呢10日見咗4個醫生，2中2西。對我嚟講，好嘅人、物或事，都係僅供參考，當我任性又好，唔聽意見都好，人哋話好嘅醫生唔一定是我信任嘅，適合全世界，唔等於我接受到，總之最後我揀咗其中2個醫生，嚟緊俾半年去試試幫唔幫到我。
其實我好怕預約咗，仲要等太誇張嘅醫生，如果政府排急診，我理解。但如果私家醫生、專科醫生，超過1小時，我已經接受唔到，我直情會覺得這位醫生唔尊重病人(或客人罷!)。其實我蛇王又好，請假又好，點都係我預留時間過嚟，點解只有醫生嘅時間係時間？中學我大概有3年半時間箍緊牙，嗰位所謂名醫，每次等大概是2個半鐘係「正常」，點解唔可以好好咁安排好時間呢？最嬲係我試過問姑娘可唔可以預約遲兩個鐘，我心諗讀書又好、跑步又好，時間唔係咁嘥法，結果每次姑娘都距絕我，仲威脅警告返我唔好遲道，細個唔識駁嘴，明明醫生遲到(其實他都好遲先返診所)。所以呢次我等咗其中一個醫生90分鐘，我決定唔會再返去睇佢。
仲有一種我唔太鐘意嘅醫生，但未到討厭嘅地步，就是嗰種苦口婆心叫你唔好呢樣唔好嗰樣嘅醫生，這次我同老公俾其中一個醫生話我哋太密集行房，我同老公30都未到，晚晚會搞應該唔係太唔正常掛，況且呢方面真係好難忍，我哋有解釋，結果大部份時間就係討論到底行房幾多次，而唔係講成個療程佢會點安排，老公份報告好正常，如果禁慾只係醫生慣用嘅Package之一，而唔係針對我哋而設定，咁其實又大可不必跟住做啦，所以未走出診所我又決定不會再睇呢個醫失。
