想生BB

跳至

首頁
12345...7

尾頁
   105


複式洋房

積分: 292


發表於 18-1-15 21:48 |顯示全部帖子
本帖最後由 Vanessacsm 於 18-1-16 19:50 編輯

大家好呀,我叫丸丸。我差唔多30歲,順其自然生左第一胎女仔。由於我老公係獨生子而且仲係佢個邊既姓氏為一一個男丁,所以我地一定要生到男仔。好喇我唔介紹咁多喇,講番入正題。
我之前其實都做左好多research,香港比較多人去台灣做IVF而中國比較多人去泰國做IVF。由於選擇性別只有泰國同美國,所以出於價錢方面我地選擇泰國。網上好多文章都講到泰國同美國既成功率係比較高,而且泰國同美國既技術都去到好成熟。
去之前其實我都搵左幾間中介,但d中介價錢真係好離譜,佢地分3個package一個係18萬,一個係21萬,25萬。全部package都包食包住,18萬包2次2個人來回機票經濟艙,21萬包4次2個人來回機票經濟艙,25萬無限次來回唔記得係咪經濟艙。但係18萬個個套餐如果去jetanin皇家醫院做加2萬。
由於價錢好離譜我就做好research邊幾間醫院再walk-in 。
我最後就確定2間,一間係Jetanin皇家(佢哋係專門做試管嬰兒,而且泰國皇室人員都係呢間醫院做),另一間係BNH醫院(佢都係做試管嬰兒出名,但係係綜合醫院)BNH佢有樣好處,就係未去之前你可以send晒你d身體檢查報告比佢,佢會評估後叫你食咩藥物去調理你嘅身體。咁我就按照佢哋要既報告list做晒所有報告send比佢地,佢地就建議我食1個月Q10,葉酸,維他命C。咁我就係藥房買晒呢啲藥食咗一個月同埋月經差唔多嚟之前就到達左泰國,當然我哋早幾日去到觀察下邊間醫院會好啲啦。
其實泰國私家醫院真係幾好,裝潢同香港私家醫院無咩分別,佢D醫務人員既態度真係好好,起初未去到之前我都好驚態度唔好,點知去到泰國人既服務態度真係好好,無論酒店,醫院,飯店都好好。
我之前其實我都計好月經黎既時間前幾日去到泰國找醫完。我大約30號黎月經,我同我老公就27號起程到達泰國。由於27號太晏先到酒店,我地就28號去醫院。
#2 繼續


別墅

積分: 603


發表於 18-1-15 22:22 |顯示全部帖子
Vanessacsm 發表於 18-1-15 21:48
大家好呀,我叫丸丸。我差唔多30歲,順其自然生左第一胎女仔。由於我老公係獨生子而且仲係佢個邊既姓氏為一 ...

請問自己walk in去咁溝通到嗎?預約都係用email?


大宅

積分: 2324


發表於 18-1-15 23:17 |顯示全部帖子
Vanessacsm 發表於 18-1-15 21:48
大家好呀,我叫丸丸。我差唔多30歲,順其自然生左第一胎女仔。由於我老公係獨生子而且仲係佢個邊既姓氏為一 ...

加油預祝你成功


複式洋房

積分: 206


發表於 18-1-15 23:28 |顯示全部帖子

回覆樓主:

跟住呢? 成功嗎? 最終洗左幾錢?


大宅

積分: 2156


發表於 18-1-16 00:14 |顯示全部帖子
Vanessacsm 發表於 18-1-15 21:48
大家好呀,我叫丸丸。我差唔多30歲,順其自然生左第一胎女仔。由於我老公係獨生子而且仲係佢個邊既姓氏為一 ...

點解要跟中介公司去?泰國醫院可以自己walk in 去用英文溝通或者請個翻譯人員都只係幾千元,ivf 療程應該係$10萬左右!


複式洋房

積分: 292


發表於 18-1-16 00:54 |顯示全部帖子
Babychuwaiwai 發表於 18-1-15 22:22
請問自己walk in去咁溝通到嗎?預約都係用email?

