長真係應該要自己拿捏同仔女相處嘅時間，唔可以冇咗自己嘅朋友同興趣但係亦都唔可以過份地為咗自己嘅朋友同興趣而忽略咗同仔女相處嘅時間。因為講到最尾感情係需要用時間去建立！有啲家長可能會覺得同仔女去玩會好攰，同佢哋去街都唔知去邊度好，其實越細個嘅細路仔根本去邊度都唔重要，重要嘅係，係咪父母陪住佢哋一齊去，一齊去下公園，去下郊外或者睇場戲或者食餐飯其實都係好好嘅節目，唔需要擔心冇話題根本話題就隨街都係。有啲家長亦都可能會話返工已經好攰放假想休息吓，但係呢啲家長有冇諗下其實番工雖然係攰，但係正正因為番工已經用咗好多時間，未必有時間同仔女建立關係，咁如果放假都唔利用呢啲時間，咁又究竟幾時去同仔女建立關係呢？所以唔好畀藉口自己，因為時間過咗就返唔到轉頭！當仔女最需要家長陪伴嘅時候，而家長就用咗啲時間去陪伴自己的朋友或者發展自己的興趣，咁到頭來到仔女唔需要家長嘅時候，時間已經追唔番。襯仔女年幼嘅時候多啲陪佢哋，多啲嘢親力親為一手一腳去做，更加唔好以為有工人就張好多嘅責任交咗畀工人就算，如果唔係第時只會聽到有啲家長投訴仔女親工人多過親自己，聽工人講多過聽自己講！千祈唔好去到仔女大個嘅時候畀自己後悔，點解佢哋細個嘅時候唔好好珍惜時間！而且當仔女長大嘅時候，其實家長就會越嚟越多時間去發展番自己嘅興趣同埋去陪自己嘅朋友！