韓國仔到埗左悉尼之後就係hostel 住幾晚先，跟住先至搵出租房及工作。韓國仔未去過悉尼而且仲係為咗我搬過來，咁我梗係第一日就約咗佢出嚟見吓啦。其實再次見返韓國仔都有少少尷尬，我又唔知佢有啲咩打算我自己又好驚我覺得自己冇乜資格係一段新嘅關係裏面。同佢一齊食完飯之後就帶佢行下悉尼中心地帶，行到去悉尼歌劇院旁邊嘅公園，韓國仔突然伸佢隻手出嚟跟住話 may I ? 佢當時嘅意思係想拖我隻手，我當時唔識得俾反應佢個心淨係諗死啦點算，而且都覺得我無資格去接受一個新嘅戀情因為如果佢知道我嘅事佢應該唔會接受我， 所以我就笑笑口答佢 No 跟住行快幾步費事面對佢。
其實我嗰陣時個心都諗我同佢真係識左唔係好耐， 雖然韓國仔一心諗住如果佢過嚟悉尼嘅話我就會同佢拍拖，但係我覺得我唔可以，至少我都應該要了解佢多啲先掛 。 我拒絕左韓國仔拖手之後佢有冇嬲啊又冇問點解，我仲以為鬆一口氣。過咗幾日又同佢出街帶佢四周圍行，韓國仔同我講話佢有韓國朋友都嚟咗悉尼仲問我介唔介意同佢朋友一齊出來去悉尼一個島到觀光。咁我梗係話唔介意跟住就一齊出發，係個島到觀光嗰陣韓國仔又再次伸出佢隻手，不過今次佢冇再話may I 啦！佢伸咗隻手其實個意思都係一樣想拖我隻手，好可惜佢都係再一次食檸檬。韓國仔今次有少少嬲啦，因為佢覺得我係咪玩佢呢，佢特登為咗我放棄份工搬咗過嚟悉尼，佢以為佢一過咗嚟我就會同佢拍拖，但係原來我唔打算同佢一齊。好彩韓國仔都肯聽我解釋，我好坦白話俾佢知我話我同你認識左太短時間，可唔可以大家做下朋友認識多啲先至考慮係咪有進一步嘅關係。韓國仔最後話佢明白我嘅意思佢會俾多啲時間我。去到呢個階段．其實都有D被韓國仔感動，因為韓國仔係用佢嘅行動來證明佢嘅誠意而唔係靠把口。
我同自己講無論如何我都應該盡快同韓國仔坦白我嘅事。當時我一直深信男人係會介意自己嘅女人曾經離婚，所以我覺得如果我同韓國仔坦白嘅話佢唔會接受我，但係我唔想去隱瞞事實，所以我決定同韓國仔坦白一切。當時我哋企喺澳洲悉尼歌劇院旁邊 （下着毛毛細雨），我同佢坦白晒我嘅野包括A同K嘅存在同埋我同A註咗冊但係我將會幾個月後申請離婚。當我講完所有野嘅時候，我就望住另外一個方向亦都準備去接受一啲唔好嘅反應，但係韓國仔好清晰咁講咗一句說話 \'I don\'t care \'。坦白講嗰一刻韓國仔非常促動我個心，係嗰一刻我傷痕纍累嘅心有咗一點溫暖。
Bk Jm, 如果你想知道韓國仔係咪真係會實行\'I don\'t care 就要繼續追啦！ 夜深了大家晚安！
發表於 
時間岩岩
返回列表
