夫婦情感今日: 0|主題: 42772

收藏本版

發帖

返回列表

跳至頁

樓主: oguh

27 282930 31...59

oguh

積分: 11575

561^#

發表於 12-8-11 12:59 |只看該作者

Mrs Humpy

有日Bruce收到一個包裹，是他的哥哥Robin寄給他的。Robin搬屋，執野時搵到一D野，然後寄給他。他坐在書桌慢慢拆開，一個紙盒裡有好多舊照片同一D雜物。

佢比我睇一張佢地兩兄弟同Batmom既發黃合照，背景係一個遊樂場，年輕貌美既金髮Batmom拖住佢地兩個，排排企影相，Robin笑笑口，Bruce黑口黑面。「我記得我要去玩，但比佢捉住影相，所以想喊。但後來長大先知，我地一家人無咩合照，呢張算係好罕有。」佢解釋。

然後一張佢係學校，拿著一張紙企係一個黑板前面，又係木口木面，無笑容。「呢張係當時家長日，我朗讀緊作文，太緊張。」佢解釋。

然後有張獎狀，估唔到佢曾經作文比賽亞軍。又有幾個獎牌，係賽跑銀、銅牌。「我呢世人都未試過冠軍。」佢感嘆，經常聲稱自己世界第一既男人，自卑起來。

我見有一大堆看似垃圾既雜物，問佢係咩來。佢話當年成日同Robin去偷野，Robin偷銀包偷錢，佢就專偷無聊野。有D鎖匙扣呀、卡片呀、公仔呀、爛筆呀、裝飾物等，佢話佢會用呢D無謂野，放係自己床頭。之後佢收埋左呢D「珍藏」，唔記得點解會比左Robin一直keep住，咁多年之後往見天日，佢望住呢堆野，良久都無出聲。

然後，佢令左一粒金色鈕釦出來，話：「呢粒鈕，曾經屬於一個女人。」咦，講女人，我即刻打醒精神，問：「邊個來的？」

佢：「當年我係學校成績一般，但因為操行太差，成日被人捉到我偷野、打交同埋遲到，幾乎要停學。有次，我同班街童玩大左，做左D錯事，結果被人捉左上差館；其他人都有大人來陪佢地落口供同埋帶佢地走，我就自己一個，因為當時佢地都搵唔到我媽。最後佢地打比我學校，學校就派左我既班主任來，我地叫佢做Mrs. Humpy，因為佢身形實在太似Humpy Dumpy。

Mrs Humpy係好傳統既老師，黑口黑面，非常嚴厲；佢扭住我耳仔行出警署，然後係街上面訓話左好耐，再罰我未來留堂留一個月。對於一個細路，留堂一個月等如終身監禁，我當下就好憎佢。果一個月留堂，佢一直監視住我，要我讀書做功課。我試過逃走，如果係換來「加監」，再加多一星期。當時佢好想搵我媽見面，傾下我地既問題，但我媽是個周圍瞓既酒鬼，佢點會理我地。

留堂期間，我睇左好多書。Mrs Humpy會問我讀後感，會同我討論內容，我可以搏嘴搏到佢無聲出，以為自己好叻。最後一日留堂，佢咩都唔比我做，叫我寫低，第時我想做咩。

當時我寫唔出，好多細路可能都有好多志願，好容易就寫到What I want to be when I grow up，但我諗左好耐，諗起屋企間爛屋，諗起個醉酒阿媽，諗起同Robin一齊流連街頭，即使我只係一個細路，我都知自己無前途。於是我求其寫左，第時大個我想做醫生之類的廢話。Mrs Humpy睇左，嚴厲地問我係咪真係想做醫生，我答不知道。然後佢叫我再諗下，再寫。因為都係最後一日留堂，我發脾氣唔寫，你吹我脹咩！

然後佢望實我，眼神非常之凌厲，好似望穿我咁，到今日我都記得，佢好認真咁話，如果你連自己想成為一個咩人都唔清楚，如果你連呢一點都無思考過，你注定有一個失敗人生。

當時細個，唔係好識反應。但唔知點解，一直都記住。後來，我終於知道自己鍾意做乜，終於明白我要讀書先得，終於放棄街頭生活。」

我：「咁呢粒鈕釦係Mrs Humpy既？」

佢：「唔係，全靠Mrs Humpy鼓勵我同啟發，令我發奮讀書上到好既高中，識到第一位女友，呢粒鈕係初戀女友既。」

我：「@$)!(**%#***%%!!!!」

有時我都諗，如果佢繼續做小流氓，大個之後打家劫舍、殺人放火、販毒坐監，咁我同佢既命運就會好唔同，我會一世都遇唔到一個咁愛我既老公，而佢一世都係社會敗類出入監獄。

所以，我非常之相信，任何時候，對任何人，我地都要「說好話」，經常都要說正面既讚美或鼓勵既說話，唔係去奉承或討好任何人，而係因為你永遠唔會知道自己既說話，會有幾大影響力，隨時會改變一個人、兩個人或更多人既一生。