懷孕前後今日: 6|主題: 330299

收藏本版

發帖

返回列表

跳至頁

查看: 45418 | 回覆: 181

12 3 4 5...10

積分: 980

畀面勳章

1^#

發表於 13-3-29 09:17 |只看該作者 |倒序瀏覽 |打印

本帖最後由 Lily0911 於 16-5-6 04:31 編輯

入院篇
我BB 3月13日出世，我3月12日下午先去醫院CHECK IN，姑娘會問你一連串問題。我選了大房，最後佢比左間4人房，對住育嬰室，初時都怕好嘈，但其實環境好好，無B6人，香港媽媽同姑娘都好NICE。有幾個問題較重要。
1）佢會問你若開刀以未上奶，你會選1）什麼奶粉都唔補？ 2）補奶粉？補咩BRAND？我好有決心餵人奶，但人道D想，都真係第一日未能落床，同埋第一日未有奶，BB胃仔好細，點好呢？唸左勁耐，最後我都唔想比自己太大壓力，補奶粉啦，但我REQUEST用針筒餵。你都可以選CUP FEED。
2）尿喉係咪半麻後插？我更係簡"係啦！"
3）佢會問你需唔需要晚上回家，第二日早上回醫院OR出去DINNER的，我選留院，但出去吃飯，因為第二日不用太早。
之後會幫你剃毛，剃好少，不用怕。然後比個住院禮物袋你，內有
洗澡樽，網褲X2，床墊，滴露潔手液＋濕紙巾，M巾2包，細袋仔（方便去洗手間），一個床邊櫃鎖。床頭有熱水同室溫水提供。自己要帶拖鞋，長褲，保溫杯，差電器，日用品。佢地有餵奶衫比你著。自己貪靚可帶件外套。佢個件好娘，同朋友影相靚D好。

開刀篇
我早上9：00 開刀，淩晨12：00開始禁水禁食。第二日早上8：30姑娘叫我換好衫推我落手術室，老公一起去換上手術室保護衣。
麻醉師來同我SAY HELLO。去到手術室，播緊＜他約我去迪士尼＞歌，即刻笑左。我個麻醉師超好，每一個STEP前話比我知將會有既感覺，所以當真係FEEL到個陣一D都唔驚，人地話打手背個支針仲痛過背脊，事實係真的，但我真係一D都唔覺痛。打完手，打背脊，個枝好似有橡根彈你幾下咁，之後再屈前個頭攬住雙腳，又係一D都唔痛。之後佢地叫我要即刻訓平，因為麻醉藥好快令我感覺唔到。我開始個人震灑，醫生話正常，我仲震到牙都震，好好笑。呢個時便老公來，醫生來，每個人問下我BB叫咩名呀，吹下水。醫生問完我叫咩名，好快落左刀。你可以FEEL到人推你，但唔痛唔凍。我老公只係咁望住我，我就咩都睇唔到，前面有塊布。之後麻醉師係我個肚推下兩三下，我聽到醫生話BB好高，再推一下，不用20分鐘，我個BB出左世了。我38周開刀，36周時，照BB得5磅10，個時好擔心太輕，日日狂食，早上剪D花膠落通粉食，再食蛋，芝士，飲奶，但一定係早餐食，最吸收，但真係WORK。醫生都話我肚細，但BB都好夠肉，最後有6磅12，超好成績。之後姑娘包好抱比我地睇，影張相。BB喊到5秒就停左，好乖。我地自已都帶電話影幾張。之後老公同BB上番育嬰室，BB可以係育嬰室門口同我家人合照幾張先走。我爸媽99好開心。之後我聯好針就上番房，過程超快。10：00前已OK。

番到房，過自已床滴收縮子宮藥，由於下身仲麻緊，所以不痛，我聽到隔離床媽媽順產滴收縮子宮藥痛到喊，但佢落床快過我。我子宮收得好平，開刀後己直接幫我用佢地提供既修腹有固定傷口。6個鐘後可以飲水，無嘔可以食粥，叫家人帶定比你。我好肚餓，好快湯飯都食灑，個人心情超HIGH，訓唔著。姑娘下午抱BB比我同老公睇下，現家無B6，服務好好多。記得勁飲代茶同湯水，橫掂唔駛去洗手間。