Walk-in d醫務人員係唔識中文同英文。我地一開始都好慌張,我老公就同坐係到等既中國人傾計,佢就介紹我地識佢既翻譯,之後再同我地講解流程。


複式洋房

積分: 292


發表於 18-1-16 00:56 |顯示全部帖子
yywapple 發表於 18-1-15 23:28
跟住呢? 成功嗎? 最終洗左幾錢?

我依加係著床階段,所以寫到小小就要休息,明天再寫(emoji)


複式洋房

積分: 292


發表於 18-1-16 01:00 |顯示全部帖子
charlenebb 發表於 18-1-16 00:14
點解要跟中介公司去?泰國醫院可以自己walk in 去用英文溝通或者請個翻譯人員都只係幾千元,ivf 療程應該 ...

醫院無咩人識講英文同中文架,都要請翻譯,請翻譯要成5500港幣。全程用左16萬不包括機票食宿,因為我胚胎成功左15個,所以超出套餐範圍要加33000港幣到。


男爵府

積分: 9500


發表於 18-1-16 07:53 |顯示全部帖子
Vanessacsm 發表於 18-1-16 01:00
醫院無咩人識講英文同中文架,都要請翻譯,請翻譯要成5500港幣。全程用左16萬不包括機票食宿,因為我胚胎 ...

原來去泰國做ivf 都唔平喎⋯⋯都要16萬


複式洋房

積分: 292


發表於 18-1-16 13:30 |顯示全部帖子
felixsky 發表於 18-1-16 07:53
原來去泰國做ivf 都唔平喎⋯⋯都要16萬

無咁多胚胎就12萬到。


複式洋房

積分: 292


發表於 18-1-16 14:23 |顯示全部帖子

回覆樓主:

本帖最後由 Vanessacsm 於 18-1-16 15:23 編輯

#2
28號
我地就帶齊晒護照,身體檢查報告,結婚証書去醫院。行去reception 問,佢地原來係唔識講英文既。嗰一刻我同老公都唔知點算,老公就坐係一對中國夫婦旁邊到套料。套料期間我就問左一個翻譯點收費,佢就好忙咁答我5000人民幣2星期翻譯,個時我心諗一定要整成個月架喇,咁咪成10000人民幣,好貴啵。我老公套料個對夫婦就話佢地係中介介紹一共15萬人民幣到,佢月經黎第2日就係中國醫院打排卵針,打到差不多就過來泰國見醫生。到最後佢地就介紹我地識佢地既翻譯。佢地既翻譯係醫院其中一個介紹試管嬰兒流程嘅人員,基本上係得佢一個識講中文。咁佢就帶我地入去介紹流程嘅房入邊講述試管嬰兒嘅流程,大約傾20分鐘到就完成。佢叫我地加佢微信,我月經黎既第一日就通知佢幫我地預約醫生和安排翻譯人員俾我哋。我老公睇完呢間醫院之後,佢就唔想去第二間醫院再睇啦。因為佢都好滿意呢間醫院,同埋佢話咁多人一定唔會差得去邊。當時醫院真係坐滿晒人。
29號
等待月經來臨,老公已經急不及待係咁問幾時黎呀。
30號 - 月經第一日
月經黎喇,我地就立即通知個個識中文嘅醫院人員。我哋將Passport影底send咗俾佢,佢就幫我地約左醫生第二日既10點,仲介紹埋翻譯俾我哋。
1號 - 月經第二日
去到醫院就用微信通知翻譯我哋已經到咗啦,咁佢就會搵我地啦。佢叫我地比護照,結婚證書幫我地登記,用咗大約一個鐘去登記之後又入去介紹流程間房到介紹試管嬰兒的流程。介紹完就見醫生,佢會幫你照陰超睇吓你子宮嘅情況,之後安排你打幾日排卵針。睇完醫生就等俾錢,就攞住張打針紙去3樓打針。我要係固定嘅時間連續黎醫院打三日針,第四日就再見醫生。
呢3日我都要打促排針GONAL-F(每個人身體狀況都唔同,所以打嘅針都會有所出入),打針就打係肚臍左右下方。
呢日我就用左35,030泰珠大約8,590港幣

#3 繼續


複式洋房

積分: 292


發表於 18-1-16 15:21 |顯示全部帖子

回覆樓主:

