2011年7月27日早上10時10分，看著你寶石般璀璨的眼眸逐漸暗淡，你離開了我，離開了這世界，迷路的小天使終於不再迷路。
凌晨兩點，親手餵你食鎭静劑，嗰刻我冇喊，我唔可以喊，但係我心不停顫抖，感覺上我喺到親手扼殺咗你嘅生命，無論你願意與否。你當時掙扎得好利害，我好怕整痛你，但係更怕药力唔够，你走唔到，甘我一定唔會再俾你走，直到你係不久嘅將來忍受唔住俾自己器官衰竭所帶來嘅痛苦才離去。
药力好快，未餵完第一支你已經開始瞓，有啲药仲喺你鼻鼻到噴咗出黎。我手忙脚亂，又要餵完啲药，又要幫你抹鼻，更怕你俾啲药哽親而辛苦。
抱你番房瞓得舒服啲，但係大意嘅我攪到你嘔番啲药出黎之余仲要整污糟咗你。嗰一刻我崩潰喇，抱住你一路喊一路打點話俾新朋友。新朋友好好，佢即刻過黎陪我，幫我。等待期間，我第一次聽見你吠叫，有惡惡，霸道，撒嬌，同埋扭計嘅吠叫聲。其實我好開心聽見你真正嘅吠聲，因爲知道你冇俾人割斷聲帶，但係亦都好傷心，我唔會再有機會聽到你任何聲喇。
朋友黎到陪住我，陪住你。我哋一路聽住你吠，但係始终都你都唔肯走，我哋由係房陪住你，到出廳偷偷觀望你，再退到書房見唔到你，你都唔肯走，不過，起碼知道你唔再感到痛，可以完全放鬆，真正好好甘瞓一場，發個好夢。
到差唔多五點，朋友同我都知你唔可能係呢刻離開喇，你生命力實在好頑强。我折服於你對生命嘅熱誠，亦心痛你嘅不屈。毛呀，我真係唔想你要嚐盡痛苦先離開呀，你明唔明呀？我唔想你食唔到野，瘦到得番排骨先離開呀。
朋友離開，我瞓係你隔離，同你傾計，不經不覺我都瞓著咗。
去到獸醫處，因爲佢哋嘅失誤，等咗一小時有多，终於等到有醫生黎同你打針。當中我因爲醫生一句打唔打針唔係你話，係醫生决定而失控。我相信如果唔係想你舒服地走，唔係朋友係到拉住我，我真係會打嗰位醫生。噢毛毛，請完諒我嘅暴力思想。
10點10分，你好安祥甘走咗，心傷，心痛，欣慰，好多好多，只能喊。去到善终服務，佢哋好快幫你清潔，快而不求其，當我哋重新見你時，你好舒服，平静甘瞓係一個藤籃内，好乾淨清爽。
未到下午1點，我哋已經可以帶你走喇。知道你怕黑，唔鐘意獨個兒被留下，放心啦，傻毛毛，我一定唔會留低你一個。
返到屋企，望住一屋都係你嘅物件，每個角落都有你嘅痕迹，我又感到心痛，從此我心房不再完整。止不住嘅眼涙，每每霎眼都會掉落。毛毛我應承過你我會堅强，我記得架，我亦會做到，但係請俾多啲時間我。在我未流完要流嘅涙，未習慣你已經自由自在前，請讓我盡情地獨個兒哭吧。
毛毛我愛，請有時間想想我，入夢相見吧。
To be or not to be, that's the question
發表於 
毛毛 rip , 主人永遠都愛你 
返回列表
