現年50歲的羅霖，三年前經歷女人最痛，慘遭家暴，最終決定與劉坤銘離婚，結束十六年婚姻。一切由零開始，羅霖前年豁出去接拍處女電影，床戰比她細十九年的關楚耀。今年羅霖再度「破處」，以高齡女模姿勢殺入書展，推出寫真集，以索爆人母身形，迎戰o靚模屹籮露罅，未開戰已贏幾條街！
家長望子女贏在起跑線，o靚模當然想贏在事業線。不過，年過半百的羅霖，強調今次出寫真並非要與o靚模一較高下，今日羅霖接受本報專訪時說：「我真係冇諗過我半百先出寫真，絕對係超齡女模，我1991年參加亞視後，第一次咁激，我諗呢個唔單止係處女作，亦都係最後一次。」
羅霖早前自爆為了今次的寫真集，不惜花了六位數置添新裝影相，她透露：「今次影咗至少五十個造型，幾個月前韓國仲好凍，返嚟肺炎，食咗一個月抗生素先至好番，好彩啲相效果好好。」問她影寫真前可擔心兒子會反對？羅霖笑說：「佢哋好支持，大仔仲陪埋我去，用行動支持我。」
不過，羅霖說囝囝見到她在室內着泳衣影相就有點不習慣：「佢有份幫我揀相，但佢都係鍾意我着晚裝多啲，睇唔慣我着泳衣，又話個妝唔似我。」羅霖又爆大仔有興趣做模特兒，有時去兼職影相，她說：「我同三個仔關係都好close，關係好似朋友咁，佢哋乜都會同我講，識都女仔都會問我好唔好。」問會否介意兒子發展姊弟戀？她笑指自己是個開通媽咪：「一啲都唔介意，最緊要心哋好，對我個仔好就夠喇！」
與劉坤銘離婚後，羅霖身邊不乏追求者，問可有被兒子催再婚？她笑說：「佢哋冇催我，但想我拍拖就話畀佢哋知，等佢哋幫吓眼。」問現在是否有追求者？羅霖即哈哈笑說：「咁都有嘅！」她坦言追求者中有很多年紀比她少：「我接受到姊弟戀，O依家追求者中都有個比我細十歲，但我覺得冇問題，最緊要溝通到。」
羅霖表示已活到半百這個年紀，擇偶條件只有一個：「一定要對家庭有責任，錫我幾個仔就得喇！」不過，羅霖笑言這幾年一切要由零開始，忙到冇時間拍拖，最快年底前才開始與異性約會，她笑說：「其實心目中都有三個人選，仲要三揀一，不過o依家講咗出嚟，唔知會唔會走晒添呀！」
羅霖幫本報拍嘅造型照，無論身型同皮膚都揮低唔少後生女，男士真係要拎定紙巾，抹鼻血呀! 
發表於 
返回列表
