1-3歲今日: 0|主題: 19703

收藏本版

發帖

返回列表

跳至頁

查看: 47763 | 回覆: 40

去大口環兒童醫院做評估既分享 [複製鏈接]

12 3

BerniceL

大宅

積分: 1391

1^#

發表於 21-10-9 02:14 |只看該作者 |正序瀏覽 |打印

本帖最後由 BerniceL 於 21-10-9 02:58 編輯

因為bb既情況，我呢一年都keep住四圍搵多d關於自閉/發展遲緩/治療呢d既資料，睇好多blog, website, forum, 政府出既文章，私人機構出既廣告都好，好想幫自己惡補多d知識，因為唔好講話辨別，我根本係零認識，直到bb出現以下情況...希望分享出黎幫到同路人，順便齊齊圍吓爐，互相加加油！小朋友岩岩2歲，但佢既情況係：識發音唔係啞巴但唔講野（唔係少，係冇講過，只係講外星話，當然我本身係好似其他父母咁，6個月開始教爸爸媽媽波波飲奶奶呢d疊字，但冇成功過）；教乜都唔太明，例如比比，拜拜，過黎，呢d用body language教既動作；唔望你，你大叫佢個名都唔望你，雖然你叫佢個名已經一日叫幾十次，叫左好幾個月至1年，佢都似乎唔知你叫緊既係佢；一落街就跑，好少好好地慢慢行路，認路好叻，反方向行幾遠都識得去返上次玩既lift同門，入lift唔肯出黎，玩門唔肯離開；鍾意睇住會轉圈既野，佢自己都鍾意自轉然後就好開心...
仲有d細微既習慣/喜好，總之係會令一個一向抱住「人人成長既時間表都唔同，自然成長唔好比較太多」做宗旨既天生天養型hea媽媽都覺得bb似乎唔簡單...

1歲半時返健康院打針同姑娘講左bb既情況，姑娘安排電話問診（問主要照顧者，即係我），可能因為疫情，佢地得閒左（？！），第二日就收到電話（我冇預計咁快，收到電話時仲係思考緊係咪果d無聊推銷電話，所以我miss左對方第一句既自我介紹，收左線都唔知對家係姑娘定醫生），佢問我答左一輪，最後幫我排大口環根德夫人兒童醫院做評估，佢都唔知幾時排到，有消息大口環會搵我。我多謝左之後都預左有排喇，好多媽媽都話排年幾...

好快收到通知，排到小朋友2歲生日後2日，真係比想像中快左超多（我總係覺得同疫情有關），當時我仲未分到排緊乜，仲以為係做一個test可以評估曬所有野。
好耐之後又打黎，又幫我排多左個期，係生日前1日，我R曬頭，又話唔同一座大樓做，咁做咩架...不過本住就算火坑我都會去既心態，去左先算，到時就會知道了。
等左半年之後，做左好多交通資訊既功課，帶住個眼訓既小朋友，同所有用品（因為唔知攪幾耐）,終於轉左3次車，去到了大口環根德夫人兒童醫院。（我真係覺得好"隔zip")
響主院填左健康申報表，冇得用安心出行（雖然我都冇），各人都得到一個貼紙（通行証一樣），就可以去其他地方。
我地（之前問清楚係可以2個大人陪，所以我地2公婆都去）去左指定既大樓，比診金（公院價，百幾蚊），去左相關既樓層報到，等左都唔夠10分鐘，就到我地（等候既地方連埋我地得3組人咋）。
原來今日係做言語評估。
治療師（？！）（我今次好留心，但佢冇做自我介紹啊，我又唔好意思問佢咩title) 同小朋友玩左一系列既小玩具，我睇得出每組玩具都會比佢評估到某d能力同反應，例如聽指令，生活聯想，模仿能力etc，治療師一路mark評估紙（好似tick格仔咁），一路同佢玩。間中會問我地問題，了解吓小朋友平時既行為同反應。
最後佢同我地講，2日之後果次既診症醫生會一次過講點安排訓練同其他野，不過小朋友既言語能力好遲緩，佢安排左2個月之後返去覆診。仲暗示話，政府既期比較緊張，坊間都有相類似既專業訓練，可能會多d選擇（我明既我明既，其實你都好無奈）。
2日後去第二次，今次比上一次耐好多，因為做左好多野。基本野同上，去到另一座大樓，明顯多左等候既大人同小朋友。去唔同既室做驗眼/驗耳/度高（小朋友咁細個真係好難做，何況佢係唔聽指令既，所以都係可能唔係太準確），之後見醫生。
醫生今次同佢玩左好耐，行埋樓梯踢埋波，又問左我地唔少野。佢都係tick一張計分紙咁既野，不過大份d既，所以完左之後佢係叫姑娘入黎計分數，仲叫我地去換尿片因為計分用既時間係足夠我地去個廁所...
有左結果，佢同我地講返頭先評估左d乜。係響有限既時間同情況下評估左大小肌肉，認知，社交，情緒。小朋友每項都below age, 言語同認知尤其，肌肉方面就好d不過都係唔足齡。小朋友既評估結論係有整體發展遲緩同自閉症譜系。
佢提議排S位比小朋友，因為佢需要既訓練比較多，S位比較合適，不過都要排到3歲入K1時再做一次評估（大口環同人地學校各做一次），大口環係本身醫院呢邊做階段性評估，學校果個就係睇吓小朋友仲合唔合適（佢既意思係，首先你地都要同意and接受，先會幫你排S位，因為好多家長都唔願意比小朋友入特殊幼兒中心，可能會影響升小學，同埋過唔到自己心理果一關。其次係，人地學位都緊張，如果小朋友響呢一年有大進步，冇咁嚴重了，可以安排返E位I位果d, 留返個S位比更需要既小朋友），佢話會將我地個case pass比社工，社工會教我地之後點做同排咩，不過社工係單方面聯絡我地，我地而家係冇得做主動搵佢，而社工會2個月內/左右搵我地。
之後出返去排期，一星期後返去驗血驗尿（check有冇先天性問題）, 仲排左3歲果個大口環評估響1年之後。後來又排到肌肉訓練係同抽血同一日，好似話半小時左右only。
今次逗留左超過2個半鐘..