我12 IN， 16OUT，埋單當4日計，我無JOIN PACKAGE，本來我醫生3日都比我走，因為我好快可以落床，仲一D都無痛過，止痛藥好有效，有兩隻，一隻有效12個鐘塞肛門，一隻口服，我走個日都唔駛再食，但我叫醫生塞多粒比等我出院輕鬆D。埋單5萬6，其中兩萬係我產科醫生。
兒科醫生可以自已簡，都可以叫你產科醫生介紹比你，我自已上網SEARCH，我簡左薛守智，VERY NICE。我之後BB照燈都番去搵佢，第時兒科都KEEP住搵佢。

餵奶篇
浸會每4個鐘餵一次奶，無論人奶定奶粉。
8：00AM， 12：00PM， 4：00PM， 8：00PM，你可以REQUEST再餵密D， 11：00PM同04：00AM都去。我11：00PM都去餵人奶，04：00AM就叫佢見唔到我黎就幫我餵BB啦。餵奶前有音樂提媽媽，係餵奶室，有好多人教你，每一次抱BB比你前同你對手帶，我以為個BB差不多樣，但媽媽真係媽媽，我第一日已經分到自己BB既喊。個一刻超感動，BB超MINI，抱住佢好SWEET。每個人都先試餵人奶，有人教你架，之後就話比姑娘聽你要咩奶粉，佢會比枝細奶粉你自已餵。我就叫番姑娘用針筒餵。
你可以REQUEST BB喊打比你去餵。而且人唔多，所以佢地都好HELPFUL。
我生BB前已經勁做大肚按摩，同自已按胸，我第一日已經有初乳，第三日有奶，第四日回家開始上奶。我係醫院有補過粉，但針筒餵，我回家後無補過至今。我BB埋身同泵出黎飲奶樽都得，但一定要比BB試邊隻咀啱佢，我試3款，chu chu, peigon, nuk. 最後簡番浸會隻NUK，但其實埋身係最好，我泵出黎，一來想上奶再快D，二來飯後我老公餵BB，我可以休息，晚上我主力。
大家有心理準備，BB喊食一兩個鐘就要，好辛苦，而且第一日回家一定有D產後情緒，好正常，一定搵人傾，好快無事。

親子時間
浸會現家超好，有爸媽親子時間，以前聽說爸爸要出院先可以抱到BB，現家浸會開放5:30﹣8:00比爸媽一起抱BB，影下相。我老公好開心，不停話BB好細粒，我可以感受到佢可以抱下BB個種喜悅。其他朋友睇BB就可以9:00-8:00去育嬰室外隔住玻璃睇BB。

照燈篇
我BB 有B6PD蠶豆症，對部份藥物和化學物如蠶豆、樟腦、臭丸、同中西藥過敏。本來好擔心，但後來自覺我順利懷孕同BB平安出世已經好幸福，只要我教BB避開致敏原便可。同埋原來我有兩個表兄都有此病，但佢地現在都好健康，所以我好快開心番，唔好影響上奶。回家後去健康院，發現BB好黃，測機過190就要去醫院抽血，再決定照唔照燈。醫生問我想去政府定C＋？我老公即話番C＋，打比我個浸會兒科醫生比我打尖睇一睇。即抽血發現280，醫生話250以上需馬上照燈，我個心好淡定，因為我成日聽人講話照燈，見到BB抽血好心痛，會喊，但我覺得醫好先係首要，唔好咁軟弱，做左媽媽要堅強D。比個心理準備大家， BB抽血係抽腳底架，頂唔順唔好睇，我就好呀Q精神，同BB講你男仔黎架，唔好喊。醫生好好，問我番政府定C＋照，我問佢C＋大約幾錢？佢話2千多一日， BB需要照2晚，老公決定番C＋。醫生姑娘鼓厲我KEEP 住泵奶比BB，我餵多一次人奶後便回家了。
番到屋企，即刻去買冰種同雪袋，之前買定泵同儲奶樽，唔知係咪心情開朗，我第二朝去探BB前已經泵到3枝2安1枝3安。我仲執好屋做好MASK等BB回來。浸會由於C＋，你去睇BB又有奶，佢會抱BB比你餵一陣人奶，BB出院時跌到160，之後可以回健康院覆診。直至現在BB黃疸都好浮動，但醫生見BB係全人奶都好支持，叫我KEEP住CHECK密D先。今日去健康院BB終於PASS，可以一個月後先再CHECK。

