蝦佬~~~ 又係我啊~~~
冇錯，終於到左更新嘅時候喇，大家有冇等我等得好苦啊?!!!
其實我都好掛住大家，奈何我家韓妹打完針之後低燒左好幾日，搞到晚晚都係瞓得個兩、三個鐘，日日個人都似雲遊太虛咁…
:" />
好在~! 我家韓妹終於好返好多，而我亦都係星期六日叉足電，可以為大家繼續詳細解構韓妹的真身…
第三篇 - 韓妹的真身 番外篇
大家覺唔覺韓劇入面嘅韓妹女主角通常都只係得兩類型??
一，清秀可人慘情型 (難食生死戀嘅宋慧喬、邊個的雞批嘅崔智友…)
二，粗魯純真可愛型 (猩猩嘅全智賢、大話妹嘅李多海…)
好明顯，係韓劇同Kpop咁具影響力嘅時代，好多人都因為咁而誤以為全世界嘅韓妹都只係分為呢兩類，因而產生唔同級別嘅韓妹fantasy，亦因為咁，好多慘劇就發生鳥…
事件一 : 男人的樽鹽
男性朋友A因為好毒好毒嘅韓劇，成日都發白日夢以為所有韓妹都有全智賢嘅外貌、朴信惠嘅清新同秀智嘅可愛，所以娶韓妹係佢夢寐以求嘅目標，皇天不負有心人，冇耐之後我呢位男性朋友真係遇到佢嘅Korean dream girl
佢同口中呢位好true、好pure嘅韓妹過左一段幸福甜蜜嘅時間之後(都有大慨兩個星期左右嘅…)，韓妹嘅真實性格就開始慢慢咁浮現出黎…
去傳統韓式餐廳…
咦?! 點解純過蒸餾水嘅韓妹BB著住條裙都會洞高隻腳食飯嘅?!! 嗯… 可能佢熱得滯啫
去Coffee Shop…
咦?! 點解可愛動人嘅韓妹BB會180度咁打開雙腿坐架呢?!! 嗯… 可能行得攰得滯，佢拉筋啫
去酒吧...
咦?! 點解完美無瑕嘅韓妹BB會著住裙、但係除左對鞋將對腳放去對面張櫈嘅?!! 仲要之後盤腿而坐?!!嗯… 佢性格自由奔放啫，同埋佢應該係信佛嘅，所以先會打坐嘅啫
我呢位天真嬌男性朋友不斷搵唔同嘅藉口去幫韓妹BB開脫，不斷說服自己 “呢啲小事黎嘅，嚇我唔到嘅!”(食神谷德超mode)
直至有一日…
男性朋友同韓妹BB正漫步江南，商量緊一陣要去邊度醫肚，well… actually應該係propose緊去邊到好，真係差在未做個writtenproposal…
“你想食咩啊BB?”
“是但啦，我咩都食，你話事”
“食燒肉?”
“咦~~~熱氣啊!”
“食雪濃湯?”
“咦~~~淡荗荗!”
“咁你想食咩啊BB?”
“是但啦，我咩都食，你話事”
不斷鬼拍後尾枕咁無限反覆之下，我位男性朋友終於忍唔住講左句 “你有冇難服侍啲啊”，跟住“啪” “啪”兩聲，係嘅，係人來人往嘅江南街頭上面，韓妹BB賞左我位男性朋友兩巴，再黎一陣問候之後，韓妹BB就一聲令下，要我呢位男性朋友馬上下跪道歉，皆因佢頂住到氣落唔到，俾佢激親咁話喎…
事件二 : 韓妹前度
男性朋友B自命聰明過男性朋友A，因為當佢發現佢嘅韓妹BB有少少“大醬女”傾向嘅時候 (是咁的，韓妹BB要求一個幾百萬won嘅名牌包包作為拍拖一百日禮物)，就好快手咁以“性格不合”、“背景文化差異太大”為理由，正式入紙分手…
係呢度，補充一下咩係“大醬女”…
“大醬女”，就好似“港女”一樣，佢係專門用黎形容個一類要著好、住好、食好，所有嘢都要最好嘅末期公主癌韓妹，而跟據韓國人所述，佢地嘅打扮通常都係周身名牌、衣著上低下短、腳踏3寸高踭鞋，就算冇錢食飯都要買杯Starbucks拎住 (注意! 係拎住架咋下!)，係江南街頭扭下扭下咁行嘅就係大醬女喇! 大家去開韓國旅行，不妨周圍留意下，睇下身邊有冇大醬女嘅蹤跡…
分手之後，奇怪嘅事就開始發生喇，男性朋友B開始發現夜晚返到屋企之後，好多物件都會唔同左位，又或者出門口之前明明已經熄左廁所燈，但係返到屋企竟然係開住!!! (個時我地個個都叫佢搬離呢間鬼屋…)
過左好幾個月之後有一日，男性朋友B約左另一個韓妹BB去睇戲食飯，點知當佢去到櫃台拎戲飛嘅時候，櫃台姐姐竟然同佢講 : “先生，你兩張飛係頭先已經拎左喇喎”…
男性朋友嚇到冷汗直流，心諗日光日白有冇咁猛啊… 但係面對住眼前嘅韓妹BB，佢唯有硬住頭皮扮冇事，仲即刻重新買飛睇下一場，由於仲有時間剩未入得場嘅關係，佢地就決定去排隊買爆谷汽水
為左表現Gentleman嘅一面，男性朋友B自己手拎住兩杯大汽水，而韓妹BB就自己顧自己，拎住爆谷一邊慢慢食一邊跟住入場喇，點知，就係呢個時候，突然黎左一陣怪風，一下子就將我呢位150磅嘅朋友吹開左好幾尺…
當佢定一定神先發現，原來係前韓妹BB!!!!!