本帖最後由 Vanessacsm 於 18-1-16 15:24 編輯

#3
2-3號 - 月經第三,四日
固定時間去醫院打針
4號 - 月經第五日
見醫生前二小時前抽血,醫生首先幫我做左陰超睇下我有幾多粒卵子,量度每一粒子大小。醫生就話我打左3日針血值唔夠高,要加量。仲問我係咪唔開心呀,要食多d蛋白質既野補充。老公聽完之後佢就日日都好緊張係咁叫我飲牛奶食雞蛋,一日食四隻熟雞蛋都幾難頂。
固定時間去醫院打促排針一針。呢日就量到左邊卵巢有11粒卵子,右邊卵巢都係有11粒,大多數卵子大細都係4-8mm既範圍,正常呢個階段就去到6-9mm呢個範圍。今次就打2日GONAL-F促排針,1日CETROTIDE防排針。打2日針再見醫生,是日費用:17,650泰珠大約4,350港幣。
5號 - 月經第六日
固定時間去醫院打促排針一針和防排針一針
6號 - 月經第七日
見醫生前二小時前抽血,醫生一樣幫我做左陰超睇下你有幾多粒卵子,量度每一粒子大小。今次醫生話血值上番黎標準,繼續打四日GONAL-F促排針和CETROTIDE防排針。10號見醫生,醫生就會安排邊一日取卵。
今次量到左邊有16粒,右邊有7粒。大多數卵子都去到6至12mm。是日費用:37,550泰珠大約9,210港幣。
7,8,9號 - 月經第八,九,十日
固定時間去醫院打促排針一針和防排針一針。一開始打都唔痛打到後期就開始痛,等半小時就開始唔痛。
10號 - 月經第十一日
見醫生前二小時前抽血,醫生又係一樣幫我做左陰超睇下你有幾多粒卵子,量度每一粒子大小。呢次個張寫有卵子有幾大有幾多粒個張紙仔唔見左,所以講唔到比大家聽。醫生睇完所有野一切都正常,醫生就安排左13號做取卵手術,做完取卵手術隔一天就可以走啦。10號固定時間打促排針一針和防排針一針,11號早上打防排針,11號晚上打夜針2支。夜針係安排護士上門打,費用1,000泰珠。是日費用16,650泰珠大約4,100港幣。

#4 繼續


複式洋房

積分: 292


發表於 18-1-16 16:12 |顯示全部帖子

回覆樓主

#4
11號 - 月經第十二日
早上到醫院打防排針
晚上護士上門打夜針2支,上門費用1,000泰珠。
12號 - 月經第十三日
休息一天,晚上12點後不能進食和飲水。
13號 - 月經第十四日
一般取卵手術都係上午做,我們上午8點到達醫院,10點做手術,手術係自己一個入去,老公唔可以陪。手術係全身麻醉,入左去大約5分鐘就昏迷左,不停聽到好多泰文係耳仔周圍圍繞(因為d護士係咁傾計,嘻嘻)當我自己醒返嘅時候就已經做完瞓咗喺度休息,周圍有好多媽媽都係同我一樣訓左係度休息。做完下面真係幾痛下,好似黎m咁痛,不過過左1個鐘到我就感覺到無咁痛。過咗5分鐘之後姑娘就過嚟同我講你做完啦,休息下(唔鹹唔淡嘅普通話)當中休息期間我可以去洗手間,姑娘會比啲餅同水我食同飲。大約1個鐘到,姑娘就會叫我個名話你走得喇。
之後就翻入去休息室,我嘅翻譯就已經喺度等緊我啦。換完衫出嚟,姑娘就同我嘅翻譯講解我抽左幾多粒卵子和要食用嘅藥物。當日我就抽左27粒卵子,俾咗啲消炎藥,止痛藥和防腹水藥。仲比左想移植個個月,黎月經既時候要食既藥。
跟住就走得啦,佢會用輪椅推你去停車場等的士嚟車你返去酒店休息。是日費258,300泰珠大約63,320港幣,另外仲要比12萬泰珠按金大約29,420港幣。點解要比按金呢,因為套餐只包括1組胚胎冷凍費和篩查費(5對染色體和24對染色體價錢一樣),如果超出一組的數量就要另外加錢,怕你不在泰國無法交錢,所以一定要收取按金。這按金可以留待下次泰國移值時使用或退還。

#5 繼續


複式洋房

積分: 206


發表於 18-1-16 17:08 |顯示全部帖子

回覆樓主:

睇完。。。樓主好詳盡。。排續睇。。。樓主依家bingo 嗎?


