啱啱過去嘅週末，一班小國民到咗大埔樹友農莊，去參與「種菇工作坊」，感受一下大自然環境。
平常見到嘅香菇，好多都係以段木栽培。大家知道保育樹林嘅重要，都唔希望砍樹來栽培菇菌，一向支持環保嘅小國民藉今次「種菇工作坊」，學會利用有機廚餘資源，例如由咖啡店收集嘅咖啡渣，透過環境管理，自己在家栽培菇菌。
小朋友聽完導師講解，合作落手落腳齊齊唔怕污糟，好專心咁利用有機廚餘資源做菇包來支持環保有機種植。
另一邊有一班小朋友玩農場入面嘅鞦韆同吊床，留返個美好親子活動回憶。
農場導師好有心思，舉辦「鬥快除雜草」比賽，俾大家嘗試除草，體驗一下農夫生活嘅工作。
平日又點可以隨隨便便咁喺公園除雜草呢，依個體驗真係好難得，大家都好落力！
除草比賽中獲勝家庭，可以得到農場當造嘅蔬菜1KG作為獎勵。
恭喜7號家庭！總共除咗935g雜草，好犀利呀！
除草活動結束前，導師向大家介紹時令蔬菜及常見嘅農作物。
體驗餵飼山羊嘅樂趣後，仲可以同山羊合照！
做完動態活動，行去附近菇棚，安靜聽吓導師分享「菇菇小知識」。
農莊有唔少種植田畝，仲可以俾大家自費購買同親自採摘當造嘅農產品！
今次農場體驗活動，每位都好大得著，希望下次再嚟親親大自然，感受清新同寧謐嘅環境！
