| (右 《忽然一週》圖片) |
「第三十四屆香港電影金像獎」其中一個話題係，本為歌手嘅王菀之(Ivana)，今年單頭有成5個提名破晒紀錄，包括個人佔咗三個「最佳新演員」提名，仲入圍埋「最佳女配角」，佢幫《分手100次》唱出歌曲《不再說分手》，亦入圍「最佳原創歌曲」。
對此Ivana今日就用嘅招牌雞仔聲回應:「好開心知道呢個提名名單，作為一個新演員，感受到大家呢一份支持，係好似歡迎我來到電影世界咁，我覺得係好溫暖嘅，我最感動嘅係，喺過去一年拍過嘅三部電影都同時入圍，因為喺我心目中三部電影嘅回憶都係好美好，成個拍攝隊都係好專業好好人，教識咗我好多嘢，我嘅三部電影嘅回憶都係同等咁美好，對我意義好大。
我要特別點名多謝《delete愛人》嘅葉念琛同埋王祖藍，《金雞》嘅君如同鄒凱光，《分手100次》嘅旦哥，亦都恭喜寫主題曲嘅punk仔，我喺度講呢啲名時就諗起拍攝過程，羊年剛開始，係一個好溫暖好團結好美麗嘅開始，打後音樂當然係我嘅最愛，一定會好努力繼續做音樂，我o依家多左一個演員身份，都希望喺演戲方面進步，同更多團隊合作，會好努力做一個全面嘅performing artist，多謝我嘅歌迷支持埋電影，亦都希望如果我有影迷，都會開始聽我嘅音樂，好開心呀，我o依家即刻話比我爸爸媽媽聽先!」
之後Ivana再多謝同恭喜吳君如:「我知道君如都入咗最佳女主角，同佢同一部戲覺得好榮幸，亦都祝福君如，佢真係比咗好多支持力量我去開始電影呢條路，其實我呢個女配角入圍係好榮幸嘅，我好開心，因為Fiona(薛凱琪)係我好朋友，我係真心替佢開心再次提名，同埋鮑姐(鮑起靜)添啦，佢係一個好資深專業嘅演員，個名單同佢一齊出現，我係叨光同埋好榮幸，係真心，唔係好行，我除咗叨光就窮詞，所以個名單份量好重。」
最後佢再補充要多謝父母，同埋愛人Eric So(蘇卓航)，佢話:「我想多謝公司，自己公司經理人同埋同事，佢哋係會比好多空間我發揮自己，試唔同角色，屋企人又係，身邊嘅愛人都係，好支持我做創作上嘅嘢，所以我先有呢個力量同勇氣。」
http://hk.apple.nextmedia.com/enews/realtime/20150205/53407630
發表於 
hm.gif[/img]
返回列表