複式洋房

積分: 292


發表於 18-1-16 17:12 |顯示全部帖子

回覆樓主

#5
佢嘅一組既計法,就係胚胎成功配對之後嘅數量。篩查一組為8個,冷凍一組為6個,篩查超過8個胚胎第9個就收2萬泰珠一個,超過7個胚胎(15個胚胎)就收14萬泰珠,如果再多一組(姐係第3組)又係再收2萬泰珠一個,超過7個胚胎又係收14萬。一般配對成功都唔會超過兩組。好啦到冷凍費,冷凍費就冇咁複雜,超過6個胚胎就每個5000泰珠(篩查出來正常的胚胎按5000株一個,異常計3000)。

14號 - 取卵第二日
休息一天,是日翻譯會發信息過嚟問我係咪真係選擇篩查24對染色體。當時我都好猶豫,心裏邊好想篩查24對染色體。但係翻譯同我講做24對好危險,因為24對好嚴格所以我27粒卵子篩查出嚟可能得返5至6個胚胎。其實咁樣好誇張,所以最後我就做咗5對染色體。胚胎第一天情況:取卵27個,有22個成熟卵,配對20個受精卵!第一日咁就無左7個。

15號 - 取卵第三日
番香港續繼休息

18號 - 取卵第六日
有12個胚胎,11個HgB正在孵化囊胚;1個Extg擴張囊胚,1個AC等級11個BC等級。翻譯話等級都算不錯,但係我上網睇BC其實係一般等級,上網睇完等級其實心情好低落。

19號 - 取卵第七日
未有報告,由於胚胎可以多篩查3個,所以明天出結果。好緊張,唔知有幾個多健康女仔同男仔呢。

20號 - 取卵八日
報告出喇,一共15個胚胎,12個係女仔其中1個係異常,4個男仔。全部都係BC,得1個女仔係AC。老公好失落,因為當時精子配對前已經加錢篩走左一次X精子,佢覺得如果順其自然生自己無仔緣。我就覺得都好好彩起碼都有4個呀,有2次機會。
當日翻譯話醫院叫我地交費,因為按金不夠。一共要交13萬3千泰珠大約32,610港幣,按金扣左12萬泰珠仲差1萬3泰珠。咁我地就微信轉帳俾翻譯等佢幫我地交俾醫院。

好啦,咁我哋就要等到下次黎月經嘅第一日就通知翻譯預約醫生。

#6 繼續




複式洋房

積分: 292


發表於 18-1-16 17:14 |顯示全部帖子
yywapple 發表於 18-1-16 17:08
睇完。。。樓主好詳盡。。排續睇。。。樓主依家bingo 嗎?

未,依加移植左第4日,等著床,我都好緊張。希望成功。


複式洋房

積分: 206


發表於 18-1-16 17:18 |顯示全部帖子
Vanessacsm 發表於 18-1-16 17:14
未,依加移植左第4日,等著床,我都好緊張。希望成功。

祝樓主好孕成功。。。生番個可愛小男孩。


大宅

積分: 2155


發表於 18-1-16 17:47 |顯示全部帖子
祝福樓主,寫得好詳盡呀,BB一定會痴到實媽媽


複式洋房

積分: 292


發表於 18-1-16 19:00 |顯示全部帖子

回覆樓主

#6

25號 - 月經第一天
聖誕節黎月經都幾易記,黎月經第一時間就通知翻譯等佢幫我約醫生,佢就吩咐我按時食醫院比我既藥。月經第二日開始就要早餐午餐晚餐後各食一粒PROGYNOVA補佳樂,直到第八日就開始早餐晚餐各食兩粒PROGYNOVA補佳樂。呢啲藥係幫助子宮內膜加厚。翻譯亦都好快幫我預約左6號見醫生,所以5號前一定要到達泰國。

