徐淑敏(Suki)、Cara.G、香港海洋公園保育基金主席、陳佐洱女兒陳晴及乒壇名將張怡寧今日喺數碼港出席「生態保衛賽」慈善跑，Suki喺台上分享教導小朋友愛護海洋心得，又用「大交叉」貼咗海洋垃圾「鋁罐」身上，宣揚護洋嘅重要性。陳晴就指首年舉辦呢個慈善跑，籌款比佢想像中好，所以往後會keep住年年搞。
Suki透露農曆新年同老公、三個女、奶奶及姑奶去咗新加坡同台灣七至八日，過咗一個熱嘅新年，佢話：「我哋去咗主題公園、沙灘玩，雖然湊住三個女仲辛苦過喺香港，不過我同佢三個沖涼，都搞得掂。」
會唔會追番個囝囝？Suki話：「遲啲先。（想夾生肖？）唔係，反而想夾月份，我、老公同二女係處女座，如果生仔就想佢係巨蟹座，因為顧家同孝順。」處女座鍾意完美，Suki笑住話：「我外表乾淨，我個衣櫃好亂，反而老公連內衣褲都會摺得好整齊。」
講到今年計劃，Suki表示稍後會同家姐搞個online fashion生意，仲會讀珠寶鑑證課程，因為佢想做同鑽石有關嘅生意，佢仲話：「籌備得嚟都要一、兩年，生埋仔之後就可以做自己想做嘅嘢。」會唔會有幕前演出？Suki話：「冇人邀請我，最重要係冇合約，其實我ready ，但老公會問我會唔會好夜收工，不過我唔怕辛苦。」 
徐淑敏同香港海洋公園保育基金主席、陳佐洱女兒陳晴(左圖)合照留念。 攝影：黃曉妍 
Suki喺上分享教導小朋友愛護海洋心得，又用「大交叉」貼咗海洋垃圾「鋁罐」身上。 
發表於 
返回列表