修身篇
我懷孕重了共28磅，由110上到138，肚圍39吋，個肚超黑但無紋。生完無左16磅，現在122磅，腰32吋。我雖然勁食，但可能因為餵人奶，的確個肚同腰係修得快，我睇住佢平，仲有12磅，我都唔會節食住。浸會有修腹帶送，但佢個條主要係固定傷口，但我都KEEP住帶到12朝。之後去產科醫生診所睇傷口後就改穿修腹褲，傷口4吋長，好靚，一條好幼。我穿修腹褲係上台灣網買，好舒服，可能現家3月，唔太辛苦，因為唔係硬個種，係尼龍。包埋個大腿同胸底。如果餵人奶，唔見議大家穿硬個隻，因為好熱架。另外，朋友介紹我一個上門大肚按摩師由2X多周開始按，真係無腫過，生完由於我想傷口靚D，我訓覺時平訓，盡量唔轉身，搞到腰好痛，CALL佢再黎按摩，佢幫我按埋上奶穴位，再加貼耳穴，重要係可以按下個胸，按完多左20ML奶，現家DAY 16可以泵到3安士，大肚同座月唔方便出街，有人上門係好一流。

NEW BORN BB衣服篇
唔好以為BB衫好得意，勁買，我回家後發現BB初生著既其實要好簡單，一件和尚袍加一件長身既袍，現家天氣外面個件長身袍要薄，快乾，下身最好係啪樓，好易換尿片既而又包到對腳。去健康院後我次次都連包被都洗埋，所以包被都要有番好幾條。最重要係紗巾，我之前唔信，買得一打，最後我現家屋企有四打，唔好講笑，由於餵人奶，一邊餵有時另一邊滴，又有時BB去健康院都帶住一兩條，又有時BB仔換片時痾尿後要埋下身。佢一日12餐，真係起碼都12條。所以如果有人問你送咩好而你未買，叫佢三打比你啦。因為紗巾唔見議人執二手，我其它衫褲包被執二手就無問題。

NEW BORN BB必須品
之前勁無知識，後來經高人指點，我發覺家中有兩樣野係有BB家中必須。你未買可以買定。
1）衡溫既熱水煲（BB同大人都無可能飲100度既水，特別係奶粉BB，一定要用60度水沖奶，大人座月都成日飲代茶，市面有隻衡溫既熱水煲，可以水煲好後自動衝溫去你想要既溫度，90度／85度／60度，非常好用，因為我餵人奶，飲好多水同茶，無理由次次去啪爐煲架，同埋有時用熱水毛巾FU下個胸先泵奶，都無理由用100度既水，所以呢個衡溫既熱水煲超要買）
2）密實袋同密實盒，我以前屋企唔煮野，根本唔用呢D野，現家發現一定要有，因為BB仔出街帶多套衫仔同尿片都一定要密實袋袋起，無理由是旦搵個膠袋袋，好唔衛生。密實盒唔係好用放食物，以係BB有好多奶咀等配件同埋泵奶等用具，你一時未用得著都要搵個衛生地方收好， 12蚊店好多不同盒仔，最重要單手可開蓋，你一手抱B搵野都無問題。

講座
奶粉講座除左有禮物外，其實吸收知識真的不夠專，話曬想BB食人奶都無唸過奶粉，大家可以搵一些專業的姑娘同過來人個D講座其實仲有用，大家可以搵下母愛蜜語工作坊，係衛生署主辦，免費同好有用，最重要可以問好多問題，因為對未生過的，真的有無限問題好想問，呢一點對我超有用，去講座DRY聽。另外醫院都有小組講座，呢種可以帶埋奶奶去，比佢知專業人士的意見，令你人奶路更順利。我有去過QE，係小人D，但小人真心學到野。

以上係我既分享，如果有野講得唔好，唔好見怪，我係BK學到好多野，所以我現家勁累都想分享番自己心得。
生完BB一定要保持心情好，唔好因為餵人奶太大壓力。要好好珍惜every moment.