6號 - 月經第十三日
如常見醫生前2小時抽血,醫生再一次用陰超幫我檢查子宮內膜厚度,內膜厚度符合移植。醫生就安排13號做移植手術,12號早上到達醫院抽血。繼續早餐午餐晚餐後各食二粒PROGYNOVA補佳樂,6號到10号早晚各塞1粒藥入陰道,11號至13号早晚各塞2粒藥入陰道。其實塞藥真係好麻煩,成日都搞到好污糟。是日費用:20,310泰珠大約4,980港幣。

7號至11號
準時塞藥食藥。我覺得呢幾日真係荒廢日子,曼谷要去嘅地方都去晒,唯有喺酒店食同訓。嘻嘻

12號
早上10點到達醫院抽血,如果血值不達標就要再抽過,抽到達標為止。好彩我抽一次就達標。是日費用:1,500泰珠大約370港幣。

13號
11點到達醫院我就飲咗一樽水,12點開始忍尿,1點做手術。老公又係唔可以陪同做手術,只係翻譯可以陪同幫忙翻譯,移植手術無麻醉嘅。
首先用超聲波睇下我忍尿情況點樣,如果你唔夠尿就叫你再飲多d水。我ok喇就入手術室,醫生見到我好多尿所以都幫我排緊啲尿走。係我左邊有個屏幕係見到我移植既胚胎,係我右邊就係我子宮既超聲波。醫生會一路做一路講解佢而家做到邊一步,成個移植過程我都睇得好清楚。大約10幾分鐘到移植完成後就推你去床到休息2小時,呢兩小時真係好悶,眼光光咁都唔知喺度做乜好。其實成個過程都冇咩感覺,係做嘅時候有少少唔痛。

#7 繼續


複式洋房

積分: 292


發表於 18-1-16 19:32 |顯示全部帖子

回覆樓主

#7
兩個小時過後,終於護士叫我個名走得啦。同上次取卵一樣翻譯係休息室等緊我,護士係我換完衫之後亦都同我講解要食咩嘢打咩針。20號我要返去醫院抽血驗孕,但係老公嘅簽證只係到19號,所以我哋19號就要走返唔到醫院驗孕。由於咁嘅原因護士打包左兩個月嘅藥比我返去食同埋自己打針。
醫院比左50日既PROGYNOVA 補佳樂,早餐午餐晚餐後各食2粒。DUPHASTON 達芙通,早餐午餐晚餐後各食1粒。ASPIRIN阿司匹林,早餐後食1粒。CYCLOGEST,早餐午餐晚餐後各塞2粒。每日都要自己打肝素針。
其實要自己打針都幾驚下,我老公幫我打佢手震得好犀利。因為打得太快會好痛所以要打得慢,我自己打就打到有幾個紅點係個肚度。嘻嘻,唔知會唔會有50個紅點呢。
是日費用:122,840泰珠大約30,120港幣。仲有翻譯費用 : 5,550港幣。
移植完醫院會用輪椅推你去到停車場等的士直接返到酒店。返到酒店我老公直頭唔俾我起身,叫我瞓喺床度咩都唔好做,又唔比我沖涼,搞到我臭左兩日先比我沖涼。基本上食飯食藥咩都係床上面做,除咗去廁所。到咗第三日佢先比我落床行兩野又再訓返係張床度。嘻嘻
瞓到今日第四日,希望著床成功。
醫院方面用左16萬港幣,因為我胚胎個到加左3萬幾,正常就12萬幾就ok喇。

住宿個到仲未講添,我住喺醫院附近嘅套房酒店(有廚房有獨立洗衣機係間房到)。大約700港幣一夜包早餐(雖然早餐冇咩食,但都好過冇呀)。每次我訂酒店我都分開幾次訂同埋訂可以提前七日免費取消個種,因為我怕早走可以提早取消個Booking。我個人建議就唔好住Airbnb啦,因為冇人打掃房間仲冇早餐食,依家我住酒店起碼每兩日就換一次床單。

2次去我差不多用左1萬8港幣平時食飯買零食水果用。

希望我嘅分享幫到大家啦。



首頁
12345...7

尾頁

跳至