少年成長今日: 4|主題: 16130

收藏本版

發帖

返回列表

跳至頁

查看: 27830 | 回覆: 1

中三選科 [複製鏈接]

csir3290

子爵府

積分: 12776

1^#

發表於 25-6-1 12:03 |只看該作者 |倒序瀏覽 |打印

有一日同啲同事傾開計，佢知道我個女讀中四，所以就問我舊年幫阿女揀科有咩經驗可以分享下，因為佢個仔今年啱啱中三亦都開始要揀科。佢話佢個仔問佢讀乜嘢好，佢話佢冇乜頭緒，只係問阿仔邊科成績好啲，同埋鍾意讀咩科就揀乜嘢科，跟自己興趣。我同事話佢個仔冇乜特別興趣，成績唔算太好又唔算太差，冇乜邊科特別突出，佢諗住同啲朋友一齊，費事將來要同啲朋友唔同班。我同事話用咁嘅方法揀科又好似唔係好妥，但係又唔知點樣可以畀到意見。所以佢就問我有冇啲經驗可以分享下。
我就話我女舊年中三揀科，佢都有問我哋意見，我都係話首先要睇下成績，同埋阿女自己嘅興趣，但係我同老婆都要先了解下唔同嘅科目讀啲乜嘢，當然最重要都要了解下阿女自己將來想做啲乜嘢，然之後都要了解下大學唔同科目對中學選修嘅科目有冇唔同嘅收生要求，即係好似讀醫科原來讀生物未必係最重要，原來最重要係要讀化學，呢啲咁樣嘅特別要求。因為當仔女問你意見嘅時候，其實佢真係想得到一啲實際啲嘅幫助，如果家長只係話你自己鍾意點揀就點揀，或者只係同佢講憑興趣揀，咁其實對佢嚟講一啲幫助都冇，所以我覺得首先家長真係要了解下自己仔女學業嘅成績，有冇啲乜嘢係特別專長或者有冇啲乜嘢特別嘅興趣，然之後喺畀意見之前，真係要了解下唔同科目讀乜嘢同埋大學嘅收生要求。有咁多嘢要預備，所以真係要早啲幫仔女開始一齊商量，如果去到揀科之前，仔女問先至開始去諗同埋去傾嘅話，其實可能唔夠時間做一個較為全面嘅分析同埋選擇。以我自己個女為例，阿女本身語文成績幾好，而且我哋一路都覺得佢嘅數學成績唔錯亦都唔抗拒計數，所以第一時間就問佢有冇興趣讀數學延伸部分，如果鍾意計數我哋都建議佢揀埋物理，因為將來大學揀科嘅時候有數學延伸同埋物理咁喺理學院同埋工程部分都會多啲選擇，再加上因為阿女英文成績好，到將來萬一發覺唔鍾意計數或者讀工程，亦都可以喺大學揀一啲語文嘅科目。咁第三個選科我哋就同阿女講會唔會諗下一啲冇咁辛苦嘅科目，因為讀物理同讀數學延伸都已經成日計數，所以我哋就建議佢讀經濟，可以畀將來自己讀上去嘅時候多一個另類嘅選擇，而且相比起物理同埋數學延伸部分，經濟科我同老婆都讀過，會覺得相對會比較輕鬆啲，而且學嘅嘢會接近返多啲日常嘅生活會比較有趣。不過當然到最後都係佢自己嘅決定。

中三選科對細路仔將來升學嘅發展其實有好大影響，我哋以前嘅年代就分文科理科，一早就知道將來升大學大約會讀啲乜嘢科目，但係而家成日強調憑興趣去選擇唔再咁早分文理科，我覺得反而仲難抉擇咗。因為如果純粹憑興趣去揀，到將來要讀大學嘅時候，先至發現所讀嘅科目同大學嘅收生要求有分別，就已經返唔到轉頭，所以我先至強調雖然按興趣揀係重要，但係如果考慮到將來嘅升學要求，憑興趣之餘就真係要了解將來大學選科嘅時候有冇一啲特別收生要求嘅科目，又或者將來dse成績計分嘅時候有冇一啲特別嘅情況，例如讀數學延伸好多大學都會將文憑試數學延伸部分嘅成績乘1.5或者乘二咁去計算。我明白呢啲對家長嚟講可能有啲複雜，但係相對嚟講對我哋啲仔女，其實如果我哋唔特別同佢一齊去睇，佢哋亦未必識得去搵呢啲嘅資料。而且選科真係要有商有量，如果只係求其同佢哋講叫佢哋睇興趣去選擇，反而會令佢哋覺得我哋幫唔到佢手。而且亦都要等佢哋知道選科千祈唔好朋友揀乜就揀自己㨂乜，最起碼大家能力唔同，興趣亦都唔同，如果只係因為朋友揀乜嘢而自己想同啲朋友一齊就揀乜嘢嘅話，將來先發現原來自己讀唔掂，後悔嘅時候亦都好難返轉頭。同時家長亦都要明白，選科係仔女嘅事，我哋畀咗全面嘅意見之後，到最後亦都要接受仔女自己嘅選擇，但係我相信如果成件事上面，親子之間互相有商有量，我相信揀錯科或者仔女作出太過離譜嘅選擇嘅機會會相對較低。好似我自己阿女，最終佢佢都係跟我哋嘅意見揀咗科，而且讀咗差唔多一年之後，我哋嘅觀察佢都讀得幾開心。對佢自己將來大學嘅選科或者佢嘅職業前途，亦都開始比較明朗，知道自己大約將來會讀啲乜嘢。

總之我自己就覺得中三選科其實對細路仔嘅前途影響好大，家長一定唔可以完全唔理，放手任佢哋自己自由選擇，但係家長亦都唔可以做得過份干預，因為始終將來真真正正要讀嘅都係自己嘅仔女，所以亦都要考慮佢哋嘅感受同興趣，家長要做嘅就係畀足夠嘅意見，等佢哋作全面嘅考慮，所以家長自己亦都首先要去搜集一啲資料同埋了解唔同科目嘅要求，咁樣先至可以能夠畀到一啲實質嘅意見仔女。要仔女明白唔可以只係憑興趣同埋跟隨朋友嘅選擇而揀科。親子之間做到有商有量互相尊重，咁先至最有機會幫仔女揀到合適嘅科目。