少年成長今日: 2|主題: 16067

收藏本版

發帖

返回列表

跳至頁

查看: 27184 | 回覆: 2

邊個放唔低架車？ [複製鏈接]

csir3290

子爵府

積分: 12307

1^#

發表於 22-1-9 11:03 |只看該作者 |倒序瀏覽 |打印

如果生仔要考牌嘅話，咁主題樂園我相信係其中一個考牌嘅好地方，主題樂園可以我講係全港其中一個最多父母出現嘅地方，去一去主題樂園就乜嘢管教模式嘅父母都會見到。

話說聖誕假期當然又係攞假同阿仔阿女去咗主題樂園staycation，由於假期所以比平時更多人。喺主題樂園入面有幾種父母可以話係隨處可見，第一種就係去到邊都放唔低架bb車嘅家長；第二種就係排隊嘅時候大人有大人傾，完全唔管自己嘅細路仔有得佢哋爬嚟爬去或者喺度騷擾其他人；又有啲當個細路係皇帝一樣招呼呢樣招呼嗰樣；又有啲就一人一部手機大人有大人玩細路有細路玩完全冇溝通冇交流。總之各適其適乜都有！

先講放唔低bb車嘅家長，其實都講過好多次，可能呢啲家長自己唔覺得有問題，但係當去到人多嘅地方，好似嗰日喺迪士尼睇表演同埋睇聖誕燈飾影相嘅人非常多，有陣時根本寸步難行嘅時候，總會發現有啲BB車就好似架坦克車咁四圍撞到人，仲要最慘唔係一架半架。可能啲家長覺得細路咁樣坐喺架BB車上面好舒服，但係佢哋唔知道咁樣會影響到其他人。有啲家長可能會話細路仔玩到攰就要休息，又或者因為有好多嘢要拎所以要用架BB車。但係有冇諗過其實架BB車對個細路仔係依賴。有架車喺度佢哋就梗係可以玩到攰就即刻跳上車休息啦，如果冇架車佢哋仲會唔會有得咁瞓呢！同時如果去主題樂園玩都係玩到攰要經常預備佢要瞓覺嘅時候，咁係咪應該諗下係咪適合帶佢哋玩咁耐呢！而且對細路仔嚟講，都要訓練佢哋慢慢放低架BB車啦，如果連玩都要玩到隨時隨地要瞓，咁真係諗下仲有乜嘢方法先至可以令佢哋放低架車。另外，喺樂園入面經常都會見到4，5歲嘅細路都仲坐住架bb車度，究竟係個家長放唔低嘅BB車定係個細路呢！家長以為好方便，但係其實只不過係做成一種依賴。另外，如果話因為bb仔有好多嘢要拎出街，所以一定有架bb車，咁我又真係唔明既然有咁多嘢拎先至可以出到街，咁係咪真係適合去主題樂園呢？我自己都有兩個細路，都經歷過bb仔呢個階段，而且兩個細路年紀都相差唔遠，咪一樣咁帶佢哋四圍去，我覺得完全係冇問題，只不過係點樣分配時間同埋點樣訓練細路仔嘅問題。

喺樂園入面見到4，5歲都仲坐住架bb車，細路一路揸住個電話，家長就一路推住佢行，咁究竟係個家長有問題定係個細路有問題呢！嗰日仲見到兩個小朋友因為爭一架bb車坐，爭到發曬脾氣喊曬，如果冇架bb車又會唔會咁爭法呢。

BB車對有啲家長嚟講可能係一種方便，但係在我嚟講我就覺得壞處多個好處！最好笑係我老婆講話可能有啲家長覺得幾千蚊買個bb車返嚟，用一兩年就唔用會覺得好唔抵，所以用到個細路仔四五歲都仲用緊。總之我覺得要訓練細路仔嘅自理能力，盡快放低架BB車係重要嘅一步，甚或根本就冇需要買bb車。其實放唔低架BB車嘅根本唔係個細路仔而係個家長。因為細路仔嘅適應能力根本就好高，對於細路嚟講冇咗架BB車只不過係少咗個依賴，但係對啲家長嚟講冇咗架BB車，佢哋就覺得少咗個方便，所以放唔低架車嘅根本就係啲家長。