呢個就係小朋友2歲生日週比我地既經歷...無話係咪好唔開心定點，其實反而有d鬆左一口氣既感覺，好似終於有方向知道之後點行咁。做父母既從來都唔係考慮自己，所以冇話開唔開心，我只係肉赤小朋友要用比其他人更多既努力去做人地好輕易就做到既事，將來既路比較難行，可能會孤獨一d, 無咁容易被身邊既人理解。我希望自己不斷進步，足夠強大，能夠一路都陪伴同保護小朋友。媽媽唔需要你好叻，我淨係想你活得健康同開心。

因為經濟所限，而且小朋友岩岩返n班，我預計佢會有少少進步（有同伴同老師點都好過對住菲傭），我就未打算同佢搵私人機構做訓練住，想睇吓n班既反應先，同埋等埋社工聯絡我睇吓排E/I/S位到底係點樣一回事，事關果日有個姑娘又同我地講「唔洗好耐既，你地好快就有架喇（係咪暗示我地係嚴重所以快d會有位）-_-」

比較難應付既係長老們既懷疑...因為呢個孫同其他孫既同齡表現太不一樣...紙都係包唔住火...不過老人家好忌呢d, 我會拖到最後先講，而途中會比好多心理準備/建設/言語藝術佢地慢慢接受。
父母既態度，好影響身邊既人對小朋友既態度，尤其親人。我覺得正面同積極面對，係必須既，2公婆之間都要互相鼓勵同支持，各人總有心靈軟弱既時候，夫妻關係好，同行，係好重要。

總要提醒自己：你愛佢唔係因為佢既外貌同技能，唔係要佢同人地一樣先愛，唔係因為你養佢等佢將來回饋返比你，你愛佢只係因為，你愛佢。

0 0 0

私人傳訊

KYC0308

大宅

積分: 2110

41^#

發表於 22-3-10 20:32 |只看該作者

提示: 該帖被管理員或版主屏蔽

私人傳訊

rodona333

大宅

積分: 2423

40^#

發表於 22-1-19 14:04 |只看該作者

kissapplegirl 發表於 22-1-2 04:22
我大仔2歲3個月係協康會評估出自閉症，我到8月開學前決定放棄N班，讀密集班，經過一年多訓練，21年9月讀主 ...

你好那裡有密集班資料可報?(emoji)

私人傳訊

kissapplegirl

男爵府

積分: 7232

39^#

發表於 22-1-2 04:22 |只看該作者

回覆樓主:

我大仔2歲3個月係協康會評估出自閉症，我到8月開學前決定放棄N班，讀密集班，經過一年多訓練，21年9月讀主流K1，老師比既定期評估報告都好好，而家佢係心急、小小固執、成日唔望人、言語仲差6個月
我過來人建議，排S期間，選擇密集班或aba訓練一定比N班好，因為密集班係1個老師對5個小朋友（仲有個助教），aba係一對一訓練，但N班一個老師睇好多小朋友，好難專注關顧一位小朋友（仲要係特殊需要），同埋盡可能係3歲超級黃金期前幫小朋友訓練多d，好多機構ST、OT都要排好耐隊，盡快排左先
同埋高津、O,E位訓練一個月得6到10堂，其實訓練唔足夠，要出去報好多私人訓練或自己家居訓練