2018-01-23

3.4K

【港島Playhouse】小JM愛玩樂。玩轉港島。西寶城紛鬆(FunZone)

小JM愛玩樂。玩轉港島。西寶城紛鬆(FunZone)

今日爸爸放假就緊係要去遠啲玩啦,
我地今次揀咗去位於港島嘅堅尼地城紛鬆(FunZone),
玩完仲可以順道去探埋爺爺嫲嫲添,
簡直就係一舉兩得!

觀看影片:
https://youtu.be/0oT5zA-GEeA

聽落對我地九龍人好似好遠,
但其實交通好方便, 乘坐港鐵至香港大學站C2出口就已經到達西寶城商場啦!
可以話係方便到一個點呀!

FunZone 佔地面積約1萬平方呎,園區內設施採用咗北美別具心思嘅設計,
正好提供一個安全又舒適嘅環境俾大人同小B們盡情玩樂!
園內劃分咗幾個不同遊戲區,包括有彈道區域、攀爬燈塔、藝術角落及寶寶天地等。
除咗一般遊樂設施之外, 場內嘅寶寶天地適合三歲或以下小B玩樂,連小B都貼心照顧埋!
事不宜遲,一於等小JM帶大家睇吓有咩好玩之處啦!

到達西寶城後,只需沿著電梯到達一樓就會見到FunZone紛鬆架啦!
爸爸同小JM一車當先,已經快快腳入去除定鞋戴好手帶準備去玩!
開始玩之前先俾個讚,
因為係FunZone嘅主要出入口都有職員看守架!

戴好手帶後,一進入場館即時見到一個顏色鮮艷而且好寬闊嘅滑梯,超級吸睛。
說時遲那時快,原來小JM同爸爸已經到達滑梯頂尖準備好要試玩添啦!
到下轉媽媽想話跟著小JM去玩呢個滑梯嗰陣,
小JM已經熟路到無影。

好啦,先介紹一下場內幾個唔同區域啦!

攀爬燈塔

講到明攀爬就一定唔少得繩網啦,
呢度設有兩個唔同難度嘅繩網陣,
可以俾小朋友練習一吓平衡力之餘亦可以練下膽量添。
除咗繩網,仲有唔少嘅「爬行隧道」,
同時亦設有唔少嘅障礙物,
足以俾到一個好好嘅鍛鍊機會俾小朋友們。

唔單止咁,呢度仲有兩條隧道形滑梯,
可以話飛快咁爽,啱晒速度型小朋友。

講到繩網陣,小JM都真係完全未驚過,
可謂「逢網過網」,之但係小JM爸呢,就對以下呢個半空中嘅繩網覺得有啲怕怕,
因為爸爸話佢踩落去個下覺得好唔實在。

小JM媽睇著小JM同爸爸一齊行呢個繩網陣嗰陣簡直可以用相映成趣來形容,
小JM健步如飛咁就閃走咗,但爸爸先行得一半

彈道區域

喺攀爬燈塔旁邊就喺彈道區,
入到嚟呢個區域要格外小心,
因為呢個區域真係彷彿令你置身於「槍林彈雨」之中。
話唔定喺度玩得多會練出驚人嘅閃避能力。
不過都係個句啦,
玩時玩,但最好都係唔好追住人來射,以免樂極生悲呀嘛。

藝術角落

除左刺激好玩嘅彈道區同攀爬區之外,
其實仲有一個區域好啱文靜嘅小朋友們嘅。
場內設置咗一個藝術區,提供到一個地方俾小朋友靜靜地畫吓畫咁。
真係動靜皆宜架!

小插曲:
話說,小JM見到有得畫畫所以都想畫埋一份,
但小JM爸見到附近都無畫紙喎。
正當小JM以為無得畫畫之際,坐喺對面位姐姐主動同小JM爸講:
可以去入口處問職員姐姐拎畫紙架。
小JM爸唔該完之後就緊係去拎畫紙俾小JM啦,
拎完返來後小JM爸只係俾咗一枝畫筆小JM,
而嗰位小姐姐就好主動咁幫小JM拎咗一堆畫筆,
小JM媽見在眼內真係覺得好有愛呀!
呢位小姐姐嘅教養真係好好,好乖巧呀。
希望小JM將來大咗都學識以愛感動別人啦!

途經寶寶天地會見到角落附近有木製玩具。

而喺寶寶天地隔離就係休息區及用餐區。

爸媽們可以喺休息區慢慢等小朋友玩,
區內設計輕鬆自然,夠晒舒服,
而且區內仲提供免費Wi-Fi添架!

寶寶天地 (適合三歲或以下的兒童)
雖然叫做寶寶天地,但區域內嘅設施一啲都唔輸蝕架,
一樣有滑梯同繩網,仲有多種不同嘅玩具添架!
唔單止咁,區域內仲有一個為小B而設嘅專屬波波池添,
只係俾三歲或以下小B玩架咋!

經小JM實地體驗完之後都即時急Call朋友們話要下次一齊來玩先得!
多啲朋友一齊玩就更加開心啦!

紛鬆 (堅尼地城) 
地址: 西營盤卑路乍街8號西寶城1樓121號
電話: 2258 9558
電郵: [email protected]
開放時間:
星期一至四:早上9點至晚上6點
星期五至日及公眾假期:早上10點至晚上9點
收費:
詳情請參考網站資料

如有任何查詢/合作,歡迎聯絡我同小JM 參與產品試用或者各樣活動
媽咪既Email係: sleepyceci@hotmail.com
小JM既Facebook Page: 傑。斯與晴(Jolie Babe。小JM の 成長印記)

 

【編按:以上內容為作者之個人意見及立場】

相關文章

緊貼新冠肺炎最新相關資訊