講到呢個topic,相信有返咁上下年資嘅互聯網使用者都會即刻講到兩句「密碼要長啲,間唔時轉吓」等等⋯⋯今日,小編想同大家「今天的我打倒昨天的我」,事關當初制定呢啲耳熟能詳嘅規例嘅人,都話後悔當初嘅決定!喺呢個資訊時代,無論係你個bk account、網購甚至係網上銀行,都有需要用到密碼,所以你話呢個topic係幾咁重要呢~
喺未講有咩新建議之前,我先同大家盤點一下2017年25個最常見嘅密碼!
(圖片來源:techviral.net)
從上圖可見,大家為求方便好記,多數就咁按阿拉伯數目字順序排列,或者係直接由左到右輸入鍵盤第一排嘅字母。簡單啲講,太短、按順序嘅密碼都係高危密碼!另外,改密碼時最好避免用自己嘅名、電話或者係身分證號碼!因為得到你資料嘅人唔需要任何it技能,只要靠撞就有機會hack入你個account!所以如果你嘅密碼「榜上有名」,就快快手改咗佢喇!
咁改咩密碼先安全呢?小編剛才提到密碼安全有新嘅建議,原來要求密碼包含大細階、數字同特殊符號已經係2003年嘅事。上年六月,美國國家標準與技術研究所(NIST)更新咗密碼制定指引,建議用戶使用由多個簡單英語單詞組成嘅密碼,好過用唔同字符組成嘅密碼,而用戶亦唔需要頻繁地改密碼,成日改,真係自己都記唔到呀!總結嚟講,大家改密碼時可以考慮以下幾點:
1) 用多個英語單詞
2) 唔好太短
3) 唔好貪方便易記而揀順序
4) 唔好只用自己嘅個人資料做密碼
5) 懷疑被hack,馬上改密碼!
小編溫馨提示大家,如果用緊「高危」密碼,或者係好多年冇改密碼嘅國民,記得馬上去個人主頁嘅設置頁度更改密碼喇~
參考資料:
https://www.nist.gov/itl/tig/projects/special-publication-800-63