今日又學人煲新嘢，依個亦都可以話係有啲童年回憶嘅飲品，就係西洋菜蜜啦
我記得細細個冬天嘅時候，屋企都總會有一支支嘅即沖西洋菜蜜，咁就隨時有好味又滋潤嘅甜飲。不過，依家都好似冇得買依啲沖劑，所以整整下我都忙記左有依款飲品了。
尋日去茶餐廳時，聽到有其他食客談論依款飲品，所以我挑起點點回憶，就係咁....我就上網睇下邊度仲有得買。買就真係好似已經絕跡左，但原來都有網友仔介紹過點樣自己煲，所以我又試下買材料煲下啦！
西洋菜一斤、蜜棗六粒、冰糖適量
將西洋菜剪開兩段，然後加少許鹽浸洗30分鐘。同時間蜜棗都要洗好備用
鍋內放至1L水，然後加入西洋菜及蜜棗，然後開爐火
水滾後將冰糖加入，然後中火煲45分鐘
最後焗多15分鐘，隔晒啲茶渣之後就可以飲得啦。
啲西洋菜渣都唔好浪費，因為都可以食呀，甜甜地都幾好食呀，我一個人都食左大半碗呢....哈哈哈
真係唔講得少，好香濃嘅西洋菜味又甜甜地，飲完喉嚨都冇左嗰乾乾地嘅感覺，好滋潤呢
出奇地小小豬超愛飲依款西洋菜蜜，一口氣飲晒一大杯，仲會主動要求要飲添，真係估佢唔到(好少可咁主動哦)。
咁簡單又易煲，最重要係小小豬咁鐘意，等我蜜蜜煲...潤多啲先得！