前韓妹不但送左佢一下飛腳，仲用盡120%嘅力量手刀衝上去，然後葉問上身咁對佢一陣詠春嘅“攤打”，同時不間斷咁問候佢，最後將手上面拎住嘅兩張戲飛送返俾男性朋友之後就消失於人群之中…
大家有冇發現少左一個人?!
冇錯! 就係現任韓妹BB喇! 原來韓妹BB去左隔離嘅石櫈邊食爆谷、邊坐低欣賞啊! 之後仲用左我招牌天真嘅眼神同聲線，對住男性朋友講 : “Oppa~~~ 我肚仔餓啊，去食飯咯!”
事件三 : 婚紗背後
朋友圈中，大家都公認男性朋友C係最幸福嘅，因為佢真係萬中無一咁係一眾韓妹佳麗當中搵到佢嘅perfect match! 因為係拍拖嘅兩年裡面，真係連一次鬧交都冇過，至於韓妹BB，更係好到無話可說，先唔講佢外貌拍得住韓星，煮飯、洗衫、洗廁所，所有家務都做得企企理理，所以我呢位男性朋友就決定將佢娶返屋企…
甜甜蜜蜜嘅婚禮過後，好快男性朋友就開始發現韓妹老婆BB有啲唔對路…
婚前韓妹BB已經開口同老公仔講過自己返工好辛苦 (其實只係係診所度做護士，叫下人入房睇醫生、叫下人拎藥咁…)，所以想留係屋企休息一段時間先返工，反正經濟上冇太大嘅壓力，男性朋友就答應左，而韓妹老婆BB亦都好sweet咁同老公仔講 : 得返你一個返工，我會好好打理好屋企，每日煮好早餐俾你返工，夜晚煮定飯等你返黎食!
一心諗住努力工作養家嘅男性朋友，日日都好期待返到屋企見到韓妹老婆BB煮定飯等自己，點知慢慢咁發現…
Step 1: 韓妹老婆BB嗌攰，然後只煮晚飯，早餐唔見左
Step 2: 韓妹老婆BB又嗌攰，然後晚飯隔日煮，地隔日拖
Step 3: 韓妹老婆BB再嗌攰，然後一個星期煮兩日飯，家務一星期一次，一星期三日出去飲酒…
眼見韓妹BB老婆話極唔聽，得返自己一個返工，仲要自己做埋家務，男性朋友開始崩潰，見到佢咁辛苦，其他嘅朋友就叫佢放工唔好返屋企住，一齊食飯、傾下輕鬆下
當晚大慨12點左右，男性朋友同我地食完飯之後就一個人返左屋企，返到屋企太攰，好快咁就撻左落床準備瞓覺，就係呢個時候… 又有一陣怪風吹黎，成個人即刻郁都郁唔到，定一定神先發現好在唔係俾鬼責，只不過係俾韓妹老婆BB一腳踩住左個頭啫…
韓妹老婆BB就好似“我的老婆係大佬”個女主角咁非常有霸氣地單腳踩住男性朋友個頭，再配非常有節奏感嘅問候語，鬧佢做咩飲酒飲到12點先返…
_________________________________
好，一連幾集嘅韓妹的真身終於分享完畢喇~~~~
都係個句，咩人都好，總有好人壞人，所以韓妹都係有好嘅~
只係我地不幸地遇上唔好嘅個幾個嘅啫…
接住落黎講咩好呢…?
發表於 
返回列表
