少年成長今日: 2|主題: 15991

收藏本版

發帖

返回列表

跳至頁

查看: 23609 | 回覆: 0

正向教育 [複製鏈接]

csir3290

子爵府

積分: 11835

1^#

發表於 23-7-2 11:30 |只看該作者 |倒序瀏覽 |打印

早幾日老婆應阿仔學校嘅要求做咗一份叫做「正向家長教育」嘅問卷。我老婆開頭做嘅時候，只係諗住做幾題就完，點知原來嗰份問卷非常之長，我老婆仲話份問卷問埋好多根本就應該係常識嘅嘢。

講開正向家長教育，近排成日都喺電視見到宣傳廣告，好似突然間好流行，亦都見到坊間好多機構舉辦相類似嘅課程，主要係教啲家長點樣用正向嘅方式去教育自己嘅仔女。當然好多家長趨之若鶩，要去學呢個好似好新嘅教育方法咁。但係其實睇返廣告講「父母關懷加愛心，子女成長添信心」同「關懷鼓勵與接納」其實只不過係講緊一啲自古以嚟大家做父母都應該明白嘅道理！我成日都覺得有啲家長不停去學唔同嘅育兒技巧，上不同嘅課程，睇不同嘅書，只要係專家講嘅佢哋就信，但係偏偏其實好多所謂專家講嘅嘢，其實都係一啲日常到根本唔好話要做過家長，就算連經歷過細路仔階段嘅都會明白嘅道理。但係到做家長嘅時候就偏偏忘記咗呢啲道理，例如我哋做細路仔嘅時候，邊個唔鍾意父母讚，邊個唔想父母關懷，成日喺自己身邊。邊個唔想父母畀多啲信心自己，唔好成日鬧同埋話自己蠢。但係偏偏呢啲細路仔長大咗成為父母之後，又唔記得咗自己細路仔嘅想法，有心嘅家長就會四圍去搵一啲育兒技巧，睇唔同嘅書，聽唔同專家去講。但係其實好似而家講緊嘅所謂正向教育咪又係講緊一啲常人都應該明白嘅道理，例如多啲讚賞，多啲關懷，幫助細路仔建立自信。只不過有啲家長已經忘記咗點做。

中國人好得意，有一個諗法就係驚成日讚，會讚壞啲細路仔，但係其實好多研究都證明，讚賞會加強細路仔嘅自信，但係點解會出現一個好似好矛盾嘅諗法呢？有啲就驚讚壞，但係啲專家就話讚可以增強自信，其實係源於大家唔識點樣稱讚啲細路。冇錯！點樣稱讚都真係需要技巧，好多時我哋以為讚好容易，其實讚係真係需要技巧，中國人最常用嚟讚細路通常離唔開嗰幾個詞語，例如好叻，好乖，好聰明之類呢啲詞語。但係用呢啲詞語去讚，根本個細路仔就唔知道自己乖喺邊度，叻喺邊度，聰明喺邊度，所以唔會加強佢哋好嘅行為。我哋話要讚得有技巧，其實就係要讚得清楚明確，究竟係邊個行為做得好，我哋就就住嗰個行為去讚。例如考試成績考得好，唔係讚佢聰明而係讚佢今次用多咗時間去溫習，或者係今次嘅溫習用咗啲乜嘢方法溫得好咗。讚佢乖就要清楚明確話畀佢聽邊一個行為係我哋好欣賞或者佢做得好好，例如佢自動自覺執好曬啲玩具，我哋就要針對呢個行為去讚，所以冇錯，讚都真係需要有技巧，只要佢哋清楚知道我哋欣賞佢邊一個行為，因為呢個行為而獲得稱讚，佢哋就會加強呢個好行為，所以就唔會出現所謂讚壞咗或者驕傲嘅情況。相反如果只係成日好空泛咁讚佢叻，讚佢乖。佢根本就唔知自己邊個位置做得好，久而久之可能就真係會令到佢哋以為自己比人哋好，比人哋叻，比人哋乖。所謂嘅讚壞咗。另一方面，我哋成日用鬧而唔用讚嘅原因就係覺得鬧嘅效果即時而立刻見效，細路仔一畀人鬧就會停止佢哋唔好嘅行為。但係你用讚嘅話，就變成效果唔係即刻見到要慢慢累積。大部分的父母當然係希望即時收到效果，慳時間又快。所以好多時都鬧多個讚。但係相反長遠計，因為經常鬧只會破壞仔女之間嘅感情亦都慢慢削弱佢哋嘅自信心，但係相反經常被明確正面讚賞良好行為嘅細路仔自信就會越嚟越大，同家長嘅關係亦會越嚟越好。有部分嘅家長取易不取難但係長遠而言其實對細路仔嘅影響只會係越嚟越差。

另一個家長覺得稱讚困難嘅地方就係唔知乜嘢行為先至應該讚，好多睇起上嚟應該係細路仔必然要做到嘅嘢就覺得冇需要讚，但係其實我覺得家長越係覺得小事而唔需要讚嘅，偏偏就應該要讚要加強佢哋呢一方面嘅行為。我哋中國人有句說話叫做「莫以善小而不為」講得好有道理，但係呢句說話如果用喺家長度，我就覺得應該係「莫以事小而不讚」，只有從小處開始稱讚，慢慢積少成多，細路仔就會掌握邊一啲係父母認可嘅行為，邊啲係所謂嘅好行為好習慣，就算係自信心比較低嘅小朋友，只要佢哋知道父母欣賞到同留心到佢哋做得好嘅地方，慢慢就會建立自信心。

正向教育聽起上嚟好似係一個好高深好新嘅教育方法，但係其實諗深一層只不過係一啲日常好多家長忘記咗，或者係因為覺得嘥時間，效果唔顯著而唔用嘅一啲日常道理。所以家長可以慢慢嘗試從小處開始稱讚一下自己嘅細路仔，或者做一個實驗搵一個行為慢慢試下用稱讚嘅方法觀察細路仔嘅改變。到頭來可能發現效果比鬧更加理想。而家長懂得用正向教育去對待自己嘅細路仔，慢慢將呢種方法推而廣之到身邊嘅人包括伴侶，可能成家嘅關係都會變得越嚟越好。我相信常大家都會知道，任何人都係鍾意人讚多過畀人嫌三嫌四。正向教育並唔係啲乜嘢新嘅大理論，而只不過係喚醒返家長以前做細路仔時候一啲常識同道理。