作為講親子育兒資訊嘅網絡平台，BK一向重視work-life balance！所以今年BK又參加咗「家庭友善僱主獎勵計劃」，顧名思義，呢個計劃係想喚起僱主對家庭核心價值嘅重要性，每兩年就會舉辦一次～不得不提嘅係喺2016年，BK榮獲「傑出家庭友善僱主特別嘉許金獎」同「支持母乳餵哺獎」㗎！
除咗有唔少方便在職父母嘅政策同措施外，國王亦好重視員工嘅健康。上兩篇王國日誌曾經提過，國王唔忍心見到我哋五勞七傷，所以請咗一位脊醫返嚟教我哋拉筋，由於大家對拉筋環節念念不忘，國王徇眾要求，決定每個月都俾同事們鬆一鬆！Yeah ~國王萬歲！又多一項員工福利喇！
以後每個月嘅最後一個星期五，同事們可以一齊喺pantry做啲簡易嘅拉筋同伸展活動～今個月主要針對肩頸酸痛，長期對住電腦嘅人會不自覺地烏前，導致肩頸側邊肌肉繃緊，所以今次主要教大家點樣放鬆同訓練肩頸兩側嘅肌肉！
多謝同事為拉筋活動做準備！
首先，將手放喺頭頂，手往右邊慢慢壓低個頭，維持五秒，重複地做五至十次，做完一邊換另一邊，就可以拉到頸附近嘅肌肉喇～
跟住就係肩臂嘅伸展活動，一樣維持五秒，重複地做五至十次。呢個動作可以同時伸展到頸椎、肩頸同手臂嘅肌肉群。
之後就係繞肩嘅動作，簡單啲講即係膊頭向前、向後轉動五次。
最後就係結合伸展同訓練肌肉嘅一組動作，將雙臂反舉，維持五秒。
平時即使坐喺電腦前都可以做㗎！若然睇緊呢篇日誌嘅你都有肩頸酸痛嘅問題，不妨試吓跟住做～
