少年成長今日: 0|主題: 15850

收藏本版

回覆發帖

返回列表

跳至頁

查看: 25366 | 回覆: 2

代出頭 [複製鏈接]

csir3290

子爵府

積分: 10938

1^#

發表於 24-2-11 11:02 |只看該作者 |倒序瀏覽 |打印

早兩日同啲大學同學團年，期間話題都係離不開近況，工作同埋仔女，喺我嘅大學同學之中都有唔少係做老師，自不然大家聚埋一齊都會講下自己學校嘅情況。除咗學生之外，仲會講吓佢哋學校啲家長嘅千奇百趣。好似早個星期天氣特別凍咁，我有個同學就講佢學校當日就收到唔少電話，其中最特別嘅就係有個家長打去學校鬧佢嘅校務處職員，同佢學校職員講話咁凍，唔可以畀佢個女上體育堂，校務處職員已經好聲好氣咁同佢解釋，點知個家長無理到話如果佢個女有啲乜嘢凍親，佢學校要負全責。除咗呢樣之外，佢學校仲收到好多家長話要畀佢啲仔女著唔同顏色嘅羽絨番學。我同學話其實佢學校都已經好多彈性，黑白藍灰總之係呢幾隻色嘅淨色羽絨都可以著，點知我同學話嗰日啲家長就話買唔到羽絨，又話要著紅色又話要著其他顏色，要學校一定畀佢哋咁著，如果唔係又話凍親咁又點又點。最極端係有個家長又係打嚟鬧，話啲老師都著曬羽絨啦！咁點解唔畀啲學生著。我同學話已經解釋畀佢聽只要啱顏色就可以，但係個家長賴皮咁話「咁買唔到咁點」又係嗰句凍親係咪又係你學校負責。另外一個同學又話，試過有個家長打嚟同學校講，叫學校要幫佢個仔日日用蒸爐幫佢個仔暖住啲飯。佢話佢個仔食學校訂嘅飯盒會肚屙，學校提議佢帶飯，佢又話朝頭早煮咗驚到晏晝嘅時候凍，又話個仔呢樣唔食得嗰樣唔食得，就係都要學校諗方法幫佢個仔暖住啲飯，我同學話因為唔係佢負責，最終唔知道學校有冇真係咁做，但係我同學話原來而家先知做老師要做到好似「服務員」咁，乜都要幫啲家長諗埋做埋，有乜唔滿意仲要隨時畀佢哋，打電話嚟學校或者親身上門咁鬧。我有個同學慨嘆到話，而家做老師喺某啲家長眼中只不過係一個服務員為家長服務。

喺席間有呢啲勞蘇嘅同學，通常佢哋教嘅學校嘅banding都唔係幾好，咁我哋啲同學以為教差學校先至會遇到呢啲家長啦！呢啲時候啲喺好學校尤其是係啲最好嘅學校教嘅同學就出聲，佢話喺佢哋啲學校雖然呢類型家長比較少，但係佢哋啲家長，一係唔投訴一投訴就可能係出動律師信，其中有個話試過佢學校有個學生因為違反校規比學校發咗一個警告，其實都證據確鑿個學生亦都認咗，而學校亦都諗住畀個機會學生，所以冇記過只係發咗個書面警告畀個學生，當時亦都通知咗家長，家長亦都冇乜特別異議，佢話點知隔咗冇兩日學校就收到一封律師信，就係呢個家長發俾學校，投訴學校無理警告佢個仔，無俾足夠時間佢解釋同上訴。我同學話雖然呢件事最終都係不了了之，因為學校為咗息事寧人最後都係用方法畀個細路做啲服務然之後取消咗個警告，然之後大家都好落台。但係我同學就話喺佢哋呢啲所謂最名嘅學校到教，其實好多嘢都要好小心，因為佢哋啲家長就更加識得為自己嘅仔女爭取權益。

一路食飯間唔中就聽到我啲同學喺度好似講笑咁吐呢啲苦水，我哋就知道做老師畀人嘅印象就係人工高假期多，但係原來聽我哋同學講，我哋就知道原來而家做老師真係一啲都唔易做。我哋啲同學發現有個共通點，就係喺啲banding低嘅學校，因為啲學生通常都係派入去，所以有啲家長就覺得樣樣嘢都係奉旨，因為唔係我最想入嚟，而係政府派畀我，佢哋就覺得學校應該要滿足佢哋嘅要求，所以就會為啲雞毛算皮嘅嘢打去投訴，或者要學校滿足佢哋嘅要求。相反係啲好出名或者banding高嘅學校，就因為個個家長都趨之若鶩想入呢啲學校，所以入去之前就已經知道曬啲學校嘅規矩，所以好少會為呢啲而同學校有啲咩爭拗，但係呢啲家長普遍社會階層都比較高，所以就更懂得自己嘅權益同埋點樣為仔女爭取。

其實學校嘅作用除咗係學懂知識之外，亦都係教細路仔學懂群體生活，同埋守規矩嘅地方，既然入咗呢一個團體就要懂得守呢個團體嘅規矩，做家長唔係下下要幫仔女哋出頭，我覺得反而係要教佢哋點樣去適應同埋尊重規矩。我記得最凍嗰幾日，我老婆都叫阿仔著件羽絨返學，點知我個仔話校規冇寫到可以著就點都唔肯著，咁我哋話不如著件薄羽絨背心喺件校褸入面，已經特登幫佢搵件深色嘅羽絨背心，但係我個仔都係話校規無寫驚畀老師罰，終於阿仔都只不過係著咗見羊毛底衫出面再加學校冷衫再加校褸。相比起我同學教嗰啲學校嘅家長，唔通我哋真係應該要幫阿仔出頭？但係我同老婆反而更加欣賞佢守規矩嘅態度。我哋雖然有啲擔心佢凍，但係最終我哋都覺得如果阿仔真係覺得凍，最終佢自己應該會去問老師可以點著，而唔係我哋家長要幫佢出頭。況且將來如果佢哋出嚟做嘢，如果公司要著制服，唔通我哋做家長又要驚佢凍打電話同佢公司講咩！其實呢件事令我諗起當日我公司有個後生員工，佢連請病假同辭職都要家長打電話嚟同佢老細講呢件事！其實細路仔最終都要獨自出嚟面對社會工作，所以家長唔係要事事幫佢出頭反而係要教佢懂得守規矩同埋適應社